ATEPTAP LAWIK 16 - BUKUIT NE TILIIL Sireet ne Dutero Kanon

Ortinwek che kisubi eng' Peetuutap Kagaigaet.

¹ Ki ng'alaalji `Kamuktaindet ne Toroor Musa, ye kingo pata meetap weeriik aeng' che po Aron, ye kingo riikyi taitap Kamuktaindet ne Toroor,

² koleenji, “Mwachi Aron ng'eetap komet, si ma nyoonei atkai tugul ole-tiliil oriit ne po angeet ne ki kioiye koot, eng' taitap kerwetap rireenet ne mi moinget parak; si ma me. Amu among'u eng' pooldet eng' paragutap kerwetap rireenet.

³ Nyoonei Aron ole tiliil ak kirgit ne neran kobunji kagoochinetap tengekto, ak mengit kobunji kagoochinet ne kibeelei.

⁴ Ingolaach ngoryeet ne kooi ne itabaanat ne po katanit, ak ingolaach sulwalisyek che po katanit, ak korategei pireneet ne po katanit ak kilaakyi chepkulet ne po katanit: chooto ngoroik che itabaanatiin. Iuni poortanyi eng' peek, si kolaachi ngoroichooto.

⁵ Ak koget eng' tuiyetap piigap Israel kwesik aeng' kobunji kagoochinetap tengekto, ak mengit agenge kobunji kagoochinet ne kibeelei.

⁶ “Igoitoi Aron kirgit kai, ni ko po kagoochinetap tengekto, ne nenyi ineegei, ak koyachjigei kagaigaet, ak koonnyi.

⁷ Yeityo kokweri kwesichooto aeng', ak konde taitap Kamuktaindet ne Toroor, eng' kurgeetap emait ne kituiyechin.

⁸ Iseri Aron parbareek agobo kwesichooto aeng'; punjin age Kamuktaindet ne Toroor, kobunjin age Asasel.

⁹ Yeityo kogoito Aron kwesta ne kagobutyi parbaryat, kobunji Kamuktaindet ne Toroor, ak kogoito koek kagoochinetap tengekto.

¹⁰ Ago kwesta ne kagobutyi parbaryat ne po Asasel, kinde taitap Kamuktaindet ne Toroor kosabei, si keyai kagaigaet agobo ineendet, si keonda kwo surkwen kobunji Asasel.

¹¹ “Yeityo kogoito Aron eito ne po kagoochinetap tengekto, ne nenyi ineegei, ak koyachigei kagaigaet, ak koonnyi, ak koeny kirgooto po kagoochinetap tengekto ne nenyi ineegei.

¹² Ak konem tereet ne nyiitaat ng'etetyot ne punu maatap kaptisisyet ne mi taitap Kamuktaindet ne Toroor, ak ko nyiitaat eunekyik nyamdutik che ng'uu ne anyiny che ki kitui komengegitu, ak koip koba koot ne po oriit, ne ki kioiye angeet.

¹³ Indoi ineendet nyamdutik ma, eng' taitap Kamuktaindet ne Toroor si kobiit kotuch iyeto ne po nyamdutik kerwetap rireenet ne mi paragutap paornateet, si ma me.

¹⁴ Ak konem korotiik alak che po kirgooto, ak koisee eng' mornennyi kerwetap rireenet ole tokyingei kong'asiis; ak koisisye korotiik eng' taitap kerwetap rireenet eng' mornennyi konyil tisap.

¹⁵ “Yeityo koeny kwesta ne po kagoochinetap tengekto, ne po piik, ak koip korotiigap kweata koba koot ne po oriit ne ki kioiye angeet, ak koyachi korotichooto kiit ne koyachi korotiik che po kirgit, ak koisee kerwetap rireenet, ak taitap kerwetap rireenet.

¹⁶ Yaei anyun kagaigaet agobo ole-tiliil, amu murwoonindap piigap Israel, ak pistoennywa, agot tengekwogikwak tugul. Ak koyachi ko uu nooto emait ne kituiyechin, ne meng'iisyei kobooto icheek eng' kwenutap murwoonindanywa.

