ATEPTAP LAWIK 13 - BUKUIT NE TILIIL Sireet ne Dutero Kanon

Ng'atuutik agobo mogondosaik

¹ Ki ng'alaalji `Kamuktaindet ne Toroor Musa ak Aron koleenji,

² “Ngoobwa iriryotap poortap chii, anan ngo piit moet ne kayaam, anan ole ibwanat ne uu ngosyat, ak koek koroito ne po mogondos eng' iriryotap poortanyi, kimut anyun kwo ole mi Aron tisiindet anan ko age eng' weeriikyik che tisiik.

³ Keerei tisiindonooto koroyooto miitei iriryotap poorto ak ngo kogowalak koroorik che mi koroyooto koleelagitu ak ngo kogororokto moanooto kwo oriit, ko kagoek koroito ne po mogondos. Ye kagogeer tisiindet komwaita anyun kole murwoon chiichooto.

⁴ Ago ngo leel ngosyat ne mi iriryotap poortanyi, ak ma lolondoot, ak ngo mawalak koroorikyik koleelagitu, kogerchi ui anyun tisiindet eng' peetuusyek tisap ineendet ne tinyei koroyooto.

⁵ Keerei tisiindet ineendet eng' peetuut ne po tisap, ngo keer kole ta ko uu yegonye koroyooto ak ma konenderi eng' iriryot, kogerchi ui anyun tisiindet ineendet peetuusyek tisap alak.

⁶ Keerei tisiindet ineendet kogeny eng' peetuut ne po tisap, ngo machei kola ak ma konenderi koroito eng' iriryot, komwaita anyun tisiindet kole kagotiliilit chiichi; kaagaa moet ne kayaam. Mwetei ineendet ngoroikyik, ak koek ne tiliil.

⁷ Ago ngo nender moet eng' iriryot ye kagoboorchigei tisiindet agobo katiliilennyi, konyolu koboorchigei tisiindet kogeny.

⁸ Keerei tisiindet, ak ngo keer kole kagonender moet eng' iriryot, komwaita anyun tisiindet kole murwoon ineendet; mogondos chuuto.

⁹ “Ye kagonam chii myandap mogondos, kimutyi ineendet anyun tisiindet.

¹⁰ Keerei anyun tisiindet, ak ngo leel ole ibwanat eng' iriryot ak kogowalak koroorik koleelagitu, ak kotook panyeek eng' ye koibwanat,

¹¹ ko mogondos che ki koamei keny iriryotap poortanyi, komwaita tisiindet kole murwoon chiichito. Ma keerei tisiindet ineendet, amu murwoon.

¹² Ngo mang'une mogondosaik ola tugul eng' iriryonnyi, ak koyom poorto tugul ne po ineendet ne tinyei koroito, kobooch metinnyi agoi keelyekyik, ne tee ne imuuchi kogeer tisiindet;

¹³ kogeer anyun tisiindet, ngo kogoyom mogondosaik poortanyi tugul, komwaita anyun kole tiliil chiichito tinyei koroito, amu kogowalak poorto tugul koleelit, tiliil ineendet.

¹⁴ Ago ye katook panyeek ko uu yegonye, ko murwoon ineendet.

¹⁵ Keerei tisiindet panyechooto ak komwaita kole murwoon chiichito. Murwooneen panyeechooto taagu, amu niito ko mogondos.

¹⁶ Ago ngo walak panyeek kogeny koleelagitu, konyo ineendet anyun ole mi tisiindet;

¹⁷ ak kogeer tisiindet ineendet, ak ngo kagowalak koroito koleelit, komwaita anyun tisiindet kole tiliil ineendet ne tinyei koroito. Tiliil anyun ineendet.

¹⁸ “Ngo pitunee iriryotap poorto ondiryet, ne kiga kosap,

¹⁹ ak ngo pitunee ole kami ondiryet kibwondo ne leel, anan ngosyat ne taagu ne leel ne machei ko piriir, koboorchi anyun tisiindet.

²⁰ Keerei tisiindet, ngo keer kole lolondoot eng' poorto ak kowalak koroorikyik koleelagitu, komwaita tisiindet kole murwoon ineendet. Niito koroito ne po mogondos ne kogomang'une ondiryet.

