ATEPTAP LAWIK 26 - BUKUIT NE TILIIL Sireet ne Dutero Kanon

Kaberuuret ne punu Kasetap iit

¹ “Amat koyachigei tuguuk che ma tilei kiy, amat olumdochigei kanamwet ne ki kiwai, anan toloita, amat onde koita ne ki kiwai eng' emeng'wong', ogutung'ji. Amu aa Kamuktaindet ne Toroor Kamuktaindeng'wong'.

² Oriip sabatosyekyuk, ak ogonyit koonnyu ne tiliil. Aa Kamuktaindet ne Toroor.

³ “Ngo pendate kaneetisyosyekyuk ak oriip ng'atuutikyuk, ak oyai,

⁴ agoonok anyun ropta eng' peetuusyekyik, ak koii emet, ak koii keetiigap mbar logoekwak.

⁵ Yamei kesuutik che obore, agoi koit ruroteetap keetiigap logoek, ak itei ruroteetap logoek koolset. Ak oam amitwogikwok kot obiye, ak omeny emeng'wong' eng' kaalyeet.

⁶ Ak agoonu kaalyeet eng' emet ak oruiye, ama piitu ne imuok. Abeeti tyong'ik eng' emeng'wong', ama punei emeng'wong' rotwetap chok.

⁷ Oone puunikwok ak kobutyo eng' taing'wong' eng' rotwetap chok.

⁸ Oonei piikwok muutu piik pogol, ak koon piikwok pogolu eliphuusyek taman. Ibutos eng' rotwetap chok eng' taing'wong' puunikwok.

⁹ Atokyinok agane togeennyu ak agoonok iyoteet, atesak ak agimiit kayomisennyu kobootok.

¹⁰ Oam anyun tuguuk che konorotiin che po keny, ak omoong'u che po keny si kobiit ole ondoi che ogese.

¹¹ Ak ande koonnyu kwenung'wong', ama wechok saboondanyu.

¹² Awendotee kwenung'wong' ak aegu Kamuktaindeng'wong', ak oegu piikyuk.

¹³ Aa Kamuktaindet ne Toroor Kamuktaindeng'wong', ne ki amutwak omong'u eng' emetap Misiri, si mata oegu otwogikwak. Ak ki airii keetiigap choging'wong' ak ang'eetak obe komyee.

Kergong'yet agobo pistoet

¹⁴ “Ago ngo mogasa iit, amoyai ng'atuutichooto tugul,

¹⁵ ak ngot oeesye kaneetisyosyekyuk, ak kowech saboonwekwok kirwoogutikyuk, kot ko moyai ng'atuutikyuk tugul, obut kayomisennyu,

¹⁶ ayaiywok ni agane: ang'ate kamuiset konyonjok, chebuonit ak eseet, che ng'emei koonyek, ak kogoochi saboondo kosagit. Ogoole kesweekwok puch, amu amei puunikwok.

¹⁷ Aboorwok nereegekyuk, ak kebaraak eng' taitap puunikwok. Poiywok che wechok, ak omwei ko maonok chii.

¹⁸ Ago ngo mogasa iit eng' tuguuchuuto, abirok anyun konyil tisap kosiir amu tengekwogikwok.

¹⁹ Airie anyun menoteetap kimnateng'ung', ak ayai kipsengwet neng'wong' koigei karnet ak koigei emeng'wong' sugunwet.

²⁰ Oboisyee puch kimnateeng'wong', amu ma koonu emeng'wong' rurateet, ak ma iitos keetiigap emet logoekwak.

²¹ “Ngo testai oeesya, amogasa iit, aibwok korotwek konyil tisap kosiir, ko uu tengekwogikwok.

²² Ayoogu tyong'ik che po timiin kobwa kwenung'wong', che pwoonei korebenok lagokwok ak kobar tuukwok; ak koyaak ong'ering'itu ak koek kipkuberet ortinwekwok.

²³ “Ngot ko amu kergong'yani komocham owekyogei, ago ngot otestai oeesya,

²⁴ aeesyok anyun ak okweek ak abirok anyun aneendet konyil tisap amu tengekwogikwok.

²⁵ Aibwok rotwetap chok ne yaakwok mugetuut ne po kayomiset. Ye oyumjigei nganasookwok, ayookwok koroito konyo kweng'wong' ak kindeak eunegap puunikwok.

