ATEPTAP LAWIK 23 - BUKUIT NE TILIIL Sireet ne Dutero Kanon

Igorwegap Kamuktaindet ne Toroor

¹ Ki ng'alaalji `Kamuktaindet ne Toroor Musa koleenji,

² “Mwachi piigap Israel leenjin, Igorwegap Kamuktaindet ne Toroor che ki king'at keele omwaite koek kayumosyegapkei che itabaanatiin, chooto igoorwekyuk che ki king'at.

³ Kiyaei poisyet peetuusyek lo, ago peetuutap tisap ko sabato ne kimuung'e; kayumetapkei ne itabaanat. Amat oyai poisyo age tugul, nooto ko sabato eng' Kamuktaindet ne Toroor eng' meng'otosyekwok tugul.

⁴ “Chu igoorwegap Kamuktaindet ne Toroor che ki king'at, kayumosyegapkei che itabaanatiin, che omwaitoi eng' peetuusyekwak che ki king'at.”

Igoortap Paska

⁵ “Eng' peetuutap taman ak ang'wan ne po arawet ne po tai, eng' koskoleny, ko paska ne po Kamuktaindet ne Toroor.

⁶ Egu igoorto ne po magatiinik che ma kinde mermereek, eng' Kamuktaindet ne Toroor, eng' peetuutap taman ak muut ne po arawanooto. Oame magatiinik che ma kinde mermereek peetuusyek tisap.

⁷ Egu kayumetapkei ne itabaanat eng' peetuut ne po tai; amat oyai poisyo age tugul ne po otwoknot.

⁸ Ago ogoite kagoochinet ne punei maat ne kigoochin Kamuktaindet ne Toroor, eng' peetuusyek tisap. Egu kayumetapkei ne itabaanat eng' peetuut ne po tisap; amat oyai poisyo age tugul ne po otwoknot eng' peetuunooto.”

⁹ Ki ng'alaalji `Kamuktaindet ne Toroor Musa koleenji,

¹⁰ “Mwachi piigap Israel leenjin, Ye oit emet ne agoonok, ak ogesisye eng' olooto, eng' yooto anyun oipchi tisiindet peek che togoanik che po kesisyeng'wong'.

¹¹ Koongoi anyun ineendet peechooto eng' taitap Kamuktaindet ne Toroor, si kobiit ketaach agobo okweek; ongoi tisiindet chooto eng' peetuut ne po aeng', ko kagobata sabato.

¹² Ak eng' peetuunooto oongoi okweek peek, ogoite anyun mengit ne libwoop ne ma siirei kenyiit agenge koek kagoochinet ne kibeelei ne po Kamuktaindet ne Toroor.

¹³ Ak egu kagoochinennyi ne po peek kiloinik aeng' che po peek che ng'ootiin che tambulul che kagiburukto mwaita, kagoochinet ne punei maat kigoochin Kamuktaindet ne Toroor, koek nyamdutyet ne anyiny. Ak egu kagoochinennyi ne kieei, divaik, che yamei litaiyat agenge.

¹⁴ Amat oam magatya anan peek che kigelei, anan mesiisek agoi koit peetuuniito, agoi oibu kagoochinet ne po Kamuktaindeng'wong'. Niito ng'atuutyet ne po koigeny eng' ibinwekwok tugul eng' meng'otosyekwok tugul.

¹⁵ “Oiityigei kong'etee peetuut ne po aeng' ko kagobata sabato, kobooch peetuut ne kioibu peek che po kagoochinet ne kiongoi; egu sabatoisyek tisap che nyiitootiin.

¹⁶ Oiit peetuusyek konom agoi peetuut ne po aeng' ko kagobata sabato ne po tisap, ak ogoochi Kamuktaindet ne Toroor kagoochinet ne leel ne po peek.

¹⁷ Oibu eng' meng'otosyekwok magatiinik aeng' che kiongoi che kichoben kiloinik aeng' che po peek che ng'ootiin che tambulul, che kibeeldoi mermereek, koek tongoanik che po Kamuktaindet ne Toroor.

¹⁸ Ak ogoite kobooto magatiinik aarek tisap che libwoben che po keechiir che ma siirei kenyiit agenge ak kirgit agenge ne neran, ak mengichik aeng'. Egu kagoochinet ne kibeelei ne po Kamuktaindet ne Toroor, kobooto kagoochinennywa ne po peek ak kagoochinoikwak che kieei, kagoochinet ne punei maat, ne po nyamdutyet ne anyiny eng' Kamuktaindet ne Toroor.

¹⁹ Ogoitoi kwesta agenge koek kagoochinetap tengekto, ak koek aarek aeng' che mengichik che ma siirei kenyiit agenge, kobunji tiseiywotap kagoochinoik che po kaalyeet.

²⁰ Ak koongoi tisiindet chooto kobooto magatiinik che po tongoanik koek kagoochinet ne kiongoi eng' taitap Kamuktaindet ne Toroor, kobooto mengichichooto aeng'. Tiliilitu eng' Kamuktaindet ne Toroor amu tisiindet.

²¹ Oititen eng' peetuunooto; piitu kayumetapkei ne itabaanat eng' okweek; amat oyai poisyo age tugul ne po otwoknot. Niito ng'atuutyet ne po koigeny eng' meng'otosyekwok tugul eng' ibinwekwok tugul.