²¹ Ago ngo keer tisiindet kole ma mi koroorik che leelach, ama lolondoot eng' iriryot, ago ma taagu miising', kogerchi ui anyun tisiindet ineendet peetuusyek tisap.

²² Ngo nenderi eng' iriryot, komwaita anyun tisiindet kole murwoon ineendet; amu korot ne ya niito.

²³ Ago ngo matesak ngosiandanooto konender, ko kaagaa perutyetap ondiryet; komwaita tisiindet kole tiliil ineendet.

²⁴ “Anan ye tinyei chii ole kalal eng' iriryot ak kotook panyeekyik eng' olooto kalal, ak koigei yooto ngosyat ne leel ne piriir anan ko ne leel,

²⁵ kogeer anyun tisiindet kioto. Ngo kogowalak koroorik koleelagitu ak ko lolondoot, ko mogondos nooto ne kogomang'une ole kolal. Mwaitoi anyun tisiindet kole murwoon ineendet, amu koroito ne po mogondos niito.

²⁶ Ago ngo keer tisiindet kole ma mi koroorik che leelach ngosiandanooto ak ma lolondoot eng' iriryot ak ma taagu miising', kogerchi ui anyun tisiindet ineendet peetuusyek tisap.

²⁷ Ak kogeer tisiindet ineendet kogeny eng' peetuut ne po tisap, ak ngo nenderi eng' iriryot, komwaita anyun tisiindet kole murwoon chiichito, amu niito koroito ne po mogondos.

²⁸ Ago ngo matesak ngosiandanooto konender eng' iriryot, ama taagu miising', ko kabwanetap ole kolal, ak komwaita anyun tisiindet kole tiliil chiichi, amu niito ko perutyet kityo eng' ole kolal.

²⁹ “Ye tinyei mureno anan kobogoryo koroito eng' metit anan ko eng' tamnet,

³⁰ kogeer anyun tisiindet koroyooto. Ak ngo keer ko lolondoot eng' iriryot, ak miitei korooryet ne talelyo ak ko tenden, komwaita anyun tisiindet kole murwoon chiichi; moet niito ne uu kacheet, mogondos ne po metit anan ko tamnet.

³¹ Ago ngo keer tisiindet moanooto uu kacheet kole ma lolondoot eng' iriryot, ama mi koroorik che tuuen, kogerchi ui anyun tisiindet peetuusyek tisap ineendet ne tinyei koroyooto yaamei.

³² Ak kogeer tisiindet koroyooto eng' peetuut ne po tisap, ngo ma tesoksei moanooto, ama mi koroorik che talelyonen, ak ngo ma lolondoot moanooto eng' iriryot,

³³ kicherchi anyun metit, ago ma icheru ineendet ole mi kacheet. Keerei tisiindet eng' peetuusyek alak tisap chiichooto tinyei kacheet,

³⁴ ak eng' peetuut ne po tisap kogeer tisiindet moanooto. Ngo ma tesoksei moet eng' iriryot, ama lolondoot eng' yooto, komwaita anyun tisiindet kole tiliil ineendet. Ak komwet ngoroikyik, ak kotiliilit.

³⁵ Ago ngo tesak moet eng' iriryot ko kagobata katiliilennyi,

³⁶ kogeer anyun tisiindet ineendet. Ngo tesoksei moet eng' iriryot, koma cheeng'ei anyun tisiindet koroorik che talelyonen, amu murwoon ineendet.

³⁷ Ago ngo keer kole ma tesoksei kachaanooto ak kooro kole kogobityo koroorik che tuuen eng' yooto, kagosap kioto, kagotiliilok ineendet; ak komwaita tisiindet kole tiliil ineendet.

³⁸ “Ye tinyei mureno anan kobogoryo ole ibwanat ne uu ngosenik eng' iriryotap poortanyi, ngosen che leelach,

³⁹ kogeer anyun tisiindet, ak ngo ma leelachen miising' ngosenichooto eng' iriryotap poorwekwak; ko kaagaa tisonok kityo che komang'une iriryot; tiliil anyun ineendet.

⁴⁰ “Ngo pek suumeek eng' metitap chii, ko chii ne po poosto, ko tiliil ineendet.

⁴¹ Ak ngo pek suumeek eng' met ole po togoch, kotinyei poosto eng' togoch, ko tiliil ineendet.

