AMOS 5 - BUKUIT NE TILIIL Sireet ne Dutero Kanon

Riirek agobo Israel

¹ Ogas ng'olyoondoni amwae eng' riirek agobo okweek, ee kootap Israel.

² Kagobut, ma kong'eetei kogeny, pergeiyatap Israel; kagewiirta eng' emennyi, ma mi chii ne ing'eeti.

³ Amu mwaei Kiptaiyat Kamuktaindet ne Toroor kole: “Nganaseet ne kocham komandoe piik eliphuut kong'etyin pogolu, ak ne kocham komandoe piik pogolu kong'etyin tamanu.” Ng'etyin chooto tugul kootap Israel.

Kuurset kowalak Israel

⁴ Amu mwachin Kamuktaindet ne Toroor kootap Israel kole: “Ocheeng'a si osapche!

⁵ Amocheeng' Bethel, anan obe Gilgal, amosiirte obe Beer-sheba. Amu kiluulei iman Gilgal, ak koek puch Bethel.”

⁶ Ocheeng' Kamuktaindet ne Toroor si osapche, si ma lal ko uu maat eng' kootap Joseph, ak kobeel Bethel kogees, ama piitu chii ne imisi.

⁷ Ee okweek che oweechi kirwooget koek ng'wonet, ak owiirchini ng'wony imanda!

⁸ Ineendet ne yaei Koremerik ak Kapsomoguk, ak kowalei mesundeito ne nyigiis koek karonet, ak koyaei peetuut koek kemoi; ineendet ne kuurei peegap nyanjet, ak koroong'ji ng'wony; Kamuktaindet ne Toroor kainennyi;

⁹ ne ipchin che kiimeen ng'emisyet koche, si konyonji ng'emisyet irimeet.

¹⁰ Wechei icheek ineendet ne kerei kong' eng' ormariichet, ak kowechei icheek chiito ne mwaei che litit.

¹¹ Amu ki otyechatyech kibananook, ak omage icheek peek eng' kimnateet. Ki oteech anyun kooriik eng' koik che ki kiwai, ago momenye koorchooto; ki omiin mbareenik che korooron che po sabibuk, ago moee divaikwak.

¹² Amu angen ole tee chaang'indap pistaosyekwok ak ole tee ooindap tengekwogikwok; okweek che onyalili piik che po iman, che otaache tuguuk che po kagaigaet, ak omaasi che ma tinyei kiy eng' ormariichet si ma nyoor imandanywa.

¹³ Siisei anyun ne ng'oom eng' peetuusyek che uu chooto; amu yaacheen peetuusyechooto.

¹⁴ Ocheeng' che myach ak koma yaityet, si osapche; si kotep kobootok Kamuktaindet ne Toroor, Kamuktaindet ne po lugoosyek, ko uu ye omwae.

¹⁵ Owech yaityet ak ocham che myach, ak ogimiit kirwooget eng' ormariichet; abeere imuuchi koriiree Kamuktaindet ne Toroor, Kamuktaindet ne po lugoosyek, che ki ng'et che po Joseph.

¹⁶ Mwaei anyun Kamuktaindet ne Toroor, Kamuktaindet ne po lugoosyek, ineendet Kiptaiyat, kole, piitu kateeiyet eng' ortinwek tugul che paraen; ak komwa eng' ortinwek tugul kole, pwo! pwo! Ak koguur kabatindet konyo koriir, ak koguur che ingen koteiyo, koriiryo.

¹⁷ Ak kobiit riirek eng' mbareenik tugul che po sabibuk; amu abune kwenung'ung', mwaei Kamuktaindet ne Toroor.

Peetuutap Kamuktaindet ne Toroor

¹⁸ Pwo eng' okweek che omache peetuutap Kamuktaindet ne Toroor! Amu nee si omache peetuutap Kamuktaindet ne Toroor? Mesundeito peetuunooto, ma lapkeiyet;

¹⁹ ko uu ye kamwee `chiito ng'etundo, ak kotuiye magalaluut; anan ko uu chii ne kawo ko ak kotiing'e eunnyi inaat, ak kosus ereneet ineendet.

²⁰ Tos ma imenitu peetuutap Kamuktaindet ne Toroor ama lapkeitu? Ee, imenitu miising' ama mi kaluunet.

²¹ Aweche, asase igoorwekwok, amabaibaitune tuiyosyekwok che po kaming'inetapkei.

²² Ee, agot ngo koono kagoochinoikwok che kibeelei ak kagoochinoikwok che po peek che ng'ootiin, ko mataache; ak kagoochinoikwok che po kaalyeet, che po che kiyagi che akwaen koma iiti.

²³ Oistoena cheetap tyenwogikwok; amu ma mache agas anyinyindap kibugandinikwok.

²⁴ Ago ingoroot kirwooget ko uu peek, ak ingoroot imanda ko uu aineet ne nyiitaat peek.

²⁵ Ee kootap Israel, tos ki ma oibwa tiseiywek ak kagoochinoik eng' surkwen kenyiisyek artam?

²⁶ Ee, ki oeet Sakut laitoryandeng'wong', ak Kaiwan kanamonikwok, kecheiyatap kamuktaindeng'wong', che ki oyachigei.

²⁷ Agoitook anyun keluulok, kimutak osiir Damasko, mwaei Kamuktaindet ne Toroor, ne kainennyi ko Kamuktaindet ne po lugoosyek.