ATEPTAP LAWIK 25 - BUKUIT NE TILIIL Sireet ne Dutero Kanon

Kenyiitap Sabato

¹ Ki ng'alaalji `Kamuktaindet ne Toroor Musa eng' tulweetap Sinai koleenji,

² “Mwachi piigap Israel leenjin, Ye oit emet ne agoonok, koriip anyun `emet sabato agobo Kamuktaindet ne Toroor.

³ Igoole mbareeng'ung' ne po sabibuk kenyiisyek lo, ak isabor keetiigap logoeguk eng' kenyiisyek lo, ak iyum ruratennyi kobwa kaa;

⁴ ago egu sabato eng' kenyiit ne po tisap ne imuunyi emet, sabato ne po Kamuktaindet ne Toroor. Amat igol mbareeng'ung' ne po sabibuk anan isabor keetiigap logoeguk.

⁵ Amat iges kolgeinik che po mbareeng'ung', amat ibut sabibuk che po keetiiguk che po logoek che ma kisabor. Ak egu kenyiit ne imuunyi emet.

⁶ Ago egu ruroteetap emet eng' sabatonooto amitwogikwok; cheguuk, po otwogindeng'ung', ak otwogindeng'ung' ne tye ak po otwogindet ne nyooru melekto ak punootyot ne mi kobooten,

⁷ ak ko po akweeng'ung' ak tyong'ik che mi emeng'ung', ruratennyi tugul amitwogikwak.

Kenyiitap Jubilii

⁸ “Iityigei sabatoisyek tisap che po kenyiisyek, chooto ko kenyiisyek tisap konyil tisap, koek eng' inyee peetuusyegap sabatoisyek tisap che po kenyiisyek, chooto ko kenyiisyek artam ak sogool.

⁹ Yeityo iguut iryageet ne cheei miising', eng' peetuutap taman eng' arawetap tisap; oguute iryageet koyom emeng'wong' komugul eng' peetuutap kagaigaet.

¹⁰ Ak otabaan kenyiit ne po konom, ak omwaite eng' emet komugul katyagetap tugul che meng'iisyei. Egu jubilii eng' okweek. Wendi chii tugul ole ki nenyi, ak koweekyigei chii tugul oldap piikyik.

¹¹ Egu jubilii eng' okweek kenyinooto po konom. Mogolse anan oges kolgeinik eng' olooto, amat obut logoegap keetiik che ma kisabor.

¹² Amu jubilii, egu ne tiliil eng' okweek. Oame ruratennyi che punu mbar.

¹³ “Ak oweekyigei chii tugul ole ki nenyi eng' kenyini po jubilii.

¹⁴ Ngialdochi kiy chiitap kokweng'ung' anan ngial kiy eng' chiitap kokweng'ung', ko matoyachigei ne ya, okweegei eng' okweegei.

¹⁵ Iale chiitap kokweng'ung' ne yamegei ak koitetap kenyiisyek, ko kagobata jubilii, ak ingoaldaun che yamegei ak koitetap kenyiisyek che po kesisyet.

¹⁶ Itese alyennyi ko uu chaang'indap kenyiisyek ak ichuchuch alyennyi ko uu ng'ering'indap kenyiisyek, amu aldaun ne yamegei ak kesisyet.

¹⁷ Ago amoyachigei ne ya, okweegei eng' okweegei; ago iywei Kamuktaindeng'ung'. Amu aa Kamuktaindet ne Toroor Kamuktaindeng'wong'.

¹⁸ “Amu nooto anyun, oriip ng'atuutikyuk ak oyai kirwoogutikyuk, si omeny emet eng' kaalyeet.

¹⁹ Ak kooi `emet logoek ak oam obiye, ak omeny olooto eng' kaalyeet.

²⁰ Ak ngot ole, ‘Ki ame nee eng' kenyiitap tisap, Ogeero, ma ki koolsei, ama kigese tuguukyok?’

²¹ Ang'ate anyun perurtanyu eng' okweek eng' kenyiit ne po lo, koruryo che yamei kenyiisyek somok.

²² Ye ogoolse eng' kenyiitap sisiit, oame logoek che konorotiin che po keny, agoi kenyiitap sogool, oame che po keny agoi koruryo kogeny.

Katyagetap emet

²³ “Ma ki aldoi emonooto agoi, amu nenyu emet; amu oo toek ak kiprutoinik kobooto eng' emonooto.

²⁴ Ogoite katyaget ne po emet, eng' emeng'wong' komugul.

²⁵ “Ngo ek panan ne otupche ak koalda kebebertap oldanyi, konyo anyun ne tilyennyi ne neegit, konyo kotyach nooto ki alda tupchennyi.

²⁶ Ngo ma tinyei chiito chii ne ityaachi, ak ngoboor, ak kotinyei che yamei kotyagegei,

²⁷ ingoiit anyun kenyiisyek kobooch ngap koalda, ak koweekyi chiito ne kiga aldochi, che kang'etune; yeityo koweekyigei olooto ki nenyi.

²⁸ Ago ngo ma imuuch kotyakyigei, kotebee nooto eutap ineendet ne kiga al, agoi koit kenyiitap jubilii. Ak nyolu komaanda alindet koronooto eng' eunnyi eng' kenyinooto po jubilii ak kobunji chiichooto ki po.

²⁹ “Ngo alda chii koot ne ki menyei ne mi nganaseet ne ki kiyieme irimeet, komuuchi kotyach eng' kenyiit ne isubi nooto ki aldae. Ki chamjin kotyach eng' kenyinooto komugul.

