ATEPTAP LAWIK 22 - BUKUIT NE TILIIL Sireet ne Dutero Kanon

Kagoichinoik che taagaksei eng' Kamuktaindet ne Toroor

¹ Ki mwachi `Kamuktaindet ne Toroor Musa koleenji,

² “Ileenji Aron ak weeriikyik, kotabaanegei tuguuk che tiliileen che po piigap Israel, che itabaanwa, si ma reeny kainennyu ne tiliil. Aa Kamuktaindet ne Toroor.

³ Ileenji, King'etoi eng' tainnyu chii age tugul ne po iyoteng'wong' tugul eng' ibinekwok tugul, ne riikyin tuguuk che tiliileen, che itabaanjin piigap Israel Kamuktaindet ne Toroor, kotinyei murwoonindanyi. Aa Kamuktaindet ne Toroor.

⁴ Amat koam tuguuk che tiliileen chii age tugul eng' lagogap Aron ne tinyei mogondos, anan ne tinyei ole mandae tugun, agoi kotiliilit. Age tugul ne twaei ne kigonyoor simwo amu muusto, anan chiito ne mandae kesweegap iyoteet,

⁵ anan age tugul ne twaei ne ichuutegei ng'wony, ne ing'waniti chii, anan chii ne imuuchi kong'waniit ineendet, eng' murwoonindo age tugul ne tinyei,

⁶ ng'wanitu agoi koimen ne twaei age eng' chooto, ak ma amei tuguuk che tiliileen ngot ko tomo kouungei.

⁷ Ye karorokto asiis, koanyinyit, ak yeityo koam tuguuk che tiliileen, amu amitwogichooto.

⁸ Amat koam panyeegap tyong'ik che pegu icheegei, anan che tonatoni tyong'ik, si mat kong'wanitkei eng' chooto. Aa Kamuktaindet ne Toroor.

⁹ Riibei anyun katigonutikyuk, si ma nam icheek tengektap tuguuchooto, ak kobekyi tuguuchooto ngo reeny. Anee Kamuktaindet ne Toroor ne atabaani icheek.

¹⁰ “Ma amei kipsagarin age tugul tuguuk che tiliileen. Ma amei punootyot ne po tisiindet, anan otwogindet ne nyooru melekto,

¹¹ ago ngo al tisiindet chii, koale silingisyekyik, koamei nooto tuguuchooto, ak che kisikyin koonnyi, amei chooto amitwogikyik.

¹² Ngo tun cheptap tisiindet kipsagarin, koma amei chebooto kagoochinet ne kinamjin parak, ne po tuguuk che tiliileen.

¹³ Ago ngo kwony ne ki kosiirtoe manong'otyot cheptap tisiindet, anan ngo ki oon manong'otyot, ama sich lakwa, ak koweektagei kootap kwandanyi, ko uu ye kita koming'in, koamei ineendet amitwogigap kwandanyi. Ago ma amei toondet age tugul chooto.

¹⁴ Ak ngo am chii age tugul tuguuk che tiliileen koma nai, kotesyin chooto anyun kebebertap muut, ak kogoochi tisiindet kioto tiliil.

¹⁵ Amat koreeny tisiik tuguuk che tiliileen che po piigap Israel, che igoochin Kamuktaindet ne Toroor;

¹⁶ si konyoor ng'oogisto; ye amei tuguukwak che tiliileen. Amu anee Kamuktaindet ne Toroor ne atiliilii icheek.”

¹⁷ Ki ng'alaalji `Kamuktaindet ne Toroor Musa koleenji,

¹⁸ “Mwachi Aron ak weeriikyik ak piigap Israel tugul, ileenji icheek, Age tugul ne po kootap Israel, anan che punootik eng' Israel, ne igoitoi kagoochinennyi, ngo po kagoochinonooto age tugul eng' arorutikwak, anan ko age tugul eng' kagoochinoikwak che po chamyet ne igoochin Kamuktaindet ne Toroor koek kagoochinet ne kibeelei,

¹⁹ si kobiit ketaachak, ogoitoi kagoochinet ne kirgit ne libwoop eng' tuuga, anan eng' keechiirek, anan eng' ng'oroorek.

²⁰ Ago amat ogoite ne ma libwoop, amu ma kitaachei nooto agobo okweek.

²¹ Ak chii age tugul ne igoitoi tiseiywot ne po kagoochinoigap kaalyeet kogoochin Kamuktaindet ne Toroor, si kobiit koyai kosulda nooto ne kiga koaror, anan kagoochinetap chamyet ne po tuuga, anan ko ne po keechiirek, kanyool koek ne ititaat si kobiit ketaach; ne ma piitune perutyet age tugul.

²² Amat ogoochi Kamuktaindet ne Toroor ne koraat, anan ne kigoil, anan ne kigonyoor peruut, anan ne rootei tugun, anan ne tinyei kochek, anan ne tinyei kacheet, amoyai koek kagoochinet ne punei maat eng' kaptisisyet, keele kigoochi Kamuktaindet ne Toroor eng' chooto.

²³ Imuuchi igoite koek kagoochinetap chamyet kirgit anan aarwetap keechiir ne tinyei tuguuk che uu kunduenik, anan kebeberta ne ma mi eng' poortanyi; ago ma kitaachei ngo po kiit ne ki kiaror.

²⁴ Amat ogoochi Kamuktaindet ne Toroor ne ki kibir kitik, anan ne ki kitui, anan ne kigong'etyo, anan ne ki kitil; amat oyai ko uu nooto eng' emeng'wong'.

²⁵ Amotaach eng' eutap kipsagarin amitwogigap Kamuktaindeng'wong', alak tugul eng' chuuto, ole si ogoite. Amu mi ng'emisyennywa icheek, tinyei perutik, ma kitaachei chooto agobo okweek.”

²⁶ Ki mwachi `Kamuktaindet ne Toroor Musa koleenji,

²⁷ “Ye kagii kirgit, anan keechiiryet, anan ng'orooryet, kotebyei ak kamet peetuusyek tisap, ak eng' peetuut ne po sisiit ak kwo tai, ketaachei koek kagoochinet ne punei ma ne kigoochin Kamuktaindet ne Toroor.

²⁸ Ago amat oeny teta ne rooryat anan keechiiryet ne kotoy, kobooto moitanyi anan arwennyi peetuunak.

²⁹ Ak ye oeng'ji Kamuktaindet ne Toroor tiseiywotap kongoi, oeng'ji si kobiit ketaachak.

³⁰ Ki amei eng' peetuunooto, motuuch kiy kot koeekyi. Aa Kamuktaindet ne Toroor.

³¹ “Ara oriip anyun ng'atuutikyuk amu nooto ak oyai. Aa Kamuktaindet ne Toroor.

³² Amoreeny kainennyu ne tiliil, ago kitabaana eng' piigap Israel. Anee Kamuktaindet ne Toroor ne atabaanok,

³³ ne ki amutwak omang'une emetap Misiri, si aek Kamuktaindeng'wong'. Aa Kamuktaindet ne Toroor.”