ATEPTAP LAWIK 4 - BUKUIT NE TILIIL Sireet ne Dutero Kanon

Kagoochinetap tengekto.

¹ Ki ng'alaalji `Kamuktaindet ne Toroor Musa koleenji,

² “Mwachi piigap Israel leenjin, Chu ng'atuutik agobo ye kayai chii age tugul tengek ama eng' kwetyinet, eng' kiy age tugul ne ki ng'at Kamuktaindet ne Toroor kole amat oyai:

³ Ngo yai tengekto tisiindet ne ki kiil kot koipchi piik ng'oogisto, ko ingogoito anyun kirgit ne neran ne libwoop kogoochi Kamuktaindet ne Toroor koek kagoochinetap tengektanyi ne kogoyai.

⁴ Ingoget kirgooto konyo kurgeetap emait ne kituiyechin eng' taitap Kamuktaindet ne Toroor ak kogonoor eunnyi metitap kirgooto, yeityo koeny eng' taitap Kamuktaindet ne Toroor.

⁵ Taachei tisiindet ne ki kiil korotiigap kirgooto ak koip kobwa oriit ne po emait ne kituiyechin,

⁶ yeityo korooch mornennyi korotiik ak koisisye korotichooto konyil tisap eng' taitap Kamuktaindet ne Toroor, eng' taitap angeet ne ioitos koot ne po ole-tiliil.

⁷ Ye ibata konde tisiindet alak eng' korotichooto kuinoigap kapkorosuut ne po nyamdutik che ng'uu ne anyiny che kibeelei eng' taitap Kamuktaindet ne Toroor, nooto mi emait ne kituiyechin. Ingotumji ineendet korotiik tugul che po kirgooto kaptisisyet keel ne kibeelee kagoochinoik, ne miitei kurgeetap emait ne kituiyechin.

⁸ Ingobut mwanik tugul che po kirgooto po kagoochinetap tengekto, mwanik che ki ilaach moet ak sunetik tugul che po moo,

⁹ kobooto soromok tuwai, mwanik che ki ilaach moet che mi ole neegitee sugulumdo ak kwambelelyet ne miitei kooet kobooto soromok.

¹⁰ Putei mwanichooto ko uu ye kibutei che po kirgit ne tiseiywotap kagoochinoigap kaalyeet. Yeityo kobeel tisiindet chooto eng' kaptisisyet ne kibeelee kagoochinoik.

¹¹ Ago muitap kirgooto ak panyeekyik tugul kobooto metinnyi, keelyekyik, tuguukyik po ke ak eiyandennyi,

¹² nooto kirgooto komugul, ko ingoip kwo komosta ne tiliil eng' saang'utap nganaseet ole kitumjin oreek ak kobeel eng' kweenik parak che mi ma. Kibeelee ole kitumjin oreek.

¹³ “Ngo lel tuiyet komugul ne po Israel ak koung'ak lelutyonooto eng' taitap tuiyet, ak ngo ki yai icheek kiy age tugul ne ki ng'at Kamuktaindet ne Toroor kole amat oyai, ko kagonam icheek tengekto.

¹⁴ Ye kagonaak lelutyonooto kayai, kogoitoi anyun tuiyet kirgit ne neran koek kagoochinet ne po tengekto, yeityo koget konyo taitap emait ne kituiyechin.

¹⁵ Ingogonoor poisyegap tuiyet eunekwak metitap kirgooto, yeityo kebar kirgooto eng' taitap Kamuktaindet ne Toroor.

¹⁶ Ye ibata koip tisiindet ne ki kiil korotiigap kirgooto kobwa oriit ne po emait ne kituiyechin,

¹⁷ ak korooch mornennyi korotiik ak koisisye eng' taitap Kamuktaindet ne Toroor konyil tisap, eng' taitap anganooto ki kioiye koot.

¹⁸ Yeityo konde korotichooto alak kuinoigap kapkorosuut ne miitei taitap Kamuktaindet ne Toroor eng' emait ne kituiyechin. Roong'jin korotiik tugul kelutap kaptisisyet ne kibeelee kagoochinoik ne miitei kurgeetap emait ne kituiyechin.

