AMOS 4 - BUKUIT NE TILIIL Sireet ne Dutero Kanon

¹ Ogas ng'olyoondoni, okweek tuugap Bashan, che miitei tulweetap Samaria, che sastoe kibananook, che tyekyin ng'wony che ma tinyei kiy, che leenjin kiptainikwak, “Oibu, kee!”

² Ki koyosyo Kiptaiyat Kamuktaindet ne Toroor eng' tiliilindanyi kole, “Ogeero, pwonjinok peetuusyek, che tuun imutenok kombook, ak komute chekwok che ng'etu kombook che kiname njireenik.

³ Ak omande obun komoswek che kibutok eng' irimeet, kotokyigei age tugul tainnyi; ak owiirchigei Harmon, mwaei Kamuktaindet ne Toroor.

Tom kolitiit ortinwekyik Israel

⁴ Obwa Bethel, si ongelelse; obwa Gilgal, si otes pistoet; oibu tiseiywekwok karonet age tugul, ak kebeberwekwok che po taman eng' peetuut age tugul ne po somok;

⁵ ak ogoite korosyotap kongoi ne po kiit ne kaginde mermereek, ak omwaite kagoochinoigap chamyet, ak obarte; amu ochame niito, ee piigap Israel, mwaei Kiptaiyat Kamuktaindet ne Toroor.

⁶ Ki agoonok agine iljet eng' nganasookwok tugul, rartaetap amitwogik eng' komoswekwok tugul, ago tomo oweekyage, mwaei Kamuktaindet ne Toroor.

⁷ Ak ki aeetenak kogeny ropta, ye ki tomo arawek somogu si koit kesisyet. Ki agoochi korobonji nganaseet age, ak aeete ropta nganaseet age. Kirobonji komosta ne ming'in, ak ki yaam komosta ne ma robonji.

⁸ Koombeniot anyun nganasook aeng'u anan ko somok koba nganaseet age si koe peek, ago ma yam; ago tomo oweekyage, mwaei Kamuktaindet ne Toroor.

⁹ Ki abirenok chelalityet ak uchatet, ki am munene mbareenikwok che chaang' ak mbareenikwok che po sabibuk, ak mogoonikwok ak mseitunikwok; ago tomo oweekyage, mwaei Kamuktaindet ne Toroor.

¹⁰ Ki ayookwok koroito ko uu ni ki po Misiri; ki abar murenikwok eng' rotwetap chok, ak ki akweri paraisisyekwok; ak ki ayai pulatetap nganaseng'wong' kotogos kot koit seruunekwok; ago tomo oweekyage, mwaei Kamuktaindet ne Toroor.

¹¹ Ki ang'em ageesu alak eng' okweek, ko uu ye king'em Kamuktaindet Sodom ak Gomorah kogees, ak kio uu mecheita ne kaginemune maat; ago tomo oweekyage, mwaei Kamuktaindet ne Toroor.

¹² Ayaun ko uu nooto anyun, ee Israel; ak amu ayaun anyun ko uu niito, choboge anyun otuiye ak Kamuktaindeng'ung', ee Israel.”

¹³ Amu, keero, ineendet ne yaei tuloonook, koyaei usoonet, ak komwachin chii kabwaatennyi, ineendet ne yaei karonet koimenit, ak kotyechei komoswek che torooreen che po ng'wony; kainennyi ko Kamuktaindet ne Toroor, Kamuktaindet ne po lugoosyek.