ATEPTAP LAWIK 10 - BUKUIT NE TILIIL Sireet ne Dutero Kanon

Meetap Nadap ak Abiu

¹ King'etyo anyun weeriigap Aron, Nadap ak Abiu, konam chii tugul tereennyi ak konde maat oriit, yeityo konde oriit nyamdutik che kibeelei; ak ki igoito icheek eng' taitap Kamuktaindet ne Toroor maat ne teer ne ki ma ng'at ineendet.

² Ki mong' anyun maat ne ki pun taitap Kamuktaindet ne Toroor ak kobeel icheek, ak ki pek eng' taitap Kamuktaindet ne Toroor.

³ Ki leenji Musa anyun Aron, “Ni kiit ne ki mwa Kamuktaindet ne Toroor kole, ‘Eng' icheek che riikyino aegu ne tiliil, ak eng' taitap piik tugul anyooru toroornatet.’ ” Ak ki siis Aron.

⁴ Ki kuur anyun `Musa Mishael ak Elzaphan, weeriigap Uzziel chiitap ooreetap Aron, ak koleenji, “Obwa oriigu, osut tupchosyekwok komanda eng' ole-tiliil koba saang'utap nganaseet.”

⁵ Ki pwa anyun pichooto ak kosut icheek, kotinyei ngoroikwak che kooen koba saang'utap nganaseet, ko uu ye ki kamwa Musa.

⁶ Ki leenji `Musa Aron ak weeriikyik, Eleazar ak Ithamar, “Amat oyat metowekwok ak amogereer ngoroikwok, si obegu ak konereekyi ineendet tuiyet komugul. Ago ingoriiryo tupchosyekwok, koot komugul ne po Israel amu maat ne kagoyook Kamuktaindet ne Toroor.

⁷ Amomande eng' kurgeetap emait ne kituiyechin, si obegu; amu otinye okweek mwaitap kailset ne po Kamuktaindet ne Toroor.” Ak ki yai icheek ko uu ki mwa Musa.

⁸ Ki mwachi `Kamuktaindet ne Toroor Aron koleenji,

⁹ “Amat iee divain anan maiyo alak tugul inyee ak weeriiguk ye obendi emait ne kituiyechin, si mobegu. Egu niito ng'atuutyet ne po agoi eng' ibinwekwok tugul.

¹⁰ Obeesye anyun che itabaanatiin ak che ma itabaanatiin, che ng'woneen ak che tiliileen.

¹¹ Oneet piigap Israel ng'atuutik tugul che ki komwachi `Kamuktaindet ne Toroor icheek eng' Musa.”

¹² Ki leenji `Musa Aron ak weeriikyik che ki ng'et, Eleazar ak Ithamar, “Oip kagoochinetap peek che kang'etune kagoochinoik che kigoochin Kamuktaindet ne Toroor che kobun maat, ak oam koma kinde mermereek eng' ole neegitee kaptisisyet, amu tiliileen miising'.

¹³ Oame eng' ole-tiliil, amu kebebertang'ung' niito ak weeriiguk, eng' kagoochinoik che punei maat che kigoochin Kamuktaindet ne Toroor, amu ki king'ata ko uu nooto.

¹⁴ Ago omuuchi oam inyee ak weeriiguk ak tiibiiguk eng' komosta ne tiliil tagateet ne kiongoi ak chaatit ne kinamjin parak; amu kagigonnin chooto koek kebebertang'ung' ak lagoguk eng' tiseiywegap kagoochinoik che po kaalyeet eng' piigap Israel.

¹⁵ Ibu `icheek chaatit ne kinamjin parak ak tagateet ne kiongoi kobooto kagoochinoik che punei maat che po mwanik ak koongoi koek kagoochinet ne kiongoi eng' taitap Kamuktaindet ne Toroor, yeityo kobunjiin ak weeriiguk koek ng'atuutyet ne wendi agoi koigeny, ko uu ye ki ng'at Kamuktaindet ne Toroor.”

¹⁶ Ki cheeng' anyun Musa miising' ng'orooryet ne po kagoochinetap tengekto, ak ki nai kole kiga kebeel! Ki nereekyi `Eleazar ak Ithamar weeriigap Aron che ki ng'et, ak koteebe icheek koleenji,

¹⁷ “Amu nee si moam kagoochinetap tengekto eng' ole-tiliil? Amu tiliil miising' kot; kagogoonok ineendet nooto koip tengektap tuiyet, si koyai kagaigaet agobo icheek eng' taitap Kamuktaindet ne Toroor.

¹⁸ Ko uu ye ma ki ip korotiikyik kobwa ole itabaanat oriit, kaganyol anyun oam eng' ole-tiliil oriit ko uu ye kagang'atak.”

¹⁹ Ak ki leenji `Aron Musa, “Keero, kabwa rani nyoo kogoitoi kagoochinennywa ne po tengekto ak kagoochinennywa ne kibeelei eng' taitap Kamuktaindet ne Toroor, ak kagobwanjo anyun tugun che uu chu. Nda kagaam kagoochinetap tengekto rani, ko tos, kata myee nooto eng' taitap Kamuktaindet ne Toroor?”

²⁰ Ak ye kingo kas Musa nooto, komyeeit eng' ineendet.