²⁶ Ye atil amitwogikwok kong'ering'itu, kobeel anyun kobogorisyek tamanu amitwogikwok eng' kapkoimaut agenge, ak kebimanwak amitwogikwok eng' ratilit. Oamisyei amobiyonyi.

²⁷ “Ak ngo mogasa iit eng' tuguuchu tugul, ago otila let,

²⁸ atilok let anyun eng' pandanyu eng' nereegek che pichiien, ak abirok agane konyil tisap amu tengekwogikwok.

²⁹ Ak oam panyeegap poorwegap weeriikwok ak che po tiibiikwok.

³⁰ Ang'eme awong'u komoswekwok che torooreen ak aluul kanamonikwok che po asiista, ak awirchi muuswekwok ole mi muuswegap kanamonikwok, ak kowechok saboondanyu.

³¹ Ayae nganasookwok koek karotwek, ak ayai oldinwekwok che tiliileen koek kipkuberet, ma achame kong'ucha anyinyindap nyamdutikwok.

³² Ak ayai emet koek surkwen ak kokwong'yo puunikwok che menyei olooto.

³³ Ak aiyestochok pororyosyek alak, ak ang'usu rotwetap chok kosubok. Koguber anyun emeng'wong', ak koek karotwek nganasookwok.

³⁴ “Yeityo kobaibaitune anyun emet sabatoisyekyik, eng' peetuusyechooto ko kuberot, omi emetap puunikwok; komuuny anyun emet, ak kobaibait eng' sabatoisyekyik.

³⁵ Imuunyi emet kota ko kuberot, eng' kamuung'onooto ki ma nyoor eng' sabatosyekwok, ye ki omenye olooto.

³⁶ Ak eng' icheeget che ng'etu eng' okweek, ayookyini mugulelwekwak kaiyweisyet eng' emotinwegap puunikwak, ak koon icheek cheetap sogoot ne ibei usoonet, ak komwei icheek ko uu chii ne mwee rotwetap chok, ak kobutyoti ye maonei chii.

³⁷ Koriichkei icheegei eng' icheegei, ko uu eng' taitap rotwetap chok, ye ma mi ne oonei. Monyooru anyun kimnateet ne otononie eng' taitap puunikwok.

³⁸ Eng' let olusyi pororyosyek ak koluguak emetap puunikwok.

³⁹ Ak ichuchui che ng'etu eng' okweek eng' tengekwogikwak eng' emotinwegap puunikwok; ak kogeny amu tengekwogigap kwanisyekwak kochuchui ko uu icheek.

⁴⁰ “Ago ngot kong'aany tengekwogikwak, ak che po kwanisyekwak eng' kachiliilutikwak che ki yaiywo icheek, ak kogeny amu kitila let,

⁴¹ ak ki atil let agane icheek, ak amutu icheek kobwa emetap puunikwak. Ngo ming'ingei anyun mugulelwekwak che ma imuratanotiin ak kotaach piretap tengekwogikwak,

⁴² abwaat anyun kayomisennyu ne ki ayomisyi Jakobo; kayomisennyu agine ne kayomisyi Isak ak abwaat agine kayomisennyu ne ki ayomisyi Abraham, ak abwaat emet.

⁴³ “Ak kometo icheek emet ak kobaibait eng' sabatoisyekyik, ye tebyei emonooto ko kuberot koma mi icheek, ak kotaach piretap tengekwogikwak, amu ki eesyo kirwoogutikyuk, ak ki wech saboonwekwak kaneetisyosyekyuk.

⁴⁴ Agot nganda uu chooto tugul, ye mi emetap puunikwak, koma eesyoi icheek, amaweche, amang'eme awong'u ak ma pute kayomisennyu kobooto icheek. Amu aa Kamuktaindet ne Toroor Kamuktaindennywa.

⁴⁵ Ago abwaati amu icheek kayomiset ne ki ayomisyi poisyekwak che ki among'u eng' emetap Misiri kogeeronu pororyosyek, si aek Kamuktaindennywa. Aa Kamuktaindet ne Toroor.”

⁴⁶ Chu anyun kaneetisyosyek ak kirwoogutik ak ng'atuutik che ki yai Kamuktaindet ne Toroor ak piigap Israel eng' tulweetap Sinai eng' Musa.