ATEPTAP LAWIK 11 - BUKUIT NE TILIIL Sireet ne Dutero Kanon

Tyong'ik che tiliileen ak che ng'woneen

¹ Ki ng'alaalji `Kamuktaindet ne Toroor Musa ak Aron koleenji:

² “Omwachi piigap Israel oleenji: Chu tyong'ik che oame eng' tyong'ik tugul che miitei ng'wony.

³ Oame age tugul ne pcheotin siyok ak ko petotin komyee ak che itari paroi.

⁴ Ago moame chu eng' icheek che itari paroi anan eng' icheek che pcheotin siyok: tambeesik, amu itari paroi ago ma pcheotin siyok; ng'waan eng' okweek nooto.

⁵ Keneryet, amu itari paroi ago ma pcheotin siyok; ng'waan eng' okweek nooto.

⁶ Kiplengwet, amu itari paroi ago ma pcheotin siyok; ng'waan eng' okweek nooto.

⁷ Tooreet, amu pcheotin siyok ak ko petotin, ago ma itari paroi; ng'waan eng' okweek nooto.

⁸ Amat oam panyeekwak, amat otwaa ne kome eng' tyong'ichooto; ng'woneen eng' okweek chooto.”

⁹ “Omuuchi oam age tugul ne tinyei kebebaik ak peerik eng' tugul che mi peek, ngo eng' nyanjosyek anan ko ainoosyek.

¹⁰ Ago tugul che ma tinyei kebebaik ak peerik eng' nyanjosyek anan ainoosyek, eng' tugul che pendote peek ak tyong'in tugul che saptos eng' peek, chooto ko che kiwechei eng' okweek.

¹¹ Ingoek chooto che kiwechei eng' okweek, mat oam panyeekwak ak che kabek eng' tyong'ichooto ko egu che kiwechei.

¹² Age tugul ne ma tinyei kebebaik ak peerik eng' peek, ko egu nooto ne kiwechei eng' okweek.

¹³ “Chu eng' toriitik che ma ki amei ak che kiwechei: kipsiichit, motonda, chelogomyet,

¹⁴ chesirereet, keeret ak che kergei ak chooto;

¹⁵ chepkugit age tugul ak che kergei;

¹⁶ tyondap songolik, sugurut; toriityon ne leel ne po nyanjet, ak keeret age ak che kergei,

¹⁷ sugurut ne ming'in, toriityon ne po nyanjet, sugurut ne oo,

¹⁸ sugurut ne tinyei kuinoik, chebo kibabaa, chepsengwet,

¹⁹ kong'onyot, ak alak che kergei ak chelogomyet, chesululit ak reresyet.

²⁰ “Egu che kiwechei eng' okweek chooto tugul che tinyei kebebaik ak kong'onioti eng' ng'wony.

²¹ Ago omuuchi oam chu, eng' tyong'ik tugul che po kebebaik che pendote keelyek ang'wan: che tinyei keelyek che kooen che toroombene.

²² Eng' chooto tugul omuuchi oam chu: chereng'endet ak alak che po ooreennyi, talamwet ne kiguure kimekwan ak che po ooreennyi, keteryat ak che po ooreennyi, ak talamwet ak che po ooreennyi.

²³ Ago egu che kiwechei eng' okweek alak tugul che tinyei kebebaik che ing'oniote keelyek ang'wan.

²⁴ “Omurwoniitu eng' tuguuchooto; ak age tugul ne twaei poortap tyonyooto kagome ko murwoniitu agoi koimen.

²⁵ Age tugul ne ibei kebebertap poortap tyonyooto kagome komwetei ngoroikyik ak ko murwoniitu agoi koimen.

²⁶ Ng'waan eng' okweek tyony age tugul ne pcheotin siyok, ak koma petotin komyee, ak ne ma itari paroi, ak age tugul ne twaei chooto ko murwoniitu.

