ATEPTAP LAWIK 17 - BUKUIT NE TILIIL Sireet ne Dutero Kanon

Ng'atuutyet agobo tiseiywek

¹ Ki ng'alaalji `Kamuktaindet ne Toroor Musa koleenji,

² “Mwachi Aron, weeriikyik ak lagok tugul che po Israel, ileenji, Ni ng'atuutyet ne kong'at Kamuktaindet ne Toroor kole,

³ Chii age tugul ne po kootap Israel ne enyei kirgit, anan ne enyei aarwetap keechiir, anan ng'orooryet, eng' nganaseet, anan ne kagieng'ji saang'utap nganaseet,

⁴ ama ket konyo kurgeetap emait ne kituiyechin, si kogoito koek kagoochinet ne igoochin Kamuktaindet ne Toroor eng' taitap kootap Kamuktaindet ne Toroor, ki ityin chiichooto korotiik. Kagotumda korotiik, ak king'etoi chiichooto eng' piikyik.

⁵ Niito ko si kobiit koget piigap Israel tiseiywekwak che kata enyei eng' kewanin, kobwa ole mi Kamuktaindet ne Toroor, agoi kurgeetap emait ne kituiyechin, agoi ole mi tisiindet, ak koeny chooto koek tiseiywegap kagoochinoik che po kaalyeet che kigoochin Kamuktaindet ne Toroor.

⁶ Ak koisee tisiindet korotiik kaptisisyetap Kamuktaindet ne Toroor eng' kurgeetap emait ne kituiyechin, ak kobeel mwanik koek nyamdutyet ne anyiny eng' taitap Kamuktaindet ne Toroor.

⁷ Si mata koeng'ji oik tiseiywekwak kogeny, che kocham kosuboti koibegei tugul. Egu ng'olyoondoni ng'atuutyet ne po koigeny eng' icheek eng' ibinwekwak tugul.

⁸ “Ak ileenji icheek, Chii age tugul ne po kootap Israel, anan ne po punootik che mi kobooto icheek, ne igoitoi kagoochinet ne kibeelei anan tiseiywot,

⁹ ama ket agoi kurgeetap emait ne kituiyechin, si kobiit koeng'ji Kamuktaindet ne Toroor, king'etoi chiichooto eng' piikyik.

¹⁰ “Ngo am korotiik alak tugul chii age tugul ne po kootap Israel, anan ne po punootik che tebyei kobootok, ko wechei togeennyu ineendet ne amei korotiik, ak ang'etoi ineendet eng' piikyik.

¹¹ Amu mi saboondap poorto korotiik. Ki agoonok korotichooto oyachinegei kagaigaet eng' kaptisiisyo amu saboonwekwok. Amu korotiik che yaei kagaigaet agobo saboondo.

¹² Ki amwachi anyun piigap Israel amu nooto aleenji, Amat koam chii eng' okweek korotiik, amat koam agine punootyot age tugul ne mi kobootok, korotichooto.

¹³ “Ngo par chii age tugul ne po piigap Israel, anan eng' punootik che mi kobooto icheek, tyony age tugul anan toriityon age tugul ne ki amei, kotumda korotiikyik, ak kotuge ng'ung'unyek.

¹⁴ Amu korotiik ko saboondo ne po poorto komugul, ak agenge korotiik ak saboondap poorto. Nooto anyun, ki aleenji piigap Israel, Amatata oam korotiik alak tugul che po poorto age tugul, amu saboondap poorto age tugul korotiikyik. King'etoi age tugul ne amei.

¹⁵ “Ak chii age tugul ne amei kiy ne kame ineegei, anan ne kabar tyong'ik kotonaton, ngo chii ne ki sikyin kaa anan punootyot, ingomwet anyun ngoroikyik, ak kouungei, ak komurwoniit agoi koimen; yeityo anyun koanyinyit.

¹⁶ Ago ngo ma mwet, anan ngo ma iungei, kotebee ineendet anyun tengektanyi.”