¹⁷ Amat kobiit chii ne mi emait ne kituiyechin, ye wendi tisiindet ineendet si koyai kagaigaet eng' ole-tiliil, agoi komong' saang', ko kagoyachigei kagaigaet, ak koonnyi, ak tuiyet komugul ne po Israel.

¹⁸ Yeityo komanda saang', kwo ole mi kaptisisyet ne mi taitap Kamuktaindet ne Toroor, ak koyai kagaigaet agobo nooto; ak konam korotiik alak che po kirgit, ak che po kwesta, koilee kuinoigap kaptisisyet komoswek tugul.

¹⁹ Ak koisee korotiik kaptisisyet eng' mornennyi konyil tisap, ak koanyiny, ak kotiliil koistoe murwoonindap piigap Israel.

²⁰ “Ye kagogees kagaigaetap ole-tiliil, ak emait ne kituiyechin, ak kaptisisyet, kogoito anyun kwesta ne sabei,

²¹ ak kogonoor Aron eunekyik tuwai metitap kweata sabei, kong'aany tengekwogik tugul che po piigap Israel, ak pistoennywa tugul, kong'ururi artanooto; ak kogesenji chooto metitap kweata, ak kogoochi chiito ne kagochopkei kokweri kwo surkwen;

²² ak kogesen anyun kweata tengekwogikwak tugul koba emet ole ma menyei chii, ak kounda artet kwo eng' olooto po surkwen.

²³ “Yeityo konyo Aron agoi emait ne kituiyechin, ak koreek ngoroigap katanit che kailaagoti ineendet si kowendi ole-tiliil, ak kobagaakta eng' olooto.

²⁴ Ak kouungei eng' komosta ne tiliil, ak kolaach ngoroikyik, yeityo komong' saang', ak kogoito kagoochinennyi ne kibeelei ak kagoochinet ne kibeelei ne po piik, ak koyachigei kagaigaet ak koyachi piik.

²⁵ Peelei mwanik eng' kaptisisyet, che po kagoochinetap tengekto.

²⁶ Ak mwetei ngoroikyik ineendet ne kweryei kwesta ne punjin Asasel, ak kouungei. Ye ibata konyo nganaseet oriit.

²⁷ Ak keip koba saang'utap nganaseet kirgit ne po kagoochinetap tengekto, ak ng'orooryet ne po kagoochinetap tengekto che kagiip korotiikwak si keyai kagaigaet eng' ole-tiliil, ak kobeel muiywekwak eng' ma, panyeekwak ak eiyannywa.

²⁸ Mwetei ngoroikyik ineendet ne kabeelei tuguuchooto ak kouungei. Ye ibata, konyo nganaseet oriit.

²⁹ “Ak punjin koigeny kaneetisyoni eng' okweek: oming'inge eng' arawetap tisap, eng' peetuutap taman ne po arawanooto, amat oyai poisyet age tugul, ineendet ne ki sikyin kaa, anan punootyot ne mi kobootok.

³⁰ Amu kiyaiywok kagaigaet peetuunooto, kitiliilok, ak otiliiliitu anyun eng' tengekwogikwok eng' taitap Kamuktaindet ne Toroor.

³¹ Peetuunooto ko sabato ne po kamuung'et eng' okweek, ak oming'inigei. Niito ng'atuutyet ne po koigeny.

³² Ak koyai kagaigaet tisiindet ne ki ili, ne kitoroorchin poisyetap tiliilindo, ne igeeri kwandanyi, ak kolaach ngoroigap katanit, ngoroichooto itabaanatiin,

³³ Yae kagaigaet agobo koot ne tiliil, kagaigaet agobo emait ne kituiyechin ak kaptisisyet, ak koyai kagaigaet agobo tisiik ak piik tugul che po tuiyet.

³⁴ Egu niito anyun ng'atuutyet ne po koigeny eng' okweek, keyai kagaigaet agobo piigap Israel konyil agenge eng' kenyiit, amu tengekwogikwak tugul.” Ki yai anyun ineendet ko uu ye ki ng'at `Kamuktaindet ne Toroor Musa.