ATEPTAP LAWIK 14 - BUKUIT NE TILIIL Sireet ne Dutero Kanon

Katiliiletap myanwegap mogondosaik

¹ Ki mwachi `Kamuktaindet ne Toroor Musa koleenji,

² “Egu niito ng'atuutyet ne po chiito ne tinyei mogondosaik eng' peetuut ne po katiliilennyi. Kimutyin ineendet tisiindet,

³ mandoi tisiindet eng' nganaseet ak kogeer ineendet. Ngo kogosap koroitap mogondosaik eng' chiichooto komyani,

⁴ kong'at anyun tisiindet keip toriitik aeng' che tiliileen che saptos agobo ineendet ne kitiliili, kobooto keetitap taragonik, ngoryeet ne piriir ak husop.

⁵ Ak kong'at tisiindet kole kobar toriityon age eng' tereet ne po ng'ung'unyek, eng' paragutap peek che rootei.

⁶ Namei tisiindet toriityon ne sabei ak keetitap taragonik, ngoryeet ne piriir ak husop, ak korooch chooto tugul kobooto toriityon ne sabei, korotiigap toriityanooto kagibar eng' paragutap peek che rootei.

⁷ Ak koisee ineendet ne kitiliili eng' mogondosaik konyil tisap, ak komwaita kole tiliil. Yeityo kounda toriityanooto sabei kwo kewanin.

⁸ Mwetei ngoroikyik anyun chiichooto kitiliili, ak konem suumeekyik tugul, yeityo kouungei eng' peek, ak kotiliilit. Ye ibata nooto konyo nganaseet oriit, ak kotebee saang'utap emainnyi peetuusyek tisap.

⁹ Eng' peetuutap tisap konem suumeekyik tugul eng' metinnyi ak tamnennyi ak koroorigap koonyek. Inemu agot koroorikyik tugul, ak komwet ngoroikyik, ak kouungei, ak kotiliilit ineendet.

¹⁰ “Ak konam eng' peetuut ne po sisiit aarek aeng' che mengichik che libwoben, ak aarwetap keechiir, subeendo ne libwoop, ne ma siirei kenyiit agenge, ak kebebertap somok ne po litaiyat che po peek che ng'ootiin che tambulul, koek kagoochinetap peek, che ki kiburukto mwaita, ak taabeet ne ming'in ne po mwaita.

¹¹ Igoitoi tisiindet ne itiliili ineendet, chiichooto kitiliili ak tuguuchooto, eng' taitap Kamuktaindet ne Toroor, eng' kurgeetap emait ne kituiyechin.

¹² Ak konam tisiindet mengit agenge eng' areechooto po keechiir, kogoito koek kagoochinetap chalwokto, kobooto taabeet ne ming'in ne po mwaita, koongoi tuguuchooto koek kagoochinet ne kiongoi eng' taitap Kamuktaindet ne Toroor.

¹³ Enyei anyun mengoto ming'in eng' komosta ne kieng'e kagoochinetap tengekto ak kagoochinet ne kibeelei, eng' ole-tiliil. Amu ko uu ye punjin kagoochinetap tengekto tisiindet, ko uu nooto punjin ineendet kagoochinetap chalwokto; kogoochinet nooto ne Tiliil miising' kosiir.

¹⁴ Namei tisiindet korotiik alak eng' che po kagoochinetap chalwokto, ak konde walitap itit ne po tai ne po ineendet ne kitiliili, ak eng' mornet ne oo ne po eutap tai, ak eng' mornet ne oo ne po keldanyi ne po tai.

¹⁵ Yeityo konem tisiindet mwanik alak che mi taabeet, ak koroong'ji rubeitap eunnyi ne po kaataam,

¹⁶ ak korooch tisiindet mornennyi ne po tai mwaata mi eunnyi ne po kaataam, ak koisisye mwaata eng' mornennyi eng' taitap Kamuktaindet ne Toroor konyil tisap.