²² “Ye ogesisye eng' emeng'wong', ko mat iges igeesu luukwegap mbareeng'ung', anan iyumate turoonigap kesisyeng'ung'. Pagakyi kibananook ak che toek. Aa Kamuktaindet ne Toroor Kamuktaindeng'wong'.”

²³ Ki ng'alaalji `Kamuktaindet ne Toroor Musa koleenji,

²⁴ “Mwachi piigap Israel leenjin, Egu kamuung'et eng' okweek, peetuut ne po tai eng' arawetap tisap, kabwaatet ne po kuutetap iryagook, kayumetapkei ne itabaanat.

²⁵ Amat oyai poisyo age tugul ne po otwoknot ak ogoite kagoochinet ne punei maat kigoochin Kamuktaindet ne Toroor.”

Peetuutap Kagaigaet

²⁶ Ki mwachi `Kamuktaindet ne Toroor Musa koleenji,

²⁷ “Ago egu peetuutap kagaigaet eng' peetuutap taman eng' arawaniito po tisap. Egu kayumetapkei ne itabaanat eng' okweek, ne oming'inge, ak ogoite kagoochinet ne punei maat ne kigoochin Kamuktaindet ne Toroor.

²⁸ Amat oyai poisyo age tugul eng' peetuunooto, amu peetuutap kagaigaet, si keyai kagaigaet amu okweek eng' taitap Kamuktaindet ne Toroor Kamuktaindeng'wong'.

²⁹ Amu chii age tugul ne ma iming'inegei eng' peetuunooto, king'etoi eng' piikyik.

³⁰ Chii age tugul ne yaei poisyet age tugul eng' peetuunooto, ang'eme chiichooto aistoe piikyik.

³¹ Amat oyai poisyo age tugul. Niito ko ng'atuutyet eng' ibinwekwok tugul eng' meng'otosyekwok tugul.

³² Egu sabato ne po kamuung'et eng' okweek ak oming'inge. Oriip sabato neng'wong' peetuut ne po sogool ne po arawet, kobooch koskoleny agoi koskoleny.”

Igoortap Keryosyek

³³ Ki ng'alaalji `Kamuktaindet ne Toroor Musa koleenji,

³⁴ “Mwachi piigap Israel leenjin, Egu igoortap keryosyek peetuusyek tisap eng' Kamuktaindet ne Toroor eng' peetuutap taman ak muut ne po arawaniito po tisap.

³⁵ Egu kayumetapkei ne itabaanat eng' peetuut ne po tai, amat oyai poisyo age tugul ne po otwoknot.

³⁶ Ogoitoi kagoochinet ne punei maat, ne kigoochin Kamuktaindet ne Toroor, eng' peetuusyek tisap. Egu kayumetapkei ne itabaanat eng' okweek eng' peetuut ne po sisiit, ak ogoitoi kagoochinet ne punei maat, ne kigoochin Kamuktaindet ne Toroor. Tuiyet ne po kaming'inetapkei niito; amat oyai poisyo age tugul ne po otwoknot.

³⁷ “Chuuto igoorwegap Kamuktaindet ne Toroor che ki king'at, che omwaitoi ole, kayumosyegapkei che itabaanatiin, si ogoite kagoochinet ne punei maat ne kigoochin Kamuktaindet ne Toroor, kagoochinet ne kibeelei ak kagoochinet ne po peek, tiseiywot ak kagoochinoik che kieei; kigoitoi kagoochinet age tugul eng' peetuunnyi.

³⁸ Konunoichu kosiirei che po sabatoisyek che po Kamuktaindet ne Toroor, ak kosiirei kagoochinoikwok che ki oaroorte tugul ak kagoochinoikwok tugul che po chamyet, che ogoochini Kamuktaindet ne Toroor.

³⁹ “Ago ye kaoyum ruroteetap emet eng' peetuutap taman ak muut, ne po arawetap tisap, oriip koek igoortap Kamuktaindet ne Toroor eng' peetuusyek tisap. Kitere kamuung'et eng' peetuut ne po tai ak kitere kamuung'et eng' peetuut ne po sisiit.

⁴⁰ Obutyigei eng' peetuut ne po tai logoegap keetiik che korooron, mooriigap tiironigap sosik ak mooriigap keetiik che nyigiisen, ak keetiik che piityee kereruusyek, ak oboiboitu eng' taitap Kamuktaindet ne Toroor Kamuktaindeng'wong' eng' peetuusyek tisap.

⁴¹ Oriip nooto koek igoortap Kamuktaindet ne Toroor eng' peetuusyek tisap eng' kenyiit. Niito ng'atuutyet ne po koigeny eng' ibinwekwok; oriip anyun igoorata eng' arawetap tisap.

⁴² Omenye keryosyek peetuusyek tisap, ak menyei keryosyechooto tugul che salu Israel,

⁴³ si kobiit konai ibinwekwok che piitu let kole, ki agoochi piigap Israel komeny keryosyek, ye ki amutu icheek komang'une emetap Misiri. Aa Kamuktaindet ne Toroor Kamuktaindeng'wong'.”

⁴⁴ Ki mwachi anyun Musa piigap Israel igoorwegap Kamuktaindet ne Toroor che ki king'at.