ATEPTAP LAWIK 19 - BUKUIT NE TILIIL Sireet ne Dutero Kanon

Ng'atuutik che teerchiin

¹ Ki ng'alaalji `Kamuktaindet ne Toroor Musa koleenji,

² “Mwachi tuiyet komugul ne po piigap Israel, ileenji, Oegu che tiliileen, amu aa tiliil anee, Kamuktaindet ne Toroor Kamuktaindeng'wong'.

³ Ingoiywei chii age tugul kamennyi, ak kwandanyi, ak oriip sabatosyekyuk. Aa Kamuktaindet ne Toroor Kamuktaindeng'wong'.

⁴ Amat omaste osup tuguuk che ma tilei kiy, amoyachigei kanamonik che po kariik che kitaanyi. Aa Kamuktaindet ne Toroor Kamuktaindeng'wong'.

⁵ “Ak ye ogoochini Kamuktaindet ne Toroor tiseiywot ne po kagoochinoik che po kaalyeet, ogoite anyun si kobiit ketaachak.

⁶ Ki amei eng' peetuunooto ogoitoi, ak eng' peetuut ne po aeng', ak ngo ng'et kiy agoi peetuut ne po somok, kebeel anyun chooto eng' ma.

⁷ Egu kiit ne kiwechei ngot keam agot kitigin eng' peetuut ne po somok; ma kitaachei,

⁸ ak ibei tengektanyi chii age tugul ne amei, amu kareeny kioto tiliil ne po Kamuktaindet ne Toroor. King'etoi chiichooto eng' piikyik.

⁹ “Ye ogesisye eng' emeng'wong', ko mat iges igeesu luukwegap mbareeng'ung', amat iyumate turoonik.

¹⁰ Ak ameturote mbareeng'ung' ne po sabibuk, amat ikwei logoek che kagobutyi ng'wony; pagakyi chooto kibananook ak toek. Aa Kamuktaindet ne Toroor Kamuktaindeng'wong'.

¹¹ “Amochoorse, amoberberisye, amomwachigei lembech.

¹² Amoyosyechigei eng' kainennyu eng' lembech, agoi ireeny kainetap Kamuktaindeng'ung'. Aa Kamuktaindet ne Toroor.

¹³ “Amesastae chiitap kokweng'ung', anan irebe kiy. Amat inamdegei melektap otwogindet kot koeech.

¹⁴ Amat isas chii ne miing'at, amende kiy ne riichei piich taitap ne koraat, ago iywei Kamuktaindeng'ung'. Aa Kamuktaindet ne Toroor.

¹⁵ “Amat oyai ne ma po iman eng' kirwooget; ametiytiy kibananook anan igonyit che eecheen; ago irwookyi chiitap kokweng'ung' eng' imanda.

¹⁶ Amewe komosi ak komosi ichaamate piiguk. Ameuny ne kabar chiitap kokweng'ung'. Aa Kamuktaindet ne Toroor.

¹⁷ “Amewech ne otupche eng' muguleldang'ung', kergong' iman chiitap kokweng'ung', si ma namin tengekto amu ineendet.

¹⁸ Ameyaakyi mugetuut anan isus ng'al agobo lagogap piiguk, ago cham chiitap kokweng'ung' ko uu ye ichamegei. Aa Kamuktaindet ne Toroor.

¹⁹ “Oriip ng'atuutikyuk. Amengorie tuuga cheguuk alage che teer che ma tuuga. Amegol mbareeng'ung' kesweek aeng' che teerchiin. Amelaach ngoryeet ne ki kiyae usiisyek che teerchiin.

²⁰ “Age tugul ne ruitos ak chepto ne otwogindet, ne ki kiamji koito, ne tomo kityaach anan kechamji kwo, kirwookyin tuwai. Ma kibarei, amu ki tomo kityaach chebooto.

²¹ Ago ketu chiichooto kagoochinennyi ne po chalwokto konyo ole mi Kamuktaindet ne Toroor, agoi kurgeetap emait ne kituiyechin, egu mengit nooto, ne kagoochinetap chalwokto.

²² Ak koyai tisiindet kagaigaet agobo ineendet, kobooto mengoto po kagoochinetap chalwokto eng' taitap Kamuktaindet ne Toroor, amu tengektanyi ne kogoyai; ak kenyochigaat amu tengektanyi ne kogoyai.

²³ “Ye oit emonooto ak ye kaomiin keetiik alak tugul che kiamei, oiit anyun logoekwak ole etaatin; egu eng' okweek che eetaatin eng' kenyiisyek somok; ma ki amei.

²⁴ Ago ki anyinyi logoekwak tugul eng' kenyiit ne po ang'wan, si kobiit kilasune Kamuktaindet ne Toroor.

²⁵ Ak oam logoekwak eng' kenyiit ne po muut, si kobiit koiiywok logoek alak. Aa Kamuktaindet ne Toroor Kamuktaindeng'wong'.

²⁶ “Amat oam kiy age tugul kobooto korotiikyik. Amoboisyee ponisyet anan ong'oorse.

²⁷ Amobior metowekwok, ameng'em tabanwegap tamneng'ung'.

²⁸ Amotil poorwekwok agobo piik che pegu, amobeel saremik alak tugul. Aa Kamuktaindet ne Toroor.

²⁹ “Amegoite cheptong'ung' koyait koek chepkugonio, si ma isup emet kugoinatet ak konyi emet tengekto.

³⁰ Oriip sabatosyekyuk, ak ogonyit koonnyu ne tiliil. Aa Kamuktaindet ne Toroor.

³¹ “Amobe ye mi che poisyee oik anan pooniik; amocheeng'ate, si ma ing'wanitak. Aa Kamuktaindet ne Toroor Kamuktaindeng'wong'.

³² “Tononji ne tinyei kalwalek ak igonyit poiyo, ak iywei Kamuktaindeng'ung'. Aa Kamuktaindet ne Toroor.

³³ “Ameyachi ne ya toondet ne mi kobooten eng' emeng'wong'.

³⁴ Igeitu toondet ne meng'iisyei kobootok ak ne kisikyin kaa, cham ineendet ko uu ye ichamegei; amu ki oo toek eng' emetap Misiri. Aa Kamuktaindet ne Toroor Kamuktaindeng'wong'.

³⁵ “Amoyai ne ma po iman eng' kirwooget anan ye okwai eng' koindo, anan ye ogere eng' nyigiisindo, anan eng' karogutik che po tuguuk che pei.

³⁶ Oboisyee kerutik che aechin ak koik che kigerisye eng' nyigiisindo che po iman: epah ak hin che po iman. Aa Kamuktaindet ne Toroor Kamuktaindeng'wong' ne ki amutwak omang'une emetap Misiri.

³⁷ Kanyool anyun osup ng'atuutikyuk tugul ak kirwoogutikyuk tugul, ak oyai. Aa Kamuktaindet ne Toroor.”