ATEPTAP LAWIK 8 - BUKUIT NE TILIIL Sireet ne Dutero Kanon

Kitoroori Aron ak weeriikyik koek tisiik

¹ Ki ng'alaalji `Kamuktaindet ne Toroor Musa koleenji,

² “Imut Aron ak weeriikyik, ak iip ngoroik ak mwaita ne ki ilse, ketu kirgit ne po kagoochinetap tengek ak mengichik aeng', ak iibu ateruut ne mi magatiinik che ma kinde mermereek,

³ yeityo iyum tuiyet komugul eng' kurgeetap emait ne kituiyechin.”

⁴ Ki yai Musa anyun ko uu ye ki ng'at Kamuktaindet ne Toroor, ak ki iyumjigei tuiyet kurgeetap emait ne kituiyechin.

⁵ Ki leenji `Musa tuiyet, “Ni ko kiit ne kogong'at Kamuktaindet ne Toroor kole keyai.”

⁶ Ki imut `Musa Aron ak weeriikyik ak koun icheek eng' peek.

⁷ Ki ilaakyi ineendet Aron ngoryeet ne kooi ak koratyi pireneet ak kolaakyi kora ngoryeet age ne kooi ak ephod, ak korate pireneet ephod ne ki kinap eng' ng'omnateet, ak kogige ephod mosibinooto.

⁸ Ki ilaakyi ineendet ngoryeetap tegeet ak konde ngoryonooto Urim ak Tumim.

⁹ Ki igonor naaryeet metitap Aron ak konde komostap togoch kiit ne tiliil ne po thahabu, ko uu ye ki ng'at `Kamuktaindet ne Toroor Musa.

¹⁰ Yeityo konam `Musa mwaita ne ki ilse ak koiil koot kobooto tuguuk tugul che ki miitei ko, ak kotabaan.

¹¹ Ki ise mwaiata kapkorosuut konyil tisap, ak koiil kapkorosuut, tuguukyik tugul, ak taabeet kobooto kelunnyi si kotabaan tuguuchooto.

¹² Kiroong'ji mwaita ne ki ilse metitap Aron ak koiil si kotabaan ineendet.

¹³ Ki imut `Musa weeriigap Aron ak kolaakyi ngoroik che kooen. Kiratyi icheek mosibisyek ak kolakyi metowekwak chepkuloik che mengeechen, ko uu ye ki ng'at `Kamuktaindet ne Toroor Musa.

¹⁴ Kingo pata, koget kirgit ne po kagoochinetap tengekto ak ki igonoor Aron ak weeriikyik eunekwak metitap kirgooto po kagoochinetap tengekto.

¹⁵ Ki eeny `Musa kirgooto ak kotaach korotiik, yeityo koile korotichooto kuinoigap kaptisisyet eng' mornennyi. Ki ianyiny kaptisisyet, ak kotumji korotiik kaptisisyet keel ak kotabaan, koyai tisiisyet agobo nooto.

¹⁶ Kibut `Musa mwanik tugul che po moo ak kwambelelyet ne miitei kooet, soromok tuwai ak mwanikwak, ak kobeel chooto eng' kaptisisyet.

¹⁷ Ki peel kirgit kobooto muitonyi, panyeekyik ak eiyandennyi eng' saang'utap nganaseet, ko uu ye ki ng'at `Kamuktaindet ne Toroor Musa.

¹⁸ Ki kweri mengitap kagoochinet ne kibeelei, ak kogonoor Aron ak weeriikyik eunekwak metitap mengoto.

¹⁹ Ki eeny ak koisee `Musa korotiik kaptisisyet komoswek tugul.

²⁰ Kitil `Musa mengoto kosach, yeityo kobeel metit kobooto kebeberwechooto ak mwanik.