¹⁹ Putei mwanikyik tugul ak kobeel eng' kaptisisyet,

²⁰ ak koyachi kirgooto ko uu ye ki yachi kirgit ne po kagoochinetap tengekto. Eng' niito anyun koyae tisiindet kagaigaet agobo icheek ak kenyochigaat.

²¹ Ingola ineendet kirgit kwo saang'utap nganaseet ak kobeel ko uu ye kigabeel kirgit ne po tai. Niito ko kagoochinetap tengekto ne po tuiyet.

²² “Ye kalel pounindet, koyai ama nai kiy age tugul ne ki ng'at Kamuktaindet ne Toroor Kamuktaindennyi kole matkeyai, ak konam ineendet tengekto,

²³ ak ngiboorchi ineendet tengektanyi ne ki yai, koget kwesta ne libwoop kobunji kagoochinennyi.

²⁴ Ingogonoor eunnyi metitap kwesta ak koeeny eng' ole kieng'e kagoochinoik che kibeelei eng' taitap Kamuktaindet ne Toroor. Niito kagoochinetap tengekto.

²⁵ Yeityo konam tisiindet korotichooto po kagoochinetap tengekto, eng' mornennyi ak koiilate kuinoigap kaptisisyet ne po kagoochinoik che kibeelei ak koroong'ji korotiikyik kelutap kaptisisyet ne kibeelee kagoochinoik.

²⁶ Ak kobeel mwanikyik tugul eng' kaptisisyet, ko uu ye kiyachin mwanigap tiseiywot ne po kagoochinoigap kaalyeet. Yaei kagaigaet ko uu niito tisiindet agobo ineendet amu tengektanyi, ak kenyochigaat.

²⁷ “Ngo lel chii age tugul ne po tuiyet, kong'em kiy age tugul ne ki ng'at Kamuktaindet ne Toroor kole amat oyai, ak konam tengekto,

²⁸ ak ngiboorchi ineendet tengektanyi ne koyai, koget anyun ng'orooryet koek kagoochinennyi, iyuoget ne libwoop kobunji tengektanyi ne koyai.

²⁹ Yeityo kogonoor eunnyi metitap kagoochinonooto po tengekto ak koeeny eng' ye kigoitoe kagoochinoik che kibeelei.

³⁰ Ye ibata konam tisiindet korotiigap artanooto eng' mornennyi ak koiilate kuinoigap kaptisisyet ne po kagoochinoik che kibeelei, ak koroong'ji korotiik tugul che po artanooto kelutap kaptisisyet.

³¹ Ak kobut mwanikyik tugul ko uu ye kibutei mwanigap tiseiywot ne po kagoochinoigap kaalyeet. Yeityo kobeel tisiindet eng' kaptisisyet koek nyamdutyet ne anyiny eng' Kamuktaindet ne Toroor; ak koyai tisiindet kagaigaet agobo ineendet ak kenyochigaat.

³² “Ngo kagoochinennyi ne po tengekto ko keechiiryet, ko ingoget subeendo ne libwoop,

³³ ak kogonoor eunnyi metitap kagoochinonooto po tengekto, ak koeeny koek kagoochinetap tengekto eng' ole kieng'e kagoochinoik che kibeelei.

³⁴ Yeityo konam tisiindet korotichooto po kagoochinetap tengekto, eng' mornennyi, ak koiilate kuinoigap kaptisisyet ne po kagoochinoik che kibeelei, ak koroong'ji korotiikyik tugul kelutap kaptisisyet.

³⁵ Ak kobut mwanikyik tugul ko uu ye kibutei mwanigap keechiiryet ne po tiseiywotap kagoochinoigap kaalyeet. Ingobeel tisiindet chooto eng' kaptisisyet ak konde paragutap kagoochinoigap Kamuktaindet ne Toroor che punei maat. Eng' niito, koyaei tisiindet kagaigaet agobo ineendet amu tengektanyi ne koyai, ak kenyochigaat.”