ATEPTAP LAWIK 7 - BUKUIT NE TILIIL Sireet ne Dutero Kanon

Kagoochinet agobo Chalwok

¹ “Ni ng'atuutyet agobo kagoochinetap chalwok. Tiliil niito miising'.

² Ki eng'e kagoochinet agobo chalwok ole kieng'e kagoochinet ne kibeelei, ak keise korotiikyik kaptisisyet komoswek tugul.

³ Igoitoi tisiindet eng' panyechooto mwanikyik tugul; cho po saruryet, mwanik che ki ilaach moet,

⁴ soromok tuwai ak mwanik che ki ilaach soromochooto che mi ole neegitee kipkitit ak kwambelelyet ne miitei kooet kobooto soromok.

⁵ Peelei tisiindet chooto eng' kaptisisyet koek kagoochinet ne kigoochin Kamuktaindet ne Toroor kobun maat. Niito kagoochinetap chalwok.

⁶ Amei mureno age tugul eng' tisiik panyechooto; ki amei eng' komosta ne tiliil. Tiliil niito miising'.

⁷ Uu kagoochinetap tengek kagoochinetap chalwok, agenge ng'atuutyennywa. Punjin chooto tisiindet ne tisiisyei agobo tuguuchooto.

⁸ Tisiindet ne igoitoi kagoochinet ne kibeelei ne po chii age tugul, kobunjiin ineendet muitap kagoochinonooto kibeelei.

⁹ Punjin tisiindet ne igoitoi kagoochinet. Punjin ineendet kagoochinet age tugul ne po peek che kibeelei eng' ma ak che kigelei eng' taabeet ak che kigelei eng' kirambenit.

¹⁰ Kagoochinet age tugul ne po peek, ne kiburuktoi mwai anan ko yaamaat, ko punjin weeriigap Aron tugul ak pcheei icheek koaechin.

Ng'atuutigap tiseiywegap kaalyeet

¹¹ “Ni ng'atuutyetap tiseiywotap kagoochinoik agobo kaalyeet ne igoochin `chii Kamuktaindet ne Toroor.

¹² Ngo koitoi chii kagoitoet agobo kongoi, kogoitoi kobooto magatiinik che mengeechen che ma kinde mermereek ak kekwang'da mwaita, magatiinik che tertereen che ma kinde mermereek che ka ki ilee mwaita, ak magatinigap peek che ng'ootiin che tambulul che ka kikwang'da mwaita si kotangusitu.

¹³ Igoitoi kagoochinennyi kobooto magatiinik che mengeechen che kaginde mermereek, kobooto tiseiywotap kagoochinoikyik che po kaalyeet agobo kongoi.

¹⁴ Igoitoi magatyat agenge eng' chooto kobun kagoochinet age tugul, koek kagoochinet ne kitoroore Kamuktaindet ne Toroor, punjin magatyandanooto tisiindet ne piitee korotiigap kagoochinoigap kaalyeet.

¹⁵ Ki amei panyeegap tiseiywot ne po kagoochinet agobo kaalyeet eng' peetuunooto kegoitoi, mat ketuuch agot kitigin kot koeekyi.

¹⁶ Ago, ngo kagoochinetap kongoi, anan kagoochinet eng' chameet, keamei eng' peetuunooto ka kigoitoi, ak keamei eng' peetuutap aeng' che kong'et eng' chooto.

¹⁷ Ago che kong'etune panyeegap tiseiywot kot koit peetuutap somok, kebeelei eng' ma.

¹⁸ Ngot koam chii panyeegap tiseiywot ne po kagoochinet agobo kaalyeet eng' peetuutap somok koma iyanaat ak ma ki ityin ineendet ne igoitoi. Ki iti keele kagong'wanit ak ibei tengektanyi chiito ne amei chooto.

¹⁹ “Ma ki amei panyeek che katiiny kiy age tugul ne ng'waan; kibeelei eng' ma. Ak panyeek tugul che ma twa kiy, ko amei chii age tugul ne tiliil.