¹⁷ Ak mwaita ne kang'etune eutap tisiindet konde walitap itit ne po tai ne po ineendet ne kitiliili, ak eng' mornet ne oo ne po eunnyi ne po tai, ak eng' mornet ne oo ne po keldanyi ne po tai, eng' paragutap korotiigap kagoochinet ne po chalwokto.

¹⁸ Yeityo koroong'ji mwaita ne kang'etune euut metitap ineendet ne kitiliili, ak koyai tisiindet kagaigaet agobo ineendet eng' taitap Kamuktaindet ne Toroor.

¹⁹ Igoitoi tisiindet kagoochinetap tengekto, ak koyai kagaigaet agobo ineendet ne kitiliili amu murwoonindanyi. Ye ibata koeny kagoochinet ne kibeelei,

²⁰ ak kogoito kagoochinetap peek eng' kaptisisyet, ak koyai tisiindet kagaigaet agobo ineendet, ak kotiliilit.

²¹ “Ago ngo kibanania, amaimuuchi konyoor che yamegei ak kioto, kokweri anyun mengit agenge ne ming'in koek kagoochinet ne po chalwokto ne kiongoi, si koyai kagaigaet agobo ineendet, ak kiloit agenge ne po peek che ng'ootiin che tambulul che kagiburukto mwaita koek kagoochinetap peek, ak taabeet ne ming'in ne po mwaita.

²² Ibu kora cheptugenik aeng', anan aarek aeng' che po toriitik, ko uu ye imuuchi konyoor, ak kobunji age kagoochinetap tengekto, kobunji age kagoochinet ne kibeelei.

²³ Ingoipchi ineendet tisiindet tuguuchooto eng' peetuut ne po sisiit, kobunji katiliilennyi, eng' kurgeetap emait ne kituiyechin, eng' taitap Kamuktaindet ne Toroor.

²⁴ Ak konam tisiindet aarwetap keechiir ne po kagoochinetap chalwokto, ak taabeetap mwaita, ak koongoi chooto eng' taitap Kamuktaindet ne Toroor koek kagoochinet ne kiongoi.

²⁵ Yeityo koeny arwanooto po kagoochinetap chalwokto, ak ingoip tisiindet alak eng' korotiigap kagoochinetap chalwokto, ak konde walitap itit ne po tai ne po ineendet ne kitiliili, ak eng' mornet ne oo ne po eunnyi ne po tai, ak eng' mornet ne po keldanyi ne po tai.

²⁶ Ak koroong'ji tisiindet mwanik alak rubeitap eunnyi ne po kaataam,

²⁷ ak koisisye eng' mornennyi ne po tai mwanik alak che mi eunnyi ne po kaataam konyil tisap eng' taitap Kamuktaindet ne Toroor.

²⁸ Ak konde tisiindet mwanichooto alak che mi eunnyi, walitap ititap tai ne po ineendet ne kitiliili, ak eng' mornet ne oo ne po eunnyi ne po tai, ak eng' mornet ne oo ne po keldanyi ne po tai, eng' paragutap korotiigap kagoochinet ne po chalwokto.

²⁹ Yeityo koroong'ji tisiindet mwanik che kang'etune eunnyi, metitap ineendet ne kitiliili, si koyai kagaigaet agobo ineendet eng' taitap Kamuktaindet ne Toroor.

³⁰ Ye ibata kogoito agenge eng' cheptugenik, anan aarwet agenge ne po toriitik, ko uu ye imuuchi konyoor;

³¹ agot ko uu ye imuuchi konyoor, kobunji age kagoochinetap tengekto, ak kobunji age kagoochinet ne kibeelei, kobooto kagoochinetap peek. Yae tisiindet kagaigaet agobo ineendet ne kitiliili eng' taitap Kamuktaindet ne Toroor.

³² Niito ng'atuutyet ne po ineendet ne miitei koroitap mogondosaik oriitinnyi, ne ma imuuchi konyoor che yamei kitiliile.”

