ATEPTAP LAWIK 24 - BUKUIT NE TILIIL Sireet ne Dutero Kanon

Ng'atuutik agobo taisyek

¹ Ki mwachi `Kamuktaindet ne Toroor Musa koleenji,

² “Ng'at piigap Israel koibun mwanigap mseituni che tiliileen che ki kitui agobo lapkeiyet, si kolaal tait kotugul.

³ Chobei Aron tait eng' saang'utap angeet ne ki kioiye koot, ne po paornateet, eng' emait ne kituiyechin, kong'etee koskoleny agoi karon kotugul eng' taitap Kamuktaindet ne Toroor. Egu niito ng'atuutyet ne po koigeny eng' ibinwekwok tugul.

⁴ Chobei ineendet taisyek eng' keldap tait ne tiliil eng' taitap Kamuktaindet ne Toroor kotugul.

⁵ “Inemu peek che ng'ootiin che tambulul kiloinik taman ak aeng' ak ibeel magatiinik taman ak aeng'. Yamei magatyat agenge kiloinik aeng'.

⁶ Ak itet koek ortinwek aeng', kobee lo lo, eng' meset ne tiliil eng' taitap Kamuktaindet ne Toroor.

⁷ Ak inde ooreet age tugul tuguuk che tiliileen che nyamdut, si kobiit koek kabwaatet eng' magatinichooto, kagoochinet ne punei maat ne kigoochin Kamuktaindet ne Toroor.

⁸ Tetei ineendet kioto eng' sabato age tugul eng' taitap Kamuktaindet ne Toroor; nooto ko amu piigap Israel, koek kayomiset ne po koigeny.

⁹ Punjin Aron ak weeriikyik, ak amei eng' ole-tiliil, amu tiliil miising' eng' ineendet eng' kagoochinoik che punei maat che po Kamuktaindet ne Toroor eng' ng'atuutyet ne po koigeny.”

Chubisyet ak kergong'yet

¹⁰ Ki manda ye mi piigap Israel weeriitap kobogoryotap Israel, ne ki Misirindet kwandanyi, ak kiboryo weerooto po kobogoryotap Israel ak chiitap Israel eng' nganaseet,

¹¹ ki sas ak kochup Kainet weerooto po kobogoryotap Israel. Ak ki imut `icheek ineendet kwo ole mi Musa. Ki kiguure kainetap kamet Selomit, cheptap Dibri, ne po ooreetap Dan.

¹² Ak kiger `icheek ineendet, koganyis kot konai kiit ne punu kutitap Kamuktaindet ne Toroor agobo ineendet.

¹³ Ki mwachi `Kamuktaindet ne Toroor Musa koleenji,

¹⁴ “Imoong'u ineendet ne kosasiis kwo saang'utap nganaseet; ak ingogonoor eunekwak metinnyi icheek tugul che kogasei kosasisyei, ak kolage koik tuiyet komugul ineendet.

¹⁵ Ak imwachi piigap Israel ileenji, Ibei tengektanyi age tugul ne sasei Kamuktaindennyi.

¹⁶ Ineendet ne chubei kainetap Kamuktaindet ne Toroor kebarei iman. Lage koik iman tuiyet komugul chiichooto; ngo punootyo anan ne kisikyin kaa, kibarei ye kachup kainet.

¹⁷ Kibarei iman chii age tugul ne parei chiito age.

¹⁸ Igeeri age ineendet ne kabar ne po akweet; saboondo eng' saboondo.

¹⁹ Ngo nde chiito peruut chiitap kokwennyi, ko uu ye ki yai, kiyachin ineendet ko uu nooto;

²⁰ moet eng' moet, konda eng' konda, keldet eng' keldet. Ko uu ye kagonde chiito age perutyet, kigeerchin ko uu nooto agine.

²¹ Ineendet ne parei ne po akweet kogeeri age, ak kebarei chiito ne parei chii.

²² Egu agenge ng'atuutyeng'wong', kergeitu ne punootyo ak ne salwok. Amu aa Kamuktaindet ne Toroor Kamuktaindeng'wong'.”

²³ Ara ki ng'alaalji `Musa piigap Israel ak ki imut `icheek chiichooto kisasisyei kwo saang'utap nganaseet ak kelage ineendet koik. Ki yai anyun piigap Israel ko uu ye ki ng'at `Kamuktaindet ne Toroor Musa.