ATEPTAP LAWIK 27 - BUKUIT NE TILIIL Sireet ne Dutero Kanon

Konunoik che ki arortoi

¹ Ki ng'alaalji `Kamuktaindet ne Toroor Musa koleenji,

² “Mwachi piigap Israel leenjin icheek, Ye yaei chii kaarorunet, kogoito chii kobunji Kamuktaindet ne Toroor, ak komach kogoito alyetap kamanuutyetap chiichooto,

³ itaune kamanuutyeng'ung' ne irogendochini; murenik che po kong'etee kenyiisyek tiptem agoi che po kenyiisyek tamanwogik lo, ingoek kamanuutyeng'ung' ne irogendochini shekelisyek konom che po fedha, ko uu shekel ne po ole-tiliil.

⁴ Ak ngo kobogoryo, koegu kamanuutyeng'ung' shekelisyek sosom.

⁵ Ngo po kenyiisyek muut agoi kenyiisyek tiptem, koegu anyun kamanuutyeng'ung' shekelisyek tiptem eng' muren ak shekelisyek taman eng' kobogoryo.

⁶ Ngo po arawet agenge agoi kenyiisyek muut, koegu anyun kamanuutyeng'ung' shekelisyek muut che po fedha eng' muren, ak shekelisyek somok che po fedha eng' ne tye.

⁷ Ngo po kenyiisyek tamanwogik lo ak kwo tai, ngo muren koegu kamanuutyeng'ung' shekelisyek taman ak muut, ak kobogoryo koegu shekelisyek taman.

⁸ Ngo panan chiichooto kosiir kamanuutyeng'ung', kinde ineendet taitap tisiindet si komwa tisiindet che kimage; mwaei tisiindet che kimage chiichooto kayai kaarorunet ak kogoito ko uu kamugennyi.

⁹ “Ngogoito piik kagoochinet ne kigoochin Kamuktaindet ne Toroor, ngo ne po akweet, tugul che po chooto che igoochin chii Kamuktaindet ne Toroor, ko tiliileen.

¹⁰ Amat kowal chii, kowale ne ya ne myee, anan ne myee eng' ne ya; ago ngot kowal tuguuchooto po akweet, kowale `age age ko tiliileen tuwai, nooto ak ne kiwale.

¹¹ “Ngo tyony age tugul ne ng'waan, ne ma kigoitoi koek kagoochinet ne po Kamuktaindet ne Toroor, konde anyun tyonyooto taitap tisiindet,

¹² koiit tisiindet anyun ole tee, ngo myee anan ngo ya, ko uu ye kaiit tisiindet, kotebyei ko uu nooto.

¹³ Ago ngo machei iman kotyach tyonyooto, kotesyi anyun kamanuutyennyi kebeberta agenge eng' muut.

¹⁴ “Ye itabaani chii koonnyi koek ne tiliil eng' Kamuktaindet ne Toroor, koiit anyun tisiindet kogeer ngo myee anan ngo ya. Ko uu ye kaiit tisiindet, kotep ko uu nooto.

¹⁵ Ngo machei kotyach koonnyi chiichooto koitabaani, kotes anyun kebeberta agenge eng' muut ne po kamanuutyeng'ung', si kobunji ineendet koot.

¹⁶ “Ngo tabaanji chii Kamuktaindet ne Toroor kebebertap mbareennyi, kotenitu anyun kamanuutyeng'ung' kolsetap mbaranooto; ki iti kolsetap homer agenge ne po baale eng' shekelisyek konom che po fedha.

¹⁷ Ngo tabaan mbareennyi kobooch kenyiitap jubilii, kotebyei ko uu kamanuutyeng'ung' ne irogendochini.

¹⁸ Ago ngo tabaan ineendet mbareennyi ko kagosiirto jubilii, koiti tisiindet anyun ineendet silingisyek ko uu kenyiisyek che kang'et agoi koit kenyiitap jubilii, ak keetil eng' kamanuutyeng'ung'.

¹⁹ Ak ngo tyach iman mbareet ineendet ne ki itabaani, kotesyi anyun kebeberta agenge eng' muut ne po kamanuutyeng'ung' ne irogendochini, ak kobunji ineendet iman.

²⁰ Ago ngo ma ityaach ineendet mbaranooto, anan ngo ki koaldochi chiito age mbaranooto, koma kityaachi agoi.

²¹ Tiliilitu mbaranooto eng' Kamuktaindet ne Toroor, ye mandoi eng' jubilii, ko uu mbareet ne ki kitabaan; punjin tisiindet.

²² “Ngo tabaanji chii Kamuktaindet ne Toroor mbareet ne ki koal, ne ma mbareet ne ki nenyi,

²³ koiityi anyun tisiindet ineendet ole tenitu kamanuutyetap mbaranooto agoi kenyiitap jubilii, ak kogoon ineendet eng' peetuunooto kamanuutyet, koek kiy ne ki kitabaanji Kamuktaindet ne Toroor.

²⁴ Kiweekyin mbaranooto chiito ne ki kiale eng' kenyiitap jubilii, ineendet ne ki nenyi mbareet.

²⁵ Ak uu kamanuutiguk tugul shekelisyek che po ole-tiliil: tinyei shekel agenge gerahisyek tiptem.

²⁶ “Che kitwatei eng' che kiyagi, che ki kiyai koek che po kiboretook che punjin Kamuktaindet ne Toroor, chooto icheegei che ma itabaani chii; po Kamuktaindet ne Toroor ne kirgit anan ne keechiiryet.

²⁷ Ngo po tyong'ik che ng'woneen, kotyach anyun ineendet ko uu kamanuutyet ne irogendochini, ak kotesyi kebeberta agenge eng' muut ne po nooto. Ngo ma kityaachi kealdoi ko uu kamanuutyeng'ung'.

²⁸ “Ago ma ki aldoi, ama kityaachi kiit ne itabaanat ne itabaanjin chii Kamuktaindet ne Toroor eng' tuguukyik tugul che tinyei, ngo po chii anan tyony, anan ne po mbareet ne nenyi. Tiliil miising' eng' Kamuktaindet ne Toroor kiy age tugul ne kitabaani.

²⁹ Ma kityaachi chii tugul ne kagi tabaanji ng'emisyet, ne itabaani piik; kibarei nooto iman.

³⁰ “Po Kamuktaindet ne Toroor kebeberwegap taman che po emet, ngo kesweek che po emet anan logoegap keetiik; itabaanatiin eng' Kamuktaindet ne Toroor.

³¹ Ngo machei chii kotyach alak eng' kebebertanyi ne po taman, kotes kebeberta agenge eng' muut.

³² Kebeberwek tugul che po taman che po tuuga anan neego, age tugul ne punei kurereetap kirokto kitabaanji Kamuktaindet ne Toroor, ne po taman eng' chooto.

³³ Amat kogilgilye ngo myee anan ngo ya, amat kowal; ak ngot kowal, kobunji Kamuktaindet ne Toroor tuwai, nooto ak ne kiwale; ama kityaachi.”

³⁴ Chuuto anyun ng'atuutik che ki ng'at `Kamuktaindet ne Toroor Musa agobo piigap Israel eng' tulweetap Sinai.