ATEPTAP LAWIK 20 - BUKUIT NE TILIIL Sireet ne Dutero Kanon

Pirutik che pitune tengekwogik

¹ Ki ng'alaalji `Kamuktaindet ne Toroor Musa koleenji,

² “Ileenji piigap Israel, Chii age tugul ne igoochin lagokyik Molek, ngo age eng' piigap Israel anan age eng' punootik che meng'iisyei eng' Israel, kebarei chiichooto iman. Lachei piigap emet eng' koik.

³ Wechei togeennyu chiichooto ak ang'etoi eng' piikyik; amu koigoochi ineendet lagokyik Molek si komurwon koonnyu ne tiliil, ak koreeny kainennyu ne tiliil.

⁴ Ak ngo yaigei piigap emet ko uu yo ma keer chiichooto, kouny, ye kagogoito lagokyik kogoochi Molek, ama kobar,

⁵ eng' yooto anyun aboorchi chiichooto nereegegap togeennyu ak piigap koonnyi. Ak ang'etoi ineendet eng' piikwak, ak tugul che isubi koyaei ibeetapkei kobooto ineendet, che yaei ibeetapkei ak Molek.

⁶ “Aboorchini nereegegap togeennyu chiito ne mastoi kosubi ne poisyee oik ak pooniik, ne isubi koyaei ibeetapkei kobooto icheek, ak ang'etoi chiichooto eng' piikyik.

⁷ Otabaange anyun, oegu che tiliileen; amu aa Kamuktaindet ne Toroor Kamuktaindeng'wong'.

⁸ Oriip ng'atuutikyuk ak oyai. Aa Kamuktaindet ne Toroor ne atabaanok.

⁹ Amu kibarei chii age tugul ne sasei kwan anan kamet. Amu kasas kwandanyi ak kamennyi, ko tebee ineendet korotiikyik.

¹⁰ “Chiito ne ibegei ak osotyotap chiito age, agot ne ibegei ak osotyotap chiitap kokwennyi, kebarei iman chiichooto ak osotyondonooto.

¹¹ Chiito ne ruitos ak osotyotap kwandanyi, ko kang'aany aach ngoritap kwandanyi; kibarei iman tuwai, ak tebee korotiikwak icheek.

¹² Ngo ruiyo chii ak osotyotap weeriinnyi, kebarei iman tuwai. Kagoyai ng'emisyet; tebee korotiikwak icheek.

¹³ Ngo ruiyo mureno ak muren, ko uu ye ruitos ak kobogorisyek, kagoyai tuwai kiit ne samis. Kibarei iman, ak tebee icheek korotiikwak.

¹⁴ Ngo tun chii chepto kobooto kamet, ko sogornateet nooto. Kibeelei icheeget eng' maat, chiichooto ak chuun aeng', si ma piitune ng'oogisto kwenung'wong'.

¹⁵ Ngo ruiyo chii ak tyony, kebarei iman chiichooto, ak obar tyonyooto agine.

¹⁶ Ngo riikyi kobogoryondo tyony age tugul ak koruiyo tuwai, kebarei anyun kobogoryondonooto ak tyonyooto, ak tebee korotiikwak icheek.

¹⁷ “Ngomut chii chepkamet, cheptap kwandanyi, anan cheptap kamet, ak kogeer aach ngorinnyi, ak kogeer chebooto aach ngoritap murenonooto ko teweernateet nooto. King'etoi icheek tuwai eng' taitap lagogap piikwak, amu kagong'aany aach ngoritap chepkamet, ak ibei ineendet tengektanyi.

¹⁸ Ngo ruiyo chii ak kobogoryo ne katyech ng'wony, ak kong'aany poortanyi, ko kagong'aany ole rootune korotiik ak kang'aany agine kobogoryondonooto ole rootune korotiikyik. King'etoi icheek tuwai eng' piikwak.

¹⁹ Amat ing'aany poortap chepkametap kamenng'ung', anan isengeng'ung', amu kagong'aany poortap tilyonutik che neegit. Ibei icheek tengektonywa.

²⁰ Ngo ruiyo chii ak osotyotap imamet ko kagong'aany poortap imamet. Ibei icheek tengektonywa; pegu ama sich lagok.

²¹ Ngo ipkei chii ak osotyotap ng'eetap kamet ko murwoonindo nooto; kagong'aany poortap ng'eetap kamet. Pegu ama sich lagok.

²² “Oriip anyun ng'atuutikyuk tugul amu nooto, ak kirwoogutikyuk tugul, ak oyai, si ma ing'ung'dak emet ole amutok omeny.

²³ Amobendate pitonwegap pororyet ne aoone eng' taing'wong'. Amu ki yai icheek tuguuchuuto tugul, ak ki awech anyun icheek amu nooto.

²⁴ Ago ki amwaiwok aleenjok, ‘Onyabani emennywa, ak agoonok kobunjook emonooto nyiitaat cheego ak komi kumyat eng' chaang'indo.’ Aa Kamuktaindet ne Toroor Kamuktaindeng'wong', ne ki atabaanenak pororyosyek.

²⁵ Obeesye anyun tyong'ik che anyiny ak che ng'woneen, ak toriitik che anyiny ak che ng'woneen. Amogoochi saboonwekwok koek che kiwechei amu tyong'ik anan toriitik, anan kiy age tugul ne wendote ng'wony, che kitabaanenak amu ng'woneen.

²⁶ Oegu che tiliileen eng' anee, amu aa tiliil anee Kamuktaindet ne Toroor, ne ki atabaanenak pororyosyek, si oegu chechuuk.

²⁷ “Kibarei iman ne poisyee oik, ne muren anan ne kwony, anan chii ne poonin. Kilachei icheek eng' koik, ak tebee korotiikwak icheek.”