Daniel - DAG 13 - BUKUIT NE TILIIL Sireet ne Dutero Kanon

SUSANNAH

¹ Ki mi chii ne ki kiguure Joakim ne ki menyei Babilon.

² Ki itun chiichooto Susannah cheptap Hilkiah, ne ki lakwa ne ki tinyei itoon ne karaaran ak koywei Kiptaiyat.

³ Ki sigiikyik ko ki Yahudik che ki isubi ng'atuutik kot. Ki igue cheptonywa ng'atuutyetap Musa.

⁴ Ki mogoryo kot manong'otyonnyi. Ki kaiyem kiyeng'uut ne karaaran koonnyi ago ki atkain kora kotuitos Yahudik eng' koonnyi amu ki keerei ineendet ko chii ne ititaat.

⁵ Ki kikwei poisyek aeng' koek kirwoogik kenyinooto. Ki mwa Kiptaiyat kole agobo icheek, “Ki nyo yaityet Babilon kobun poisyek che kirwoogik, icheek che ki magaat kondochi piik.”

⁶ Ki cham anyun kobendi poisyechu tuwai kootap Joakim, ak chii age tugul ne ki tinyei kirwook ne machei kogasyi, ko kiwendi yooto.

⁷ Ki cham kowendoti Susannah eng' kiyeng' peetuusyek tugul eng' peet kween ko kaba piik koam amitwogik.

⁸ Ki makyigei anyun kirwoogichu Susannah miising', kot ko kotugul koelegei si ko iit inee.

⁹ Ki igiich icheek mageennywa eng' Susannah kot koma koiti koek kiy Kamuktaindet anan Imanda.

¹⁰ Ki machei age tugul Susannah nga ma mwoochigei ole ki kastoi,

¹¹ ak ki ililani age tugul, ma machei kong'aany agobo mageennyi ne ya.

¹² Kotugul ko ki mang'u asi tamangap kooro inee.

¹³ Ki leenjigei peetuut age, “Kagoit saitap amitwogigap peet kween; ara ngebe kaa.”

¹⁴ Ki peesyo anyun, kwo chii tugul oreennnyi; nga ma wo kaa age tugul ago ki week nyo ko iit Susannah, ak eng' nyasuut kotuiyo. Ki toi age tugul kotyem koeetkei koaroor amu ne si koweek nga eng' let komwa age tugul mageet ne ki ting'ee Susannah. Ki kaasyin icheek tuwai kocheeng' kasar ne nyooru Susannah komi ineegei.

Kotyemei kirwoogik Susannah

¹⁵ Ki igen icheek anyun kasar ne myee. Ki wo pesyo Susannah kiyeng' ko uu kotugul ak kiboitiinikyik, chebyosoi aeng'. Amu ki lalei asiista kot, ko ki keer Susannah kole kaigai kouungei.

¹⁶ Ki ma komi chii age kiyeng' kobatee kirwoogichooto aeng' che kiga unygei asi ko iit Susannah.

¹⁷ Ki leenji anyun Susannah kiboitiinikyik, “Oba oibwo mwaita ne kiuunegei ak mwaita ne ng'uu, yeityo oger kurgeet asi auungei.”

¹⁸ Ki ker kiboitiinik anyun kurgeet ne oo yeityo komandae kurgeet ne ming'in koba koip tuguuk che kagateebee Susannah. Ma iro icheek poisyechugai aeng' amu ki kaunygei.

¹⁹ Ki eng' ye kamanda kiboitiinik, komong' poisyechugai kong'etee ole kaung'eegei ak kochepchep kotakyigei Susannah,

²⁰ ak koleenji, “Keero, keraat kurgeet ak ma mi chii ne imuuchi kogeerech. Kabareech mageet ne keting'enen, iyan ak igoonech kito ne kimache.

²¹ Ngot ko megoonech, kebeendi kapkirwook ak kiyoosye keele kagigeeriin omi ak parnotyo ak keyookte kiboitiinik komanda asi ong'etu okweegei.”

