AMOS 7 - BUKUIT NE TILIIL Sireet ne Dutero Kanon

NG'ANG'UTIK AGOBO KIRWOOGET Ng'ang'utyet ne tai: Chereng'enyinik

¹ Ki iboorwo Kiptaiyat Kamuktaindet ne Toroor ko uu ni: ogeero, ki yai ineendet chereng'enyinik ye kibiitoos tuguuk che po let; ogeero, ki tuguuk che po let che kibiitoos ye kingo kagobata ng'eetap susweek che po laitoryat.

² Ak ye kingo kagoam susweek kogees eng' emet, ale anyun, “Ee Kiptaiyat Kamuktaindet ne Toroor, asaain ale, nyochi kaat. Tonondoi ano Jakobo? Ming'in inee miising'!”

³ Ki wal Kamuktaindet ne Toroor kabwaatutikyik agobo niito; kole “Ma piitu ko uu nooto,” mwaei Kamuktaindet ne Toroor.

Ng'ang'utyet ne po aeng': Maat

⁴ Ki iboorwo Kiptaiyat Kamuktaindet ne Toroor ko uu ni: kiguur Kiptaiyat Kamuktaindet ne Toroor maat kobeelisye; ak ki peel rireet ne oo ak konam kobeel emet.

⁵ Yeityo amwa ale, “Ee Kiptaiyat Kamuktaindet ne Toroor, asaain ale isiis! Tonondoi ano Jakobo? Ming'in inee miising'!”

⁶ Ki wal Kamuktaindet ne Toroor kabwaatutikyik agobo niito; “Ma piitu niito agine,” mwaei Kiptaiyat Kamuktaindet ne Toroor.

Ng'ang'utyet ne po somok: Porowet ne kilititisye

⁷ Ki iboorwo ineendet ko uu ni: ogeero, kitonone Kiptaiyat ole neegitee inaatut ne ki kilitite porowet, kotinyei eng' eunnyi porowet ne kilititisye.

⁸ Ak ki leenjo Kamuktaindet ne Toroor, “Amos, igeere nee?” Ak ki ale, “Ageere porowet ne kilititisye.” Ki le anyun Kiptaiyat, Keero, andoi porowet ne kilititisye kwenutap piikyuk Israel; ma abune kogeny ole mi icheek,

⁹ ak koguber komoswek che torooreen che po Isak, ak kebut oldinwek che tiliileen che po Israel; ak ang'eet abar kootap Jeroboam eng' rotwetap chok.

Amos ak Amasia

¹⁰ Ki iyookto anyun tisiindet Amasia ne po Bethel keguur Jeroboam laitoryatap Israel, keleenji, “Kogochaamin Amos eng' kwenutap kootap Israel; ma imuuchi emet komuita eng' ng'aleekyik tugul.

¹¹ Amu mwaei Amos kole, ‘Kibarei Jeroboam eng' rotwetap chok, ak keluul iman Israel kimut eng' emennyi.’ ”

¹² Ki leenji kogeny `Amasia Amos, “Ee inyee, keerindoni, ui mwechi emetap Judah, iamisye eng' olooto, ak imaoten eng' olooto:

¹³ ago mat kota imaoten kogeny eng' Bethel, amu olooto ko oldo ne tiliil ne po laitoryat, ak ko kootap laitornatet.”

¹⁴ Ki wolji anyun `Amos Amasia, koleenji, “Ma aa maotyot ak ma aa weeriitap maotyot. Anee ko aa mestowot ak aa saborindetap mogoonik.

¹⁵ Ki kuura Kamuktaindet ne Toroor ayagisyei, ak ki leenjo Kamuktaindet ne Toroor, ‘Ui maotenji piikyuk Israel.’

¹⁶ Kas anyun nguno ng'olyootap Kamuktaindet ne Toroor. Imwae inyee ile, ‘Amat imaotenji Israel agobo kiy ne ya, anan imwa ng'olyoo agobo kootap Isak.’

¹⁷ Mwaei anyun Kamuktaindet ne Toroor kole: ‘Egu osotyondeng'ung' chepkugoniot eng' nganaseet, ak kebare rotwetap chok weeriiguk ak tiibiiguk, ak kepchee porowet emeng'ung'; ak imee inyeendet eng' emet ne ng'waan, ak keluul iman Israel kimut eng' emennyi.’ ”