ATEPTAP LAWIK 5 - BUKUIT NE TILIIL Sireet ne Dutero Kanon

Kagoochinetap tengekto

¹ “Ngo yai chii age tugul tengek, amu kagas ng'olyootap kayasyoet ak koek paoryat; ngo ki keer anan konai ama kong'aany, koibei anyun tengektanyi.

² Anan ngo twa chii age tugul kiy age tugul ne ng'waan ne kame, anan panyeegap tyong'igap timiin che ng'woneen anan panyeegap tuuga ak tuguuk che ichuutegei ng'wony che ng'woneen, nganda kaung'ak eng' ineendet, komurwoniitu, ak namei ineendet anyun tengekto.

³ Anan ngo twa murwoonindap chii, murwoonindo age tugul ne imurwooni chii, nganda kaung'ak eng' ineendet, ko ye nai kioto konam anyun ineendet tengekto.

⁴ Anan ngo yosyo chii eng' kutinnyi kosartae, koyai kiy ne ya anan ne myee, kayasyoet age tugul ne iyastos chii kosartae, nganda ung'aat eng' ineendet, ko ye nai kioto konam ineendet anyun tengekto eng' age eng' tuguuchooto.

⁵ Ye kagonam chii age tugul tengekto eng' age eng' tuguuchooto, kong'aany anyun tengektanyi ne kogoyai,

⁶ ak koip kagoochinetap chalwoktanyi, koipchi Kamuktaindet ne Toroor amu tengektanyi ne kogoyai, subeendo ne punu akweet, ngo aarwetap keechiir anan ko ne po ng'oroor koek kagoochinetap tengekto; ak koyai tisiindet kagaigaet agobo ineendet amu tengektanyi.

⁷ “Ago ngo ma imuuchi koal aarwet ne punu akweet, koip anyun cheptugenik aeng' anan ko aarek aeng' che po toriitik, koipchi Kamuktaindet ne Toroor koek kagoochinennyi ne po chalwogoto kogoyai. Po age kagoochinetap tengekto, ko po age kagoochinet ne kibeelei.

⁸ Ingoipchi chooto tisiindet, ne igoitoi korook kagoochinet ne po tengekto. Iinyi kaatit ago mapcheune aeng',

⁹ ak koisee korotiigap kagoochinetap tengekto tabandap kaptisisyet, ak kosochi korotiik che kang'et kaptisisyet keel. Niito kagoochinetap tengekto.

¹⁰ Yeityo kogoito ne po aeng' koek kagoochinet ne kibeelei, ko uu ye ki king'at, ak koyai tisiindet kagaigaet agobo ineendet amu tengektanyi ne kogoyai, ak kenyochigaat.

¹¹ “Ago ngo ma imuuchi koal cheptugenik aeng' anan ko aarek aeng' che po toriitik, koip anyun kagoochinennyi ne po tengektanyi ne kogoyai, koip keruutyet agenge ne po peek che ng'ootiin che tambulul koek kagoochinetap tengekto. Amat konde mwaita anan tuguuk che nyamdut, amu niito ko kagoochinetap tengekto.

¹² Ak koipchi tisiindet, si komugut tisiindonooto peechooto ng'ootiin konyi euut si koek kabwaatet ne po chooto ak kobeel eng' kaptisisyet, eng' paragutap kagoochinoigap Kamuktaindet ne Toroor che punei maat. Niito kagoochinetap tengekto.

¹³ Yaei anyun tisiindet kagaigaet agobo ineendet amu tengektanyi ne koyai eng' age tugul eng' chooto, ak kenyochigaat. Punjin tisiindet che kang'et koek kagoochinetap peek.”

¹⁴ Ki ng'alaalji `Kamuktaindet ne Toroor Musa koleenji,

¹⁵ “Ngo yai chii age tugul chalwokto, lelutyet ne koma kokwetyin, eng' tuguuk che itabaanatiin che po Kamuktaindet ne Toroor, kokwerichi anyun Kamuktaindet ne Toroor kagoochinetap chalwoktanyi, mengit ne libwoop eng' akweetap keechiirek, ne po kamanuutyet ne irogendochini eng' shekelisyek che po fedha, ko uu shekel ne po ole-tiliil. Nooto ko kagoochinetap chalwokto.

¹⁶ Igeeri nooto king'em, ne po kiit ne ki kitabaan ak kotesyi kebeberta agenge eng' muut, kogoochi tisiindet. Yaei tisiindet kagaigaet agobo ineendet eng' mengoto po kagoochinetap chalwokto, ak kenyochigaat.

¹⁷ “Ngo yai chii age tugul tengek ago nganda kama kongen, koyai kiy age tugul eng' tuguuchooto ki ng'at Kamuktaindet ne Toroor kole amat keyai, konamei anyun ineendet tengekto ui tugul, ak ibei tengektanyi.

¹⁸ Ketu anyun mengit ne libwoop ne punu akweetap keechiirek kogetyi tisiindet, ko uu kamanuutyet ne irogendochini, si koek kagoochinetap chalwokto. Yae tisiindet kagaigaet agobo ineendet amu lelutyet nooto ki yai ama eng' kwetyinet, ak kenyochigaat.

¹⁹ Niito kagoochinetap chalwokto; ki konam ineendet iman chalwokto eng' taitap Kamuktaindet ne Toroor.”