²¹ Ki iun eng' peek tuguugap moo ak keelyek, ak kobeel mengoto komugul eng' kaptisisyet. Ki kagoochinet nooto ne kibeelei koek nyamdutyet ne anyiny, kagoochinet ne kigoochin Kamuktaindet ne Toroor kobun maat, ko uu ye ki ng'at `Kamuktaindet ne Toroor Musa.

²² Ki kweri mengitap aeng', mengit ne po poisyetap katabaanet ak ki igonoor Aron ak weeriikyik eunekwak metitap mengoto.

²³ Ki eeny `Musa mengoto ak kotaach korotiik, ak koilee walitap ititap tai ne po Aron, mornet ne oo ne po eunnyi ne po tai ak mornet ne oo ne po keldanyi ne po tai.

²⁴ Ki imut `Musa kora weeriigap Aron ak konde korotiik walitap itiikwak che po tai, morik che eecheen che po eunekwak che po tai, ak morik che eecheen che po keelyekwak che po tai. Ki ise `Musa korotiik kaptisisyet komoswek tugul.

²⁵ Kibut mwanik, konem saruryet, sunetik tugul che po moo, kwambelelyetap kooet, soromok tuwai ak mwanikwak, ak chaatit ne po komostap tai.

²⁶ Ki inem magatyat agenge ne ming'in ne ma kinde mermereek, magatyat ne ming'in ne ko ki ilee mwaita, ak magatyat agenge ne terter eng' ateruut ne po magatiinik che ma kinde mermereek ne ki miitei taitap Kamuktaindet ne Toroor, ak kogonoor chooto mwaita parak ak eng' chaatit parak ne po tai.

²⁷ Ki inde chooto tugul eunegap Aron ak eunegap weeriikyik, ak koongoi eng' taitap Kamuktaindet ne Toroor koek kagoochinet ne kiongoi.

²⁸ Ki inem `Musa tuguuchooto eng' eunekwak ak koip kobeel eng' kaptisisyet eng' paragutap kagoochinet ne kibeelei. Ki ek che itabaanatiin, koek nyamdutyet ne anyiny. Ki kagoochinet kobun maat, ne kigoochin Kamuktaindet ne Toroor.

²⁹ Ki ip `Musa tagateet ak koongoi koek kagoochinet ne kiongoi eng' taitap Kamuktaindet ne Toroor. Ki kebebertap Musa nooto eng' mengoto po poisyetap katabaanet, ko uu ye ki ng'at `Kamuktaindet ne Toroor Musa.

³⁰ Ki inem Musa kebebertap mwaata ki ilse ak kebebertap korotiik che ki mi kaptisisyet ak koisee Aron ak ngoroikyik, ak weeriikyik ak ngoroikwak. Ki ianyiny Aron ak ngoroikyik, weeriikyik ak ngoroikwak.

³¹ Ki leenji `Musa Aron ak weeriikyik, “Oyoi panyeek eng' kurgeetap emait ne kituiyechin, ak oam eng' olooto kobooto magatiinik che mi ateruut ne ki kitabaanji poisyetap katabaanet, ko uu ye ki ang'at, ale, ‘Amei Aron ak weeriikyik.’

³² Obeel eng' ma panyeek ak magatiinik che kang'et.

³³ Momandoi eng' kurgeetap emait ne kituiyechin eng' peetuusyek tisap agoi kosulda peetuusyekwok che kitabaananenok, amu ibei peetuusyek tisap katabaaneng'wong'.

³⁴ Tuguuk che kageyai rani, ko uu nooto kagong'at Kamuktaindet ne Toroor keyai, si keyai tisiisyet agobo okweek.

³⁵ Otebee kurgeetap emait ne kituiyechin peetuusyek tisap, peet ak kemoi oriibe katigonutigap Kamuktaindet ne Toroor si mobegu amu ko uu nooto, ko kaging'ata.”

³⁶ Ki yai anyun Aron ak weeriikyik tuguuk tugul che ki ng'at Kamuktaindet ne Toroor kobun Musa.