ATEPTAP LAWIK 2 - BUKUIT NE TILIIL Sireet ne Dutero Kanon

Kagoochinetap peek.

¹ Ye igoitoi chii age tugul kagoochinet ne po peek che igoochin Kamuktaindet ne Toroor, ko ingoek kagoochinennyi peek che ng'ootiin che tambulul. Ingoroong'ji mwaita peechooto ng'ootiin tambulul, ak konde tuguuk che nyamdut ak icheek.

² Yeityo koipchi ineendet weeriigap Aron tisiik. Muguti tisiindet anyun chooto konyiti euut kobooto mwaitanyi ak tuguuk che nyamdut tugul, si kobeel tisiindet koek kebeberta eng' nooto kigoitoi eng' kaptisisyet, kagoochinet ne punei maat, nyamdutyet ne anyiny eng' Kamuktaindet ne Toroor.

³ Che kang'et eng' kagoochinet ne po peechooto ng'ootiin tambulul, kobunji Aron ak weeriikyik. Niito ko tiliil miising' kot kosiir eng' kagoochinoik tugul che po Kamuktaindet ne Toroor, che punei maat.

⁴ “Ye igoitoi inyee kagoochinetap peek che kibeelee eng' ma, igoitoi magatiinik che ma kinde mermereek che po peek che kaging'a che tambulul che kagiburukto mwaita anan magatiinik che tertereen che kagiilee mwaita che ma kinde mermereek.

⁵ Ngo kagoochineng'ung' ko kagoochinet ne po peek che kagibeel eng' kirambenit, ko ingoek che po peek che ng'ootiin che tambululeen che kagiburukto mwaita, che ma kinde mermereek.

⁶ Itiloti komengegitu, ak iroong'ji mwaita; nooto kagoochinet ne po peek.

⁷ Ngo po peek kagoochineng'ung' che kagibeel eng' taabeetap karnet, kechobei peek che ng'ootiin che tambululeen che kagiburukto mwaita.

⁸ Ara ipchi Kamuktaindet ne Toroor kagoochinetap peek che kagechop eng' tuguuchuuto, si keipchi tisiindet ak koip ineendet kwo kaptisisyet.

⁹ Yeityo konem tisiindet che po kabwaatet eng' kagoochinonooto po peek, ak kobeel nooto eng' kaptisisyet, kagoochinet ne kibeelei, ne nyamdutyet ne anyiny eng' Kamuktaindet ne Toroor.

¹⁰ Kagoochinetap peek che kang'et ko punjin Aron ak weeriikyik. Niito ko tiliil miising' kot kosiir, eng' kagoochinoik tugul che po Kamuktaindet ne Toroor che punei maat.

¹¹ “Amat onde mermereek kagoochinet age tugul ne po peek ne ogoochini Kamuktaindet ne Toroor. Amu mobeele mermereek anan kumyat age tugul, koek kagoochinet ne kigoochin Kamuktaindet ne Toroor, kobunei maat.

¹² Ogoochini Kamuktaindet ne Toroor, koek kagoochinetap tongoanik. Ago amat keip koba kaptisisyet koek nyamdutyet ne anyiny.

¹³ Inde muunyuk kagoochineng'ung' age tugul ne po peek; amengorartae kagoochinetap peek muunyuk che po kayomisetap Kamuktaindeng'ung'. Igoitoi muunyuk kobooto kagoochinoiguk tugul.

¹⁴ “Ngigoochi Kamuktaindet ne Toroor kagoochinetap peek che po tongoanik, igoitoi che po tongoaniguk che punu itigap peek che kaginde ma, peek che neryootiin, che kagitui.

¹⁵ Rong'ji mwaita ak inde tuguuk che nyamdut; niito ko kagoochinet ne po peek.

¹⁶ Ingobeel tisiindet kabwaatet ne po nooto, kebebertap peekyik che kagitui, ak kebebertap mwaitanyi, kobooto tuguuk che nyamdut tugul. Niito kagoochinet ne kigoochin Kamuktaindet ne Toroor kobunei maat.