ATEPTAP LAWIK 1 - BUKUIT NE TILIIL Sireet ne Dutero Kanon

Kagoochinoik che kibeelei

¹ Ki kuur `Kamuktaindet ne Toroor Musa ak kong'alaalji eng' emait ne kituiyechin, koleenji,

² “Mwachi piigap Israel leenjin, ‘Ye igoitoi chii age tugul eng' okweek kagoochinet kogoochin Kamuktaindet ne Toroor, kogoitoi che po akwotisyek, che po tuuga ak che po neego.’

³ “Ngo kagoochinennyi ko po tiseiywot ne kibeelei ne po tuuga, kogoitoi kirgit ne libwoop. Ingokweri kwo emait ne kituiyechin si kochamak eng' taitap Kamuktaindet ne Toroor.

⁴ Ingogonoor eunnyi metitap kagoochinonooto kibeelei si ketaach nooto ak keyai kagaigaet agobo ineendet.

⁵ Yeityo koeeny kirgooto eng' taitap Kamuktaindet ne Toroor. Ingoip korotiik tisiik, weeriigap Aron, ak koisote kaptisisyet komoswek tugul, che mi ole neegitee kurgeetap emait ne kituiyechin.

⁶ Ak koeeny ineendet kagoochinonooto kibeelei, yeityo kosach panyechooto kobiit kebeberwekyik.

⁷ Ingonde maat kaptisisyet weeriigap Aron tisiindet ak kotetyi kweenik ma.

⁸ Ye ibata kotet panyechooto kagesach tisiik, weeriigap Aron. Ingotet metit ak mwanikyik eng' kweenik parak che mi maat ne mi kaptisisyet.

⁹ Ago ingoun eng' peek tuguugap ke kobooto keelyekyik ak kobeel tisiindet kirgooto komugul eng' kaptisisyet. Niito ko tiseiywot ne kibeelei, kagoochinet ne punei maat, nyamdutyet ne anyiny eng' Kamuktaindet ne Toroor.

¹⁰ “Ngo po kagoochinennyi ne kibeelei neego che po keechiirek anan che po ng'oroorek ko ingogoitoi mengit anan kwesta ne libwoop.

¹¹ Ingoeeny eng' taitap Kamuktaindet ne Toroor eng' kaptisisyet ole tokyingei murot kaataam. Ye ibata koisote tisiik weeriigap Aron korotiik kaptisisyet komoswek tugul.

¹² Ingosach anyun ineendet panyeek kobiit kebeberwekyik, kobooto metitap artanooto ak mwanikyik. Yeityo kotet tisiik tuguuchooto eng' kweenik parak che lalei ne mi kaptisisyet.

¹³ Ago ingoun tuguugap ke ak keelyek eng' peek. Ingogoito tisiindet panyeek tugul ak kobeel eng' kaptisisyet. Niito ko kagoochinet ne kibeelei, kagoochinet ne punei maat, nyamdutyet ne anyiny eng' Kamuktaindet ne Toroor.

¹⁴ “Ngo po toriitik kagoochinennyi ne kebeelei ne igoochin Kamuktaindet ne Toroor, ko ingogoito anyun cheptugenik anan ko aaregap cheptuget.

¹⁵ Yeityo koip tisiindet konyo kaptisisyet ak koiiny kaatinnyi kong'et metit. Ingobeel eng' kaptisisyet ak kochiilji korotiikyik tabandap kaptisisyet.

¹⁶ Ingonem kebonjorennyi ak tuguukyik ak kowiirchi kaptisisyet taban ole tokyingei kong'asiis, olooto olemi oreek.

¹⁷ Yeityo kogereer kopcheune aeng' kebebaikyik amat koobeesyo. Ingobeel tisiindet chooto eng' kaptisisyet eng' kweenik che mi ma. Niito kagoochinet ne kigoitoi kebeel, kagoochinet ne punei maat, nyamdutyet ne anyiny eng' Kamuktaindet ne Toroor.”