ATEPTAP LAWIK 15 - BUKUIT NE TILIIL Sireet ne Dutero Kanon

Murwoonindo ne pitunee tuguuk che mandoe chii

¹ Ki ng'alaalji `Kamuktaindet ne Toroor Musa ak Aron, koleenji,

² “Omwachi piigap Israel, oleenji, Ye tinyei chii kusereet eng' poortanyi, komurwoniit anyun amu kuseroonooto.

³ Ak ni murwoonindanyi ne po kuseroonooto: agot ngomandoi tuguuchooto eng' poortanyi anan ngo kerak, ko murwoonindanyi nooto.

⁴ Ng'wanitu itoogut age tugul ne rue ineendet ne tinyei kusereet, ak ko ng'wanitu kiy age tugul ne tebee.

⁵ Ak mwetei chii age tugul ngoryennyi ne twaei itogunnyi, ak kouungei eng' peek, ak murwoniitu agoi koimen.

⁶ Mwetei ngoroikyik, ak kouungei eng' peek ineendet ne tebee kiy age tugul ne katebee chiichooto tinyei kusereet, ak komurwoniit agoi koimen.

⁷ Mwetei ngoroikyik ineendet ne twaei poortap chiichooto tinyei kusereet, ak kouungei eng' peek, ak komurwoniitu ineendet agoi koimen.

⁸ Ak ngo ng'utyi ne tinyei kuseroonooto chiito ne tiliil; komwetei anyun ngoroikyik, ak kouungei eng' peek, ak komurwoniit agoi koimen.

⁹ Ng'wanitu kiy age tugul ne ki itoi, si kotebee chiichooto tinyei kuseroonooto.

¹⁰ Ago murwoniitu agoi koimen chii age tugul ne twaei kiy age tugul ne mi ole tebee. Ak mwetei ngoroikyik ineendet ne ibei tuguuchooto, ak kouungei eng' peek, ak komurwoniit agoi koimen.

¹¹ Mwetei ngoroikyik chii age tugul ne katwa nooto ne tinyei kuseroonooto, ago katomo koun eunekyik, ak kouungei, ak komurwoniit agoi koimen.

¹² Ak kituei tereet ne ki kiyai eng' ng'ung'unyek ne katwa chiichooto tinyei kusereet, ak kiuuni eng' peek kiit age tugul ne ki kiyae keetit.

¹³ “Ye sap chiichooto eng' myanooto po kusereet, koiityigei peetuusyek tisap che po kaanyinyennyi, ak komwet ngoroikyik, ak koun poortanyi eng' peek che rootei, ak kotiliilit.

¹⁴ Ak kocheeng'jigei eng' peetuut ne po sisiit cheptugenik aeng', anan aarek aeng' che po toriitik, ak konyo taitap Kamuktaindet ne Toroor agoi kurgeetap emait ne kituiyechin, kwo kogoochi tisiindet,

¹⁵ ak kogoito tisiindet chooto kobunji age kagoochinetap tengekto, kobunji age kagoochinet ne kibeelei. Yae tisiindet kagaigaet eng' taitap Kamuktaindet ne Toroor agobo ineendet amu kuserennyi.

¹⁶ “Ngo rwotito chii age tugul, ak komanda kesweegap iyoteet eng' poortanyi, kouungei anyun poorto tugul eng' peek, ak komurwoniit agoi koimen.

¹⁷ Ak kemwet ngoryeet age tugul, ak kiuun muito age tugul, ne katiiny keswechooto, ak komurwoniit agoi koimen.

¹⁸ Ak ngo tuiyogei muren ak kwony ak komaanda kesweegap iyoteet, konyolu kouungei icheek tuwai, ak komurwoniitu tuwai agoi koimen.

¹⁹ “Ngo tyech ng'wony kobogoryondo, ak konai kole, kaagaa peetuunnyi ne po arawet, kotebee murwoonindanyi peetuusyek tisap; ak komurwoniit agoi koimen age tugul ne twaei ineendet.

²⁰ Ak ng'wanitu kiy age tugul ne syebei eng' murwoonindanyi, ak komurwoniit kiy age tugul ne tebee.

²¹ Kanyool anyun komwet ngoroikyik chii age tugul ne twaei itogunnyi, ak kouungei, ak komurwoniit agoi koimen.

²² Ak mwetei ngoroikyik chii age tugul ne twaei kiy age tugul ne katebee kobogoryondonooto, ak kouungei ak komurwoniit agoi koimen.

²³ Ngo mi tuguuchooto itoogut, anan ko eng' kiy age tugul ne kateebe kobogoryondonooto, ye katwa ineendet kioto, komurwoniitu agoi koimen.

²⁴ Ngo ruiyo chii age tugul ak kobogoryondonooto, ak kotiiny ineendet simwegap kobogoryondonooto, komurwoniitu peetuusyek tisap chiichooto, ak kong'waniit itoogut age tugul ne karue.

²⁵ “Ngo pwoonei korotiik eng' kobogoryot eng' peetuusyek che chaang' che ma eng' peetuusyek che kitabaane, anan ngo siir peetuusyek che po katabaanennyi kobwanei, ko peetuusyechooto tugul che pwoonei korotiik che po simwo eng' ineendet kogergeitu ak peetuusyek che kitabaani: murwoon ineendet.

²⁶ Kergeitu itoogut age tugul ne rue eng' peetuusyek che mang'une korotiik ak itoogutap peetuusyegap katabaanennyi. Murwoniitu kiy age tugul ne tebee ko uu murwoonindap katabaanennyi.

²⁷ Murwoniitu age tugul ne twaei tuguuchooto, ak mwetei ngoroikyik, ak kouungei, ak murwoniitu agoi koimen.

²⁸ Ago ngo kagogeskei mandaetap simwekyik, koiityigei anyun peetuusyek tisap, ak tiliiliitu ye kagobata chooto.

²⁹ Eng' peetuut ne po sisiit konamjigei cheptugenik aeng', anan aarek aeng' che po cheptugenik, ak koipchi tisiindet, agoi kurgeetap emait ne kituiyechin.

³⁰ Ak kogoito tisiindet age kobunji kagoochinetap tengekto, age kobunji kagoochinet ne kibeelei, ak koyai tisiindet kagaigaet agobo ineendet eng' taitap Kamuktaindet ne Toroor amu mandaetap simwekyik.

³¹ “Ara anyun otabaani piigap Israel ko uu nooto agobo simwekwak, si ma pek kotinyei simwo, ye imurwon koonnyu ne miitei kwenunnywa.”

³² Po ng'atuutyoni ineendet ne tinyei kusereet, ak ineendet ne mandoe kesweegap iyoteet, ak murwoniitu amu nooto.

³³ Po kora kobogoryot ne kitabaani amu simwekyik, muren ne tinyei kusereet, po muren, ak ko po kobogoryo, ak ko po ineendet ne ruitos ak kobogoryo ne ma tiliil.