Daniel - DAG 12 - BUKUIT NE TILIIL Sireet ne Dutero Kanon

Peetuusyek che po kagesunet

¹ Ak kotonon eng' peetuunooto Mikael, pounindet ne oo ne toreti lagogap piiguk. Tuun piitu peetuusyek che po nyalilda, che ki tomo kobiitu kobooch ngap kobiit pororyet agoi peetuunooto. Ago kisaru piiguk eng' peetuusyechooto, age tugul ne ki kisirchi kainennyi bukuit.

² Ak kong'eetyo che chaang' eng' icheek che ki koruiyo eng' ng'ung'unyek, pendi alak sobodap koigeny, ak kobendi alak tewernateet ak chotisyet ne po agoi.

³ Tuun iluu che ng'oomen ko uu kakweng'et ne po parak; ak kooluu koigeny ak koigeny ko uu kecheik icheek che imutyin che chaang' imanda.

⁴ Ago tuch ng'aleechu, ee Daniel, ak ing'ooch bukuit agoi peetuusyek che po let. Tuun ruaati che chaang', ak kotesak naet.

⁵ Ki ageer anyun anee Daniel, ak ogeero, ki tononso alak aeng'u, ki tonone age ngeguutap aineet pitoni, kotonone age ngeguutap aineet pitoniin.

⁶ Ki teebe age ne ki ilaachi ngoroigap katanit, ne ki mi paragutap peegap ainonooto koleenji, “Tyanitu si koek kagesunetap kwang'utichu?”

⁷ Agas chiito ne ki ilaachi ngoroigap katanit ne ki mi paragutap peegap ainonooto, ye kinamjin parak eunnyi ne po tai ak eunnyi ne po kataam kotokyi kipsengwet. Ak ki agas koyasyo eng' ineendet ne sabei koigeny kole punjin kenyiit, kenyiisyek ak kebebertap kenyiit, ak ye tuun kagoges icheek tonet ne tonatoni kimnateetap piik che tiliileen, kogeskei anyun tuguchuuto tugul.

⁸ Ki agas ago ma aguiye; yeityo amwa ale, “Ee kiptaiyandennyu, egu nee kagesunetap tuguchuuto?”

⁹ Kile ineendet, “Ui inyee Daniel, amu kagituch ng'aleechuuto ak keng'och kot koit peetuusyek che po kagesunet.

¹⁰ Ianyinyegei che chaang', ak koyaegei koleelagitu, ak kotiliilegei; ago yaei kiptengeginik tengekto. Ama iguitos kiptengeginik agot agenge, ago iguitos icheek che ng'oomen.

¹¹ Egu peetuusyek eliphuut agenge ak pogol aeng' ak tamanwogik sogool, kobooch peetuusyek che ki istoi kagoochinet ne kibeelei ne po kotugul, ak kinde kiit ne kiwechei ne ng'emisyei.

¹² Iberurot ineendet ne igenisyei, ne itei peetuusyek eliphuut agenge ak pogol somok ak sosom ak muut.

¹³ Ago ui inyee oldang'ung' agoi koit kagesunet: amu imuunyi, ak tuun itononi eng' komostang'ung', eng' kagesunetap peetuusyechooto.”