AMDOINDET 8 - BUKUIT NE TILIIL Sireet ne Dutero Kanon

¹ Ng'oo ne kergei ak chiito ne utaat? Ak ng'oo ne ingen kaweegetap kiy? Igoochin ng'omnatetap chiito togeennyi kooluu, ak kowalak uuindap togeennyi.

Koonyit laitoryat

² Aboorun ale, riip ng'atuutyetap laitoryat ak ibwaat ile ki iyasye eng' Kamuktaindet.

³ Amesip iwe eng' tainnyi; ameyai kiy ne ya kotugul. Amu yaei laitoryat kiy age tugul ne iboiboegei.

⁴ Amu tinyei kimnateet ng'olyootap laitoryat; ak ng'oo ne imuuchi koleenji ineendet, “Iyae nee?”

⁵ Ma naei kiy ne ya age tugul ne riibei ng'atuutyet, ak ibestos muguleldap chiito ne utaat peetuusyek ak kirwooget.

⁶ Amu mi peetuut ak kirwooget ne po ng'olyoot age tugul, amu oo nyalilda ne tinyei chiito eng' chooto.

⁷ Amu ma naei kiit ne piitu, amu tos ng'oo ne imuuchi komwachi ineendet ole piitundoi kioto?

⁸ Ma mi chii ne tinyei kimnateet eng' koriisto si kogirinda koriis; anan kotinyei kimnateet koboi peetuutap meet; ama mi undaet eng' lugonooto. Ama saru yaityet ineendet ne igoochingei yaityonooto.

⁹ Ki ageer chuuto tugul, ki agiilji muguleldanyu poisyet age tugul ne kiyaei eng' kurereetap asiista. Miitei peetuut ne tinyei chiito age kimnateet koboi age si kogoochinegei nyalilda.

¹⁰ Ak ki ageer ketubei kiptengeginik, ak ki pa kererit. Ki pa eng' ole-tiliil piik che ki yai ne myee ak ki kiutye icheek eng' nganaseet. Puch niito agine.

¹¹ Amu ma sip kirwookyin poisyet ne ya, konyooru anyun mugulelwegap piik mageet koyai yaityet.

¹² Agot ngo yai kiptengekyot yaityet konyil pogol, ak kotesak peetuusyekyik, angen ui tugul ale, myeeitu eng' icheek che iywei Kamuktaindet, che iyweisyei ineendet eng' tainnyi.

¹³ Ago ma myeeitu eng' kiptengeginik, ama tesoksei peetuusyekyik che uu urwet, amu ma iyweisyei eng' taitap Kamuktaindet.

¹⁴ Mi tangoita ne yaaksei eng' ng'wony; amu mi piik che po iman, che piityin kiy ko uu poisyonigap kiptengeginik; komi piik che yaach che piityin kiy ko uu poisyonigap che po iman. Ki amwa ale, tangoita niito agine.

¹⁵ Ki alasu anyun poiboiyet, amu ma tinyei chii kiy ne myee eng' kurereetap asiista kobatee koam, koeei ak kobaibait. Amu tebyei nooto kobooto ineendet eng' poisyennyi, eng' peetuusyek tugul che po sabeennyi, che ki igoochi `Kamuktaindet ineendet eng' kurereetap asiista.

¹⁶ Ye ki agiil muguleldanyu konai utaatyet ak ageer poisyet ne kiyaei eng' ng'wony, ko ki ageer ale mi ne ma inuuchi peet anan kemoi.

¹⁷ Ki ageer anyun poisyonik tugul che po Kamuktaindet, ale ma imuuchi chii konai poisyet ne kiyaei eng' kurereetap asiista. Amu agot ngo kiilgei chiito ne tai, kole kocheeng', koma nyooru; ee, agot ngo leen chiito ne utaat konai, koma imuuchi konyoor.