⁴² Ago ngo miitei myando ne ibooru leelindo ne piriir eng' poosto anan eng' togoch, nooto ko mogondosaik che komang'une poostonyi anan ko togeennyi.

⁴³ Kogeer anyun tisiindet ineendet, ak ngo leel ne piriir myando ne ibwanat eng' poostonyi, anan ko eng' togeennyi, ko uu ye taagu mogondosaik eng' iriryotap poorto,

⁴⁴ ko ineendet ko chii ne po mogondos ak ko murwoon. Mwaitoi anyun tisiindet kole murwoon chiichi, amu mi koroto metinnyi.

⁴⁵ “Ilachei ne tinyei mogondosaik ngoroik che kibetak, ak kiyaatei metinnyi, tuchei kutit ye po parak ak koboloti kowachei koleen, ‘Aa ng'waan, aa ng'waan!’

⁴⁶ Murwoniitu ineendet peetuusyek tugul kotee koamei myanooto. Meng'iisyei ineegei; meng'ootennyi ko saang'utap nganaseet.

⁴⁷ “Kiboorchin tisiindet ngoryeet ne mi koroitap mogondosaik, ngo po ngoryonooto koroorigap keechiirek, anan ngo po katanit,

⁴⁸ anan ngo mitune usiisyek che ki kitoor anan che ki kimur, che po katanit, anan ngo che po koroorigap keechiirek, ngo magateet, anan eng' kiy age tugul ne kiyae magateet,

⁴⁹ ngo machei konyaliil anan ngo machei kobiriir koroyooto eng' ngoryeet, anan eng' magateet, anan eng' usiisyek che ki kitoore anan che ki kimure, anan eng' kiy age tugul ne ki kiyae magateet; niito ko koroito ne po mogondos.

⁵⁰ Ak kogeer tisiindet koroyooto, ak kogonor kioto tinyei koroito eng' peetuusyek tisap.

⁵¹ Keerei koroyooto eng' peetuut ne po tisap, ak ngo nenderi koroito eng' ngoryeet, ngo mitune usiisyek che ki kitoore anan che ki kimure, anan eng' magateet ne kiboisyee eng' kiy age tugul, ko mogondosaik che ng'emisyei; ng'waan kioto.

⁵² Peelei ngoryonooto anyun eng' ma, ngo po usiisyek che ki kitoor anan che ki kimur, ngo che po koroorigap keechiirek anan ngo che po katanit, anan kiy age tugul ne po magateet, ne tinyei koroito, amu nooto ko mogondosaik che ng'emisyei.

⁵³ “Ngo keer tisiindet kole ma tesaksei koroyooto eng' ngoryeet, ngo eng' usiisyek che ki kitoor anan che ki kimur, anan eng' kiy age tugul ne po magateet,

⁵⁴ kong'at anyun tisiindet kole kemwet kioto tinyei koroito, ak kogonor kioto eng' peetuusyek tisap alak,

⁵⁵ ak kogeer tisiindet, ko kagiundo koroyooto. Ak ngo mawalak koroyooto eng' saleiywekyik, amainenderi koroyooto, ko ng'waan anyun; ibeel eng' ma. Ng'emindet nooto, ngo mitune churateet oriit anan saang'.

⁵⁶ “Ak ngo keer tisiindet kole ma kotaagu komyee koroyooto ko kagemwet, kogereer ole mi koroyooto koisto eng' ngoryeet anan eng' magateet anan eng' usiisyek che ki kitoore anan che ki kimure;

⁵⁷ ak ngo ta ko taagu eng' ngoryeet, eng' usiisyek che ki kitoore anan che ki kimure, anan eng' kiy age tugul ne po magateet, ko koroito ne inenderi, ibeelei anyun kioto tinyei koroito eng' ma.

⁵⁸ Ago ngo kogobagaakta koroito ngoryeet, ngo ne po usiisyek che ki kitoor anan che ki kimur, anan kiy age tugul ne po magateet ne imwete, kemwet anyun ne po aeng', ak ko tiliilit.”

⁵⁹ Ni ng'atuutyet ne po koroitap mogondosaik ne mi ngoryeetap koroorigap keechiirek anan ko ne po katanit, anan eng' usiisyek che ki kitoore anan che ki kimure, anan eng' kiy age tugul ne po magateet, komwaita anyun kole tiliil, anan komwaita kole ng'waan.