Katiliiletap mogondosaik eng' kooriik

³³ Ki mwachi `Kamuktaindet ne Toroor Musa ak Aron, koleenji,

³⁴ “Ye oit emetap Kanaan, ne agoonok kobunjook, ak ande koroitap mogondos koot age eng' emet ne punjinok,

³⁵ konyo anyun chiitap koyooto konyo komwachi tisiindet, koleenji miitei koroito koot.

³⁶ Kong'at anyun tisiindet kimaanda tuguuk tugul eng' ko, kotomo kwo ko tisiindet kogeer koroyooto, si mang'woneegitu tuguuk tugul che mi koyooto. Yeityo anyun kwo ko tisiindet kogeerot koot.

³⁷ Keerei koroito, ngot komi koroito inatusyegap koot, ak ngo mitoti kelongonik che machei ko nyalileen ak che machei ko piriireen, ak ngo lolondootin kosiir tooteet,

³⁸ komanda anyun tisiindet eng' koyooto agoi kurgat ak koger koyooto peetuusyek tisap.

³⁹ Ak konyo tisiindet kogeny eng' peetuut ne po tisap, nyoo kogeer, ak ngo keer ko tesoksei koroyooto eng' inatusyegap koot,

⁴⁰ kong'at anyun tisiindet, kicher koik che tinyei koroito, ak kewiirchi komosta ne ya eng' saang'utap nganaseet.

⁴¹ Ng'atei ineendet keng'oing'oi koot komoswek tugul eng' koot oriit, ak kotumji pichooto taartaarik che king'oing'oe koyooto saang'utap nganaseet komosta ne ya.

⁴² Yeityo koip koik alak, konde ole kami koik chugai, ak konam ineendet taartaarik alak, komale koot.

⁴³ “Ngo mong' koroito kogeny kotook eng' koot, ko kagoip koik koba saang', ak ko kagong'oing'oi ineendet koot, ak ko kagemal,

⁴⁴ konyo anyun tisiindet ko konyo kogeer, ak ngo katesak koroito eng' koot, ko mogondosaik che ng'emisyei eng' ko; ng'waan anyun koyooto.

⁴⁵ Ingobut koyooto, koikyik, ak keetiikyik, ak taartaarik tugul che po koyooto, ak koip chooto koba komosta ne ya eng' saang'utap nganaseet.

⁴⁶ Ak kogeny, ngwo chii koyooto kota ko kerat koot, kong'wanitu agoi koimen.

⁴⁷ Mwetei ngoroikyik ne karu koyooto ak ineendet ne kaamisye koyooto.

⁴⁸ “Ago ngwo ko tisiindet ak kogeer ko matesak koroito eng' koyooto ko kagemal, komwaita anyun tisiindet kole, tiliil koot, amu kagosap koot eng' koroyooto.

⁴⁹ Asi ki anyiny koyooto, konamei anyun ineendet toriitik aeng', keetitap taragonik, ngoryeet ne piriir ak husop.

⁵⁰ Parei toriityon age eng' tereetap ng'ung'unyek eng' paragutap peek che rootei,

⁵¹ ak konam keetitap taragonik, husop, ngoryeet ne piriir, kobooto toriityon ne sabei, ak korooch tuguuchooto korotiigap toriityon ne kagebar, ak eng' peek che rootei, ak koisee koot konyil tisap.

⁵² Ianyinyi anyun koot eng' korotiik che po toriityanooto, eng' peechooto rootei, eng' toriityanooto sabei, eng' keetitap taragonik, eng' husop ak eng' ngoryeet ne piriir.

⁵³ Ago ingounda anyun toriityon ne sabei kotiriren komanda eng' nganaseet kwo kewanin. Yaei anyun ko uu nooto kagaigaet agobo koot, ak kotiliilit.”

⁵⁴ Ni ng'atuutyet ne po koroito age tugul ne po mogondosaik, ne po kacheet,

⁵⁵ ne po ngoryeet ne tinyei mogondosaik, ak ne po koot,

⁵⁶ ole ibwansei, ole yaamaat moet ak ole ibwanat ne uu ngosyat;

⁵⁷ si kenae ye murwonen ak ye tiliileen. Niito ng'atuutyetap mogondosaik.