ATEPTAP LAWIK 21 - BUKUIT NE TILIIL Sireet ne Dutero Kanon

Pitonwek agobo Tisiik

¹ Ki leenji `Kamuktaindet ne Toroor Musa, “Mwachi tisiik weeriigap Aron, ileenji icheek, Amat komurwongei chii eng' chii ne kame eng' piikyik,

² kobatee eng' tilyonutikyik che neegit, kamet, kwandanyi, weeriinnyi, cheptonyi, ng'eetap kamet,

³ ak eng' chepkamet ne pergeiya, ne po tilyet ne neegit ne tomo kotun chii, imuuchi komurwongei amu chepkamet.

⁴ Amat komurwongei, amu ineendet ko chiito ne tagunoot eng' piikyik.

⁵ Amat kocher metowekwak anan tabanwegap tamnokwak, anan kotilatil poorwekwak.

⁶ Egu che tiliileen eng' Kamuktaindennywa, amat koreeny kainetap Kamuktaindennywa. Amu igoitoi icheek kagoochinoik che punei maat, che po Kamuktaindet ne Toroor, chooto amitwogigap Kamuktaindennywa. Egu anyun icheek che tiliileen amu nooto.

⁷ Amat kotun chepkugonio anan ne murwoon. Amat kotun osotyot ne ki oon manong'otyondennyi, amu tiliil ineendet eng' Kamuktaindennyi.

⁸ Itiliil ineendet anyun amu nooto, amu ineendet ne igoitoi amitwogigap Kamuktaindeng'ung'; ingotiliilit anyun ineendet eng' inyee, amu anee Kamuktaindet ne Toroor ne atiliilok, ko aa tiliil.

⁹ Ak ngo murwongei cheptap tisiindet age tugul, komurwongei ineegei eng' kugoinatet, ko kagomurwon kwandanyi, kebeelei eng' ma.

¹⁰ “Ineendet ne tisiindet ne oo eng' che tupcho, ne ki kiroong'ji mwaita ne ki ilse metinnyi ne ki kitabaan kolaach ngoroik, ko mat koyaat metinnyi, anan kogereer ngoroikyik.

¹¹ Amat kwo ole miitei muusto, anan komurwongei amu kwan anan kamet.

¹² Amat komanda eng' ole-tiliil anan komurwon ole-tiliil ne po Kamuktaindennyi, amu mi metinnyi mwaitap katabaanet ne ki ilse ne po Kamuktaindennyi. Aa Kamuktaindet ne Toroor.

¹³ Ingotun anyun chepto ne pergeiya.

¹⁴ Amat kotun kwony ne ki kosiirtoe manong'otyot anan ne kigeon, anan kobogoryo ne murwoon, anan chepkugonio. Ago ingotun pergeiyat eng' piikyik,

¹⁵ amat konyerat iyotennyi eng' piikyik. Amu aa Kamuktaindet ne Toroor ne atiliilii ineendet.”

¹⁶ Ki ng'alaalji `Kamuktaindet ne Toroor Musa koleenji,

¹⁷ “Mwachi Aron ileenji, amat koriikta koipchi Kamuktaindennyi amitwogikyik, chii age tugul eng' iyoteng'ung' ne ma libwoop, eng' ibinwekwak tugul.

¹⁸ Amu ma riiktoi chii age tugul ne ma libwoop, ne koraat, ne ing'wali, anan ne tinyei serut ne lebel, anan ne ki kotesak kiy age tugul eng' poortanyi,

¹⁹ anan ne ki il keeldo, anan ne ki il euut,

²⁰ anan ne kibalbut, anan ne kiring'ak poortanyi, anan ne tinyei teta eng' konda, anan ne tinyei kochek, anan ne tinyei mook che ki koyaamyo, anan ne ki koyesyo kitikyik.

²¹ Amat koriikta chii ne ma libwoop ne po lagogap Aron tisiindet, kwo kogoito kagoochinoigap Kamuktaindet ne Toroor, che punei maat, amu ma libwoop, ma riigu nyoo kogoitoi amitwogigap Kamuktaindennyi.

²² Amei ineendet amitwogigap Kamuktaindennyi chooto tiliileen miising' ak eng' chooto tiliileen.

²³ Ago ma wendi ineendet angeet oriit ne ki kioiye koot, anan koriikyi kapkorosuut, amu ma libwoop; si mat komurwon oldinwekyuk che tiliileen, amu anee Kamuktaindet ne Toroor ne atabaani oldinwechooto.”

²⁴ Ki mwachi anyun Musa ko uu nooto Aron ak weeriikyik ak piigap Israel tugul.