²² Ki iimgei Susannah ak kole, “Ami ole pichiy, ngot ayanwook, keboro. Ngaeesye, ko ochobootiin okwara.

²³ Kaaeesye; ngo mach orataa, orataa kosiir ayai tengek eng' taitap Kiptaiyat.”

²⁴ Ki toi anyun Susannah kowaach eng' waagaat ne oo, kotoi ak icheek poisyechugai aeng'u kotuptupee waagaat ak kotaam ineendet,

²⁵ ak kolabat agenge eng' icheek ipkoyaat kurgeet.

²⁶ Kingo kas kiboitiinik che ki mi koo polateet, korwoi kosar kiyeng' kubun njoor kooro kiit ne ki ityi Susannah.

²⁷ Kingo mwoi anyun poisyechugai kiit ne kayaak, kokwer kwongeet ak kolilaanso kiboitiinik. Ki tomo kegasyin Susannah ng'olyoo ne uu ni pesyet age.

Korwokyin kirwoogik Susannah

²⁸ Ki it poisyechugai aeng' peetuut ne rubei ko katuiyo piik eng' kootap Joakim kochobatiin kosuldae ng'olyoonnywa ne kogang'at kole asi kebar Susannah.

²⁹ Ki le eng' taitap piik tugul, “Oguurwech Susannah osotyotap Joakim, cheptap Hilkiah.” Ki eng' ye kiguur

³⁰ inee konyo koo, kobwa ak sigiikyik, lagokyik ak tilyonutikyik tugul.

³¹ Ki lakwa ne myee ak ko ki tinyei itoon ne karaaran kot Susannah.

³² Amu ki tugoot togeennyi, kong'at poisyechu yach aeng' keng'aany inee togoch, asi koboiboenji kogeerei itoondanyi ne karaaran.

³³ Ki kanyi `peegap kong' konyegap piik tugul che ki mi ak ineendet ak che ki keer ineendet.

³⁴ Ki tononso anyun eng' taitap piik tugul poisyechugai ak kogonoor eunekwak paragutap metitap Susannah ak kotoi komwoi lelutikyik.

³⁵ Ko kanyi peegap kong' konyekyik, konyal parak kipsengwet Susannah amu ki imaang'u inee Kiptaiyat.

³⁶ Ki koon poisyek chooto aeng' paornateet kole; “Ki ngebendoti acheegei eng' kiyeny, komong' chebyosoni ak kiboitiinik kwonyiik aeng'. Ki ker kurgeet ak koleenji kiboitiinik komanda.

³⁷ Komong' nerana ne muren ne ki unyegei eng' kiyeng' konyo ole ki mi chebyosoni, ak koruiyo tuwai.

³⁸ Ki kimi ui kole eng' kiyeng' ak ki eng' ye kiroo yaityooni ki yooksei, kerwai yooto.

³⁹ Inganda ki kinam koyae yaityooni, koma kimuuch kenam murenonooto amu ki kiim kosiirech. Ki labat ak ipkoyaat kurgeet ak komwei.

⁴⁰ Ki kimuuch isinee kenam korgoni. Ki kiteebee keleenji kang'o murenonooto,

⁴¹ koeesyo komwoiwech. Kimurtoi keele po iman paornataani.” Ki iyan chii tugul ng'olyoonnywa amu ki ma ko kandoik kityo poisyechu aeng' ago ki kirwoogik; ara ki kigiikyi kebar Susannah.

⁴² Ki waach anyun Susannah eng' kutit ne oo kole, “Kamuktaindet ne po koigeny, ma mi kiy ne imuuchi koung'ak eng' inyee; ko tomo ko yaak kiy age tugul ingen.

⁴³ Ang'ni awendi amee, ak ingen inyee ile ma tinye leeluut, ile kenu poisyechu.”

⁴⁴ Ki kasyi Kiptaiyat saaennyi.

⁴⁵ Ak eng' yooto kimuti Susannah ipkeborei, kogoochi Kamuktaindet neran ne keguuree Daniel kong'alaal.

