AMDOINDET 4 - BUKUIT NE TILIIL Sireet ne Dutero Kanon

¹ Ki aweege anyun ak ageer usiisyosyek tugul che kiyaei eng' kurereetap asiista. Mi riiregap che ki kius, ama tinyei kagaigaindet, ak ki tinyei kimnateet usiikwak, ago ki ma kotinyei kagaigaindet.

² Ki alasu anyun che ki kobek kosiir che ta kosaptos;

³ Ki aiit ale kaigai ineendet ne tomo kesich, ne tomo kogeer poisyet ne ya ne kiyaei eng' kurereetap asiista.

⁴ Yeityo ageer poisyet tugul ak poisyet age tugul ne po utaatyet, ale amei kimegei chii agobo chiitap kokwennyi. Puch niito agine ak ko kaimetapkei ne po puch.

⁵ Namjin ne perber eunekyik tegeet, eng' let kome eng' rubeet.

⁶ Kaigai kererutyet kobooto siisek, kosiir kererutik aeng' ak pirtoetapkei, ak kaimetapkei ne po puch.

⁷ Ki aweege anyun ak ageer tangoita eng' kurereetap asiista:

⁸ Mi age ne mi ineegei, ama tinyei ne rubei; ma tinyei weeriit anan ng'eetap kamet; nganda uu nooto, koma mi kagesunet ne po pirtoennyi pogei tugul, ama piyonyi konyekyik mogornatosyek. Leen, “Aboisyechini ng'oo ak arebee saboondanyu kiit ne myee?” Puch niito agine, poisyet ne po nyalilda.

Kamanuutyetap chii ne chorwa

⁹ Kaigai aeng'u kosiir agenge, amu nyooru melekto ne myee eng' poisyennywa.

¹⁰ Amu ngo putyo, kong'eeti age chorwennyi: ago pwo eng' ineendet ne ibuti komi ineegei, ama mi age ne ing'eeti ineendet.

¹¹ Kogeny, ngo ruiyo aeng'u kolalang'itu: ago nyoorundoi ano lalang'indo chiito agenge?

¹² Ak ngo terteer `chiito ineendet ne mi ineegei, komuuchi aeng'u kogirinda ineendet; ak ma sip kong'etei porowet ne kisoniot somok.

¹³ Kaigai nerana ne kibanania, ne utaat, kosiir laitoryat ne oos ne perber, ne ma naei kota kotaach kateunet.

¹⁴ Amu ki mang'une korgoreet konyo koek laitoryat; ee, ki kisichei ko panan eng' laitornatet.

¹⁵ Ki ageer tugul che saptos che pendoti eng' kurereetap asiista, komi kobooto neraneet ne po aeng', ne ki tonon kogeer ineendet.

¹⁶ Ki ma komi kagesunetap piik tugul, agot ne po icheek tugul che ki pou. Ago ma poiboitune ineendet icheek che piitu let. Puch niito agine iman ak kaimetapkei ne po puch.