²⁰ Ago chii ne amei panyeegap tiseiywotap kagoochinoigap kaalyeet che po Kamuktaindet ne Toroor kotinyei murwoonindo, king'etoi chiichooto eng' piikyik.

²¹ Ye katiiny chii age tugul kiy ne ng'waan, ngo murwoonindap chii, anan tyony ne ng'waan, anan kiy age tugul ne ng'waan, yeityo koam panyeegap tiseiywotap kagoochinoigap kaalyeet che po Kamuktaindet ne Toroor, king'etoi chiichooto eng' piikyik.”

²² Ki ng'alaalji `Kamuktaindet ne Toroor Musa koleenji,

²³ “Mwachi piigap Israel ileenji, ‘Amat oam mwanik alak tugul che po kiruk anan keechiir anan ko ng'oroor.’

²⁴ Kimuuchi keboisyee eng' poisyon alak mwaitap ne kameei ineegei anan ko mwaitap ne katon tyong'in, ago amat oam.

²⁵ Ngot koam chii age tugul mwaitap tyony ne igoitoi piik koek kagoochinet ne kigoochin Kamuktaindet ne Toroor kobun maat, king'etoi eng' piikyik.

²⁶ Amat oam korotiik alak tugul, ngo che po toriit anan che po tyony eng' meng'otosyekwok ui tugul.

²⁷ King'etoi eng' piikyik chii age tugul ne amei korotiik.”

²⁸ Ki ng'alaalji `Kamuktaindet ne Toroor Musa koleenji,

²⁹ “Mwachi piigap Israel ileenji: ‘Ineendet ne igoitoi tiseiywotap kagoochinoikyik che po kaalyeet kogoochin Kamuktaindet ne Toroor, koipchin ineendet kagoochinennyi Kamuktaindet ne Toroor.’

³⁰ Ibu ineendet eng' eunekyik kagoochinoigap Kamuktaindet ne Toroor kobun maat. Ibu mwanik kobooto tagateet si keongoi tagateet koek kagoochinet ne kiongoi eng' taitap Kamuktaindet ne Toroor.

³¹ Peelei tisiindet mwanik eng' kaptisisyet, ak punjin Aron ak weeriikyik tagateet.

³² Ogoochi tisiindet chaatit ne po komostap tai koek kagoochinet ne punu tiseiywegap kagoochinoikwok che po kaalyeet.

³³ Ineendet eng' weeriigap Aron ne igoitoi korotiigap kagoochinoigap kaalyeet ak mwanik, ko ibei chaatit ne po komostap tai koek kebebertanyi.

³⁴ Kaataach eng' piigap Israel kagoochinetap tagateet ne kiongoi, ak kagoochinetap chaatit kobunu tiseiywek che po kagoochinoikwak che po kaalyeet. Kaagoochi Aron tisiindet ak weeriikyik tuguuchooto, kobunu piigap Israel koek ng'atuutyet ne wendi agoi koigeny.

³⁵ Niito kebebertap Aron ak weeriikyik che punu kagoochinoik che kigoochin Kamuktaindet ne Toroor, kobun maat. Ki kitabaanji icheek kong'etee peetuut ne ki kindoi koboisyechi Kamuktaindet ne Toroor eng' tisiisyet.

³⁶ Chuuto che ki ng'at Kamuktaindet ne Toroor kole kigoochi icheek ko kagiil, koek kebebertanywa eng' piigap Israel agoi koigeny eng' ibinwekwak tugul.”

³⁷ Chuuto ng'atuutigap kagoochinet ne kibeelei, kagoochinetap peek, kagoochinetap tengek, kagoochinetap chalwok, ne po katabaanet ak ne po tiseiywotap kagoochinoik che po kaalyeet,

³⁸ che ki ng'at `Kamuktaindet ne Toroor Musa eng' tulweetap Sinai eng' peetuut ye king'atei ineendet piigap Israel kole kogoochi Kamuktaindet ne Toroor kagoochinoikwak, eng' surkwen ne po Sinai.