²⁷ Alak tugul che pendote mugungonikwak, eng' tyong'ik tugul che pendote keelyek tugul ang'wan, ko ng'woneen chooto eng' okweek; age tugul ne twaei poortap tyonyooto kame ko murwoniitu agoi koimen.

²⁸ Ingomwet ngoroikyik ne ibei poortap tyonyooto kame, ko murwoniitu agoi koimen; ng'woneen chooto eng' okweek.

²⁹ “Ng'woneen eng' okweek chu eng' che ichuutegei ng'wony: kungundo, muryat ne ming'in, ak ne kergei ak mororochet,

³⁰ ne po ooreetap chepswererit, nyirityet, chebenetyet, kimng'elyegut ak pung'ung'wet.

³¹ Chuuto che ng'woneen eng' okweek eng' tugul che ichuutegei, age tugul ne twaei ne kagome eng' chooto ko murwoniitu agoi koimen.

³² Ng'wanitu kiy age tugul ne ibutyin ne kagome eng' chooto, ngo kiy age tugul ne ki kiyae keetiik, anan ngor, anan mui, anan kuniet, kiy age tugul ne kiboisyee; nyolu kirooch peek ak murwoniitu agoi koimen, yeityo anyun koanyinyak.

³³ Ngo putyi age tugul eng' chooto tereetap ng'ung'unyek oriit, ko ng'wanitu kiy age tugul ne mi oriit, ak nyolu otui teronooto.

³⁴ Ng'woneegitu amitwogik alak tugul che kechobe peegap teronooto, ak ng'woneegitu tuguuk tugul che kiee che mi teronooto.

³⁵ Ak kiy age tugul ne ibutyin kebebertap poorto ne po tyondo ne kagome ko ng'wanitu. Ngo kapkoimaut, anan tereenik, kituei chooto amu ng'woneen. Ng'woneegitu chooto eng' okweek.

³⁶ Ago konda ne kutune peek anan keriinget ne mi peek ko tiliiliitu, ago ne twaei poortap tyondo ne kame ko murwoniitu.

³⁷ Ngo putyi peny age tugul ne po tyonyooto kame kesweek che ki koolei, ko anyinyen.

³⁸ Ago nginur keswechooto ak kobutyi peny age tugul ne po tyony ne kame, ko ng'wanitu eng' okweek.

³⁹ “Ngo me tyony age tugul ne oame, ko ineendet ne twaei poortap tyonyooto ko murwoniitu agoi koimen.

⁴⁰ Ak ne amei panyeegap nooto kame ko ingomwet ngoroikyik ak murwoniitu agoi koimen. Ingomwet ngoroik ne ibei tyonyooto kame ak murwoon ineendet agoi koimen.

⁴¹ “Egu eng' okweek ne kiwechei kiy age tugul ne ichuutegei ng'wony; ma ki amei.

⁴² Kiy age tugul ne ichuute moet ng'wony ak ne punei keelyek ang'wan, anan age tugul ne tinyei keelyek che chaang', chooto tugul che ichuutegei ng'wony ko moam amu kiwechei.

⁴³ Among'wanitkei eng' kiy age tugul ne ichuutegei ng'wony, amomurwongei eng' icheek si konamak murwoonindo.

⁴⁴ Amu aa Kamuktaindet ne Toroor Kamuktaindeng'wong', otabaangei anyun ak oegu che tiliileen amu aa tiliil. Amomurwongei eng' kiy age tugul ne ichuutegei ng'wony.

⁴⁵ Aa Kamuktaindet ne Toroor ne ki amutwak otogosu omang'une emetap Misiri, aek Kamuktaindeng'wong'; otiliiliitu anyun amu aa tiliil.”

⁴⁶ Ni ng'atuutyet anyun agobo tyong'in, toriit, kiy age tugul ne sabei ne wendoti eng' pei ak kiy age tugul ne ichuutegei ng'wony;

⁴⁷ si kobiit koobeesyo che ng'woneen ak che ma ng'woneen, che saptos che ki amei ak che saptos che ma ki amei.