ATEPTAP LAWIK 6 - BUKUIT NE TILIIL Sireet ne Dutero Kanon

Kiboorchin tisiik ole peeldoi tiseiywek

¹ Ki ng'alaalji `Kamuktaindet ne Toroor Musa koleenji,

² “Ngo yai chii age tugul tengek, koleelji Kamuktaindet ne Toroor amu kaiberber chiitap kokwennyi eng' tuguuk che kigoochin kogonor, anan eng' kamanisyet, anan eng' rebisyet, anan ngo sastae chiitap kokwennyi,

³ anan ngo nyoor kiy ne ki pet ak komwa lembech, anan koyasyo eng' lembech, anan ngo yai chii age tugul eng' chuuto, koyaei tengek.

⁴ Ngo kagoyai chii anyun tengek ak konam ineendet lelutyet, koweektoi nooto kirep anan kiy ne ki ip eng' sastaet, anan kiy ne ki kigoochi kogonor, anan kiy ne kinyoor ne kiga kobet,

⁵ anan kiy age tugul ne ki iyasyo eng' lembech agobo kioto. Ingoweekta kogeesta ak kotesyi kebeberta agenge eng' muut, kogoochi chiitap ko po tuguuchooto eng' peetuunooto namei lelutyet.

⁶ Ye ibata nooto, kogetyi tisiindet mengit ne libwoop ne punu akweetap keechiirek, asi kogoochi Kamuktaindet ne Toroor koek kagoochineennyi ne po chalwokto, ko uu kaamanutyet ne irogendochin koek kagoochinetap chalwok.

⁷ Yae tisiindet tisiisyet agobo ineendet eng' taitap Kamuktaindet ne Toroor, ak kenyochin kaat eng' kiy age tugul ne koyaei si konamei lelutyet.”

⁸ Ki ng'alaalji `Kamuktaindet ne Toroor Musa koleenji,

⁹ “Ng'at Aron ak weeriikyik ileenji: ni ng'atuutyetap kagoochinet ne kibeelei; ingotebee ma eng' kaptisisyet kagoochinonooto kigoitoi kebeel kemout komugul agoi koeech, ak ingolal maatap kaptisisyet agoi.

¹⁰ Ingolaach tisiindet ngoryennyi ne po tisiisyet, ak ingolaach ngoroigap kaptisisyet che po oriit, ak koram oreegap maat ne kagibeele kagoochinet eng' kaptisisyet, ak konde ole neegitee kaptisisyet.

¹¹ Yeityo koreek ngoroikyik ak kolaach ngoroik alak, ak koip oreek komanda koba ole-tiliil eng' saang'utap nganaseet.

¹² Kiriibei maat ne mi kaptisisyet si ma me, lalei agoi, ak iywokyin tisiindet kweenik ma karonet age tugul ak kotet komyee kagoochinet ne kibeelei eng' paragutap tuguuchooto, ak yeityo kobeel eng' olooto mwanigap kagoochinoigap kaalyeet.

¹³ Ingoriip maat kolal kotugul eng' kaptisisyet, amat kemeto kome.”

¹⁴ “Ni ko ng'atuutyetap kagoochinetap peek; igoitoi weeriigap Aron eng' taitap Kamuktaindet ne Toroor, eng' tai ne po kaptisisyonooto.

¹⁵ Kimuguti konyi euut eng' peek che ng'ootiin che tambulul che po kagoochinetap peek ak eng' mwanik kobooto tuguuk che nyamdut tugul che miitei kagoochinetap peek parak, yeityo kobeel eng' kaptisisyonooto koek nyamdutyet ne anyiny ak koek nooto kabwaatet eng' Kamuktaindet ne Toroor.

¹⁶ Amei Aron ak weeriikyik che kong'etune chooto. Kiamei ama kinde mermereek eng' komosta ne tiliil; amei eng' seremutap emait ne kituiyechin.

¹⁷ Ma kibeelei kobooto mermereek; kaagoite nooto koek kebebertanywa eng' kagoochinoikyuk kobun maat; tiliil niito miising'; uu kagoochinetap tengekto, ak uu kagoochinetap chalwok.

¹⁸ Amei chooto age tugul ne muren eng' lagogap Aron ak koek nooto ng'atuutyet ne po agoi eng' ibinwekwok eng' kagoochinoigap Kamuktaindet ne Toroor che kigoochin kobun maat. Kiy age tugul ne tiinyei ko tiliilitu.”

¹⁹ Ki ng'alaalji `Kamuktaindet ne Toroor Musa koleenji,

²⁰ “Ni kagoochinetap Aron ak weeriikyik, ne igoochin Kamuktaindet ne Toroor eng' peetuut ne ki ili ineendet. Egu niito kagoochinet ne po kotugul; keruutyet agenge ne po peek che ng'ootiin che tambulul kigoitoi kebeberta age karon ak kigoito niin age koskoleny.

²¹ Kibeelei kobooto mwaita eng' kirambenit, ak ye kagotuiyo komyee ak mwaita, iibu konyo ko. Igoite kagoochinetap peek che kagebeel ketonaton koek nyamdutyet ne anyiny eng' Kamuktaindet ne Toroor.

²² Ko uu nooto, kogoitoi kagoochinonooto tisiindet ne ki kiil eng' weeriikyik kogeer ineendet. Kibeeljin Kamuktaindet ne Toroor tugul kigesyin ko uu eng' ng'atuutyet ne wendi agoi koigeny.

²³ Kibeelei kogeskei kagoochinet age tugul ne po peegap tisiindet; ma ki amei.”

²⁴ Ki ng'alaalji `Kamuktaindet ne Toroor Musa koleenji,

²⁵ “Mwachi Aron ak weeriikyik ileenji, ni ng'atuutyet ne po kagoochinetap tengekto: kieng'e kagoochinetap tengekto taitap Kamuktaindet ne Toroor, eng' ole kieng'e kagoochinet ne kibeelei; Tiliil nooto miising'.

²⁶ Tisiindet ne igoitoi kagoochinetap tengek ko amei kebeber eng' nooto. Ki amei eng' komosta ne itabaanat eng' seremutap emait ne kituiyechin.

²⁷ Tiliilitu kiy age tugul ne tiinyei panyechooto. Ngosachi korotiigap kioto ngor age tugul, imwet ngoryonooto anyun eng' komosta ne tiliil.

²⁸ Kituei tereet ne kagiyoe panyechooto. Ngo kagiyoe tereetap sugunwet, kesitei ak kechurukta eng' peek.

²⁹ Amei age tugul ne muren eng' tisiik, panyechooto; tiliil niito miising'.

³⁰ Ma ki amei kagoochinet age tugul ne po tengek ne kagiip korotiikyik kobwa emait ne kituiyechin keyaei kagaigaet eng' ole-tiliil; kibeelei eng' ma.”