ATEPTAP LAWIK 12 - BUKUIT NE TILIIL Sireet ne Dutero Kanon

Sigisyet ak katiliiletapkei

¹ Ki ng'alaalji `Kamuktaindet ne Toroor Musa koleenji,

² “Mwachi piigap Israel ileenji: Ngo manach kwony age tugul ak kosich weeriit, komi eng' murwoonindo eng' peetuusyek tisap. Murwoniitu ko uu eng' peetuusyegap myandanyi ne po arawet age tugul.

³ Ak eng' peetuut ne po sisiit kimuratani iriryotap poortap weerooto.

⁴ Ingotebee kwonyooto korotiigap katiliilennyi peetuusyek sosom ak somok. Matwaei ineendet kiy age tugul ne itabaanat, ama mong'u ole-tiliil agoi kogeskei peetuusyek che kitiliile ineendet.

⁵ Ago ngo sich chepto, komurwoniitu peetuusyek taman ak ang'wan, ko uu eng' peetuusyegap myandanyi. Ak tebyei eng' korotiigap katiliilennyi peetuusyek tamanwogik lo ak lo.

⁶ “Ye kagogeskei peetuusyegap katiliilennyi, agobo weeriit, anan ko chepto, koipchi tisiindet eng' kurgeetap emait ne kituiyechin aarwetap keechiir ne ma siirei kenyiit agenge koek kagoochinet ne kibeelei, ak aarwetap toriit, anan cheptuget koek kagoochinetap tengekto.

⁷ Igoitoi ineendet chooto eng' taitap Kamuktaindet ne Toroor, ak koyai kagaigaet agobo kwonyooto, ak kitiliil amu pandap korotiikyik. Po ng'atuutyoni ineendet ne sigisyei, ngo kagisich weeriit, anan ko chepto.

⁸ “Ngo ma imuuchi koal kwonyooto aarwetap keechiir, konam anyun cheptugenik aeng', anan ko aarek aeng' che po toriitik, po age kagoochinet ne kibeelei ak po age kagoochinet ne po tengekto; ak koyai tisiindet kagaigaet agobo ineendet, ak kotiliilit.”