ATEPTAP LAWIK 3 - BUKUIT NE TILIIL Sireet ne Dutero Kanon

Kagoochinoigap kaalyeet

¹ “Ngo kagoochinennyi ko tiseiywotap kaalyeet, ko ingogoitoi ne po tuuga; ngo kirgit anan ko rooryat, kogoitoi ne libwoop eng' taitap Kamuktaindet ne Toroor.

² Ye ibata kogonoor eunnyi metitap kagoochinennyi ak koeeny eng' kurgeetap emait ne kituiyechin, yeityo koisot tisiik weeriigap Aron kaptisisyet komoswek tugul eng' korotiik.

³ Igoitoi ineendet eng' tiseiywotap kaalyeet kagoochinet ne kigoochin Kamuktaindet ne Toroor kobunei maat: mwanik che ki ilaach moet ak sunetik tugul che po moo,

⁴ soromokyik tuwai kobooto mwanikwak, che mi ole neegitee sugulumdo ak kwambelelyet ne miitei kooet, ingoisto chooto kobooto soromok.

⁵ Yeityo kobeel weeriigap Aron chooto eng' kaptisisyet; ingonde paragutap tiseiywot ne kibeelei, ne mi kweenik che mi ma. Niito kagoochinet ne punei maat, nyamdutyet ne anyiny eng' Kamuktaindet ne Toroor.

⁶ “Ngo po neego kagoochinennyi ne po tiseiywotap kaalyeet ne ipchin Kamuktaindet ne Toroor; ngo mengit anan kwesta anan ko subeendo, kogoitoi ne libwoop.

⁷ Ngo koitoi mengit koek kagoochinennyi, kogoitoi eng' taitap Kamuktaindet ne Toroor,

⁸ ak kogonoor eunnyi metitap kagoochinennyi ak koeeny eng' taitap emait ne kituiyechin, yeityo koitos weeriigap Aron kaptisisyet komoswek tugul eng' korotiik.

⁹ Ngo koitoi che po tiseiywotap kaalyeet koek kagoochinet ne punei maat ne kigoochin Kamuktaindet ne Toroor, ko ingogoito mwanikyik ak saruryennyi komugul, kogatil kogees eng' kipkitit, ak mwanik che ki ilaach moet, ak sunetik tugul che po moo,

¹⁰ soromok tuwai, ak mwanik che ki ilaach soromochooto, che mi ole neegitee kipkitit, ak kwambelelyet ne miitei kooet, ingonem chooto kobooto soromok.

¹¹ Peelei chooto tisiindet eng' kaptisisyet koek amitwogigap kagoochinet ne kigoochin Kamuktaindet ne Toroor kobunei maat.

¹² “Ngo po ng'orooryet kagoochinennyi, kogoitoi anyun eng' taitap Kamuktaindet ne Toroor,

¹³ ak kogonoor eunnyi metitap ng'orooryanooto, yeityo koeeny eng' taitap emait ne kituiyechin, ak koisote weeriigap Aron kaptisisyet korotiik komoswek tugul.

¹⁴ Eng' chooto kogoochin `ineendet Kamuktaindet ne Toroor kagoochinet ne punei maat; mwanik che ki ilaach moet, sunetik tugul che po moo,

¹⁵ soromok tuwai ak mwanik che ki ilaach soromochooto che mi ole neegitee kipkitit ak kwambelelyet ne miitei kooet kobooto soromok.

¹⁶ Ak kobeel tisiindet chooto eng' kaptisisyet; amitwogigap kagoochinet chuuto, che punei maat, koek nyamdutyet ne anyiny. Po Kamuktaindet ne Toroor mwanik tugul.

¹⁷ Egu niito ng'atuutyet ne po agoi eng' ibinwekwok tugul eng' meng'otosyekwok tugul, ale amat oam mwanik ak korotiik.”