ATEPTAP LAWIK 9 - BUKUIT NE TILIIL Sireet ne Dutero Kanon

Kitoroorchin Aron ak weeriikyik tisiisyet

¹ Eng' peetuutap sisiit, koguur `Musa Aron ak weeriikyik kobooto poisyegap Israel,

² ak koleenji Aron, “Kweri kirgit ne ming'in ne libwoop koek kagoochinetap tengekto ak mengit ne libwoop koek kagoochinet ne kibeelei, ak igoite eng' taitap Kamuktaindet ne Toroor.

³ Ng'alaalji piigap Israel ileenji, ‘Okweri kwesta koek kagoochinet ne po tengekto, moita ak aarwetap keechiir che ma siirei kenyiit agenge tuwai ak ko che libwoben kobunji kagoochinet ne kibeelei,

⁴ kirgit ak mengit kobunji kagoochinoigap kaalyeet che kienyei eng' taitap Kamuktaindet ne Toroor, ak kagoochinetap peek che kagiburukto mwaita amu mong'jinok Kamuktaindet ne Toroor rani.’ ”

⁵ Kiget icheek chooto ki kang'at Musa kobwa taitap emait ne kituiyechin, ak ki pwa tuiyet komugul koriik ak kotononso eng' taitap Kamuktaindet ne Toroor.

⁶ Ki mwa Musa kole, “Ni kiit ne ki ng'at Kamuktaindet ne Toroor kole oyai, si komong'jok liilindanyi.”

⁷ Ki leenji `Musa Aron, “Ui kaptisisyet ak igoite kagoochineng'ung' ne po tengekto, kagoochineng'ung' ne kibeelei, ak iyachigei tisiisyet ak iyachi piik ak icheek. Igoite kagoochinet ne po piik ak iyai tisiisyet agobo icheek, ko uu ye ki ng'at Kamuktaindet ne Toroor.”

⁸ Ki wo Aron kaptisisyet ak koeeny moita ne po kagoochinetap tengekto ne nenyi.

⁹ Ki igoochi weeriikyik ineeendet korotiik. Ki irookta mornennyi korotiik ak koiilate kuinoigap kaptisisyet, ak kotumji korotiik che ng'etunotiin kaptisisyet keel.

¹⁰ Ki peel mwanik kobooto soromok, ak kwambelelyet ne mi kooet ne po kagoochinetap tengekto eng' kaptisisyet, ko uu ye ki ng'at `Kamuktaindet ne Toroor Musa.

¹¹ Ki peel eng' ma panyeek ak muito eng' saang'utap nganaseet.

¹² Yeityo koeeny kagoochinet ne kibeelei ak ki ip weeriikyik korotiik koba ole mi Aron, ak ki isote kaptisyet komoswek tugul.

¹³ Ki ipchi `icheek ineendet kagoochinet ne kibeelei, kogoitoi eng' kebeberwek kobooto metit ak kobeel eng' kaptisisyet.

¹⁴ Ki iun tuguugap moo ak keelyek, ak kobeel eng' paragutap kagoochinet ne kibeelei eng' kaptisisyet.

¹⁵ Ki igoito kora Aron kagoochinetap piik, ak ki kweri kwesta ne po kagoochinetap tengekto ne po piik. Ki eeny ak kogoito agobo tengekto ko uu ni kabo tai.

¹⁶ Ki ip kagoochinet ne kibeelei, kogoito ko uu ye ki king'at.

¹⁷ Ki ip kagoochinetap peek, komugut konyi euut ak kobeel eng' kaptisisyonooto kobooto kagoochinet ne kibeelei karon agine.

¹⁸ Ki eeny kirgit kobooto mengit, ak tiseiywotap kagoochinoigap kaalyeet che po piik. Ki ip weeriigap Aron korotiik kogoochi ineendet ak ki ise kaptisisyet komoswek tugul.

¹⁹ Ago mwanigap kirgit ak che po mengit; che po saruryennyi, che ki ilaach moet ak soromok, ak che po kwambelelyet ne po kooet;

²⁰ ki igonoor `icheek mwanichooto tagatok, ak ki peel Aron eng' kaptisisyet.

²¹ Ki ongoi `Aron tagatok ak chaatit ne po komostap tai koek kagoochinet ne kiongoi eng' taitap Kamuktaindet ne Toroor, ko uu ye ki ng'at Musa.

²² Ki iito Aron eunekyik kotokyi ole mi piik ak koberuur icheek, yeityo kochoorgei ko kagogoito kagoochinetap tengekto, kagoochinet ne kibeelei ak kagoochinoigap kaalyeet.

²³ Ki pa Musa ak Aron emait ne kituiyechin, yeityo komong' ak koberuur piik, ak komong'ji liilindap `Kamuktaindet ne Toroor piik tugul.

²⁴ Ak ki mong' maat kobunu taitap Kamuktaindet ne Toroor, ak kobeel kagoochinet ne kibeelei ak mwanik eng' kaptisisyet. Ye kingo keer piik tugul, kowokyo eng' poiboiyet, ak kobutyo kot kotiiny togoochikwak ng'wony.