⁴⁶ Ki waach eng' tuugeet ne oo kole, “Ma mache keityo tumdaetap korootik che po kwonyi.”

Kosaru Daniel Susannah

⁴⁷ Ki welelgei chii tugul kogusyi kong' inee ak koteebee koleenji, “Keele nee?”

⁴⁸ Ki tonoon Daniel eng' tainnywa ak kole, “Koberberitu ne tya piigap Israel kot ogiikyi kebar cheptap Israel ama ochigil paornateet ne uu ni anan ocheeng' imanit.

⁴⁹ Oweege kapkirwook kogeny. Paornateet ne kagoon pichu agobo Susannah ko po lembech.”

⁵⁰ Ki chook chii tugul kogeny koweek ole kagiyaee kirwooget ak ki leenji poisyek chuun alage Daniel, “Nyo ketebii tugul amu kagogoonin Kamuktaindet utaatyet ne po poiyo.”

⁵¹ Ki leenji `Daniel icheek, “Obeesye poisyechu tuwai, yeityo ogany agin age tugul.”

⁵² Ki eng' ye kagibeesyo, koguur anyun Daniel agenge eng' icheek ak koteebee koleenji, “Kipyaitwaani, kagong'ang'agiis anyun tengekwogiguk che ki iyai kong'etee.

⁵³ Igoonu kirwoogutik che ma po iman, irate che ma tinyei tengek ak ityaach kiplelutinik, nga ki le Kiptaiyat, ‘Amobar chii ne ma tinyei leeluut ak chii ne ititaat.’

⁵⁴ Ara ngot ko ki iroo iman pichu koruitos tuwai, mwaiwo, ki mi kelutap keet nee?” Kowol inee kole “Ki kelutap molong'wet ne petaat.”

⁵⁵ Koleenji Daniel, “Iman! Tarin. Tarin lembechandani amu kagong'at Kamuktaindet malaikaiyannyi ko tilin ibunu aeng'.”

⁵⁶ Ki kimaanda poiyot ne tai ak ki ng'at Daniel kimut niin age konyo. Koleenji inee “Weeri po Kanaan, inyee ne me po Yudah, kagomalin konyan itoon ne karaaran ak koomaas mugeleldang'ung' mageet ne ya.

⁵⁷ Ki inaite iyachini tiibiigap Israel ko uu ni; amu ki iywein, kogoonin kiit ne ki imache. Oroni cheptap Yudah ne ma muitachin yaityeng'ung'.

⁵⁸ Ara mwaiwo, ki kelutap keetit ngoro ne ki inamji?” Kowol kole, “Kelutap alayet ne oo.”

⁵⁹ Koleenji Daniel, “Iman! Iman! Lembechandani ko agoi kobarin; igenisyei malaikayatap Kamuktaindet kotinyei rotwetap chok eng' eut komachei kobetin ibunu aeng' ak kowong'wok okweek tuwai.”

⁶⁰ Ki ng'eet anyun kapkirwook komugul ak eng' tuugeet ne oo kotoroor Kamuktaindet, Inee ne saru age tugul ne tiegei Ineendet.

⁶¹ Ki kiweekyigei poisyechugai tuwai, amu ki tilji Daniel kirwooget kosupkei ak paornateetap lembech kobun kutusweekwak. Ki kiyachi icheek yaityet ne ki kang'at keyachi chiitap kokwennywa

⁶² Ki kibar icheek ko uu ye mwaei ng'atuutyetap Musa. Mata ketarta koroti anyun peetuunooto che po chii ne ma tinye leeluut.

⁶³ Ki itoroor `Hilkiah ak chepyosennyi Kamuktaindet agobo cheptonywa Susannah. Ki itoroor Kamuktaindet kora manong'otyonnyi ak tilyonutikyik tugul amu kiga kityaach keele ma tinyei leeluut.

⁶⁴ Kong'eetee peetuuno, ko ki kigoochi konyit Daniel ne po iman eng' taitap piik.