³⁰ Ngo ma kityaach eng' kenyinooto komugul, kobunji koyooto miitei nganaseet ne ki king'ot, ineendet ne ki alei, agoi, eng' ibinwekyik tugul; ma kityaachi nooto eng' kenyiitap jubilii.

³¹ Ago ki iti kooriik che mi nganasook che ma kiyieme irimeet, kogergeit ak mbareenik che po emet. Kimuuchi kityaach chooto, mandoi chooto eng' kenyiitap jubilii.

³² Ago imuuchi Lawiik kotyach nganasookwak, ak kooriik che mi nganasook che chechwaak, eng' peetuut age tugul.

³³ Ak ngo tyach chiito age ne po Lawiik, komandoi anyun koyooto ki kialda, kobooto nganaseet ne nenyi, eng' kenyiitap jubilii; amu chechwaget kooriik che mi nganasoogap Lawiik eng' kwenutap piigap Israel.

³⁴ Ago amat kealda emet ole agete tuukwak che po nganasookwak, amu chechwaak agoi.”

Riirge agobo che ma tinyei kiy

³⁵ “Ngo ek kibanania tupcheng'ung' ama sich kiy ne toretegei, ko myee itoret anyun ineendet ak otebi tuwai ko uu toondet anan punootyot.

³⁶ Amat image ineendet kelunet anan che tesatiin. Ago iywei Kamuktaindeng'ung', si kotebi tupcheng'ung' kobooten.

³⁷ Amegoochi siling'isyeguk ile si inyoorunee che siirtoot, anan igoochi amitwogiguk ile si kotesak.

³⁸ Aa Kamuktaindet ne Toroor Kamuktaindeng'wong', ne ki amutwak omang'une emetap Misiri, si agoonok emetap Kanaan, ak aegu Kamuktaindeng'wong'.

Katyagetap otwogik

³⁹ “Ngo ek kibanania tupcheng'ung' ne mi kobooten, ak kochamdagei ial ineendet, ko megoochi ineendet kootin ko uu otwogin.

⁴⁰ Ingotebi kobooten ko uu otwogindet ne nyooru melekto anan ko uu punootyot. Ak kootin agoi kenyiitap jubilii.

⁴¹ Yeityo anyun komanda eng' oldang'ung', ineendet kobooto lagokyik, ak koweekyigei oldap piigap ooreenywa, koweekyigei ole mi tuguugap kwanisyekyik.

⁴² Amu icheek ko otwogikyuk, che ki amutu komang'une emetap Misiri; ma ki aldoi anyun icheeget ko uu otwogik.

⁴³ Amat ibou ineendet eng' kimnateet ne koroom, ago iywei Kamuktaindeng'ung'.

⁴⁴ Ago eng' ng'olyootap otwogiguk che murenik ak che tiibiik, che ta inyooru, che po pororyosyek che kiyiemak, oale chooto.

⁴⁵ Oale eng' lagogap punootik che meng'iisyei eng' kwenung'wong', ak eng' piikwak che mi kobootok che ki kisikyin emeng'wong', egu anyun icheek chekwoget.

⁴⁶ Ak oyai chooto koek poroteetap lagokwok, che piitu let, si konam kobunji. Onyoorunee icheek otwogikwok agoi, ago amobou eng' kimnateet ne koroom tupchosyekwok, piigap Israel, okweegei eng' okweegei.

⁴⁷ “Ngot koek mogoryo ne kipsagarin anan punootyo ne mi kobooten, ak konam pananda tupcheng'ung' ne mi kobooto ineendet, ak kochamdagei koal kipsagarindonooto anan punootyondonooto mi kobooten, anan ne salu kesweegap ooreet ne po chiichooto,

⁴⁸ kimuuchi kityaach kogeny ye kagialda; imuuchi kotyach age eng' tupchosyekyik.

⁴⁹ Imuuchi kotyach ineendet chiitap ooreennyi anan weeriitap ne po ooreennyi, anan tilyet age tugul ne neegit ne po ooreennyi, anan ngo ek mogoryo komuuchi kotyachkei.

⁵⁰ Koiit tuwai kobooto chiichooto ki alei ineendet kobooch kenyiit ne ki aldaegei agoi kenyiitap jubilii. Ak kotenit che ki kialdae ineendet koitetap kenyiisyek; tebyei kobooto ineendet che yamegei ak peetuusyegap otwogindet ne nyooru melekto eng' otisyennyi.

⁵¹ Ngo ta komi kenyiisyek che chaang', koweekyi silingisyek che yamei katyagennyi eng' silingisyek che kiga kiale ineendet.

⁵² Ak ngo ta komi kenyiisyek che ng'ering' kityo si koit kenyiitap jubilii, koiit anyun tuwai, ak koweekyi silingisyek che yamei kenyiisyek che po katyagennyi.

⁵³ Ngo tebi kobooto ineendet ko uu otwogindet ne nyooru melekto eng' kenyiit agoi kenyiit; amat koboi ineendet eng' kimnateet ne koroom eng' taing'ung'.

⁵⁴ Ago ngo ma kityaach chiichooto eng' ortinwechooto, komanda anyun kwo eng' kenyiitap jubilii, ineendet kobooto lagokyik.

⁵⁵ Amu otwogikyuk piigap Israel; icheeget otwogikyuk che ki amutu komang'une emetap Misiri. Aa Kamuktaindet ne Toroor Kamuktaindeng'wong'.