AMDOINDET 2 - BUKUIT NE TILIIL Sireet ne Dutero Kanon

Asenetap kabaibaetapkei

¹ Ki amwa eng' muguleldanyu ale, “Ara anyun, atyeme abaibaigei eng' poiboiyet: Abaibait eng' kiy ne myee.” Ago keero, ki ek puch niito agine.

² Ki amwa agobo roryot ale, Abusanateet ak agobo poiboiyet, ale, “Yaei nee?”

³ Ki asyaach eng' muguleldanyu ole aboiboititoi poortanyu eng' divaik, kondoiywa muguleldanyu eng' utaatyet, ak ole anamdoi perberyo, kot amuuch ageer kiit ne nyoljin weeriigap piik koyai eng' kurereetap kipsengwet eng' peetuusyekwak tugul.

⁴ Ki ayachigei poisyosyek che eecheen; ki ateekyigei kooriik; ki aminjige sabibuk;

⁵ ki abatyige mbareenik ak achop ole kiuure, ak ki aminji yooto keetiik che po logoek alak tugul.

⁶ Ki ayachigei tamboinik, si kobiit abise timiin ne ki kiminji keetiik.

⁷ Ki aal otwogik che murenik ak che tiibiik, ak ki atinye otwogik che ki kisikyi koonnyu; ki atinye kogeny akwotisyek che chaang' che po tuuga ak che po keechiirek, kosiir tugul che ki indounena eng' Jerusalem.

⁸ Ki ayumjige kogeny fedha ak thahabu, ak konoraik che korooron che po laitorinik ak che po emotinwek: ki alewenjigei tyeniik che murenik ak che kwonyiik ak poiboiyosyegap weeriigap piik, chebaigeinik che chaang'.

⁹ Ki aa oo anyun ak ki atesage asiir tugul che ki indounena eng' Jerusalem; ak ki atepte utaatyennyu.

¹⁰ Ak ki ma aeete konyekyuk kiy age tugul ne kimach: ma aeete muguleldanyu poiboiyet age tugul, amu ki paibait muguleldanyu eng' poisyennyu tugul; ak ki niito kebebertanyu eng' poisyennyu tugul.

¹¹ Ki ageer anyun poisyonik tugul che ki ayai, ak poisyet ne kiga abirtochigei ayai. Ogeero, puch tugul ak kaimetapkei ne po puch ak ki ma komi keluno eng' kurereetap asiista.

¹² Ki awelelgei anyun acheeng' utaatyet, ak iywek ak perberyo. Tos nee ne imuuchi koyai chiito ne isubu laitoryat? Kobatee nooto ne ki keyai.

¹³ Ki ageer anyun ale siirei utaatyet perberyo, ko uu ye siirei lapkeiyet mesundeito.

¹⁴ Tinyei koonyek che keertoe ne utaat, ak wendoti ne perber eng' mesundeito. Agot eng' chooto ko ki ageer ale ityin kiit agenge icheek tugul.

¹⁵ Ki ale anyun eng' muguleldanyu, “Ko uu ye ityin kioto ne perber, koityina agane, ak amu nee anyun si aek ne utaat kosiir? Ki amwa anyun eng' muguleldanyu ale, ‘puch niito agine.’ ”

¹⁶ Amu ma kibwaati ne utaat agoi, ko uu ye ma kibwaati ne perber; amu tuun kiutye tugul eng' peetuusyek che pwoonei. Meei ne utaat agine ko uu ne perber!

¹⁷ Ki awech anyun sabeet amu ki koono ng'wanindo poisyet ne kiyaei eng' kurereetap asiista. Amu puch tugul ak kaimetapkei ne po puch.

¹⁸ Ki awech poisyennyu tugul ne ki abirtochigei eng' kurereetap asiista. Amu eng' ne matiny, ametochini chiito ne isubwo.

¹⁹ Ak ng'oo ne ingen ngo tuun egu chiito ne utaat anan ko ne perber? Nganda uu nooto, ko tuun pou poisyennyu tugul ne koabirtochigei ak ne abartae ng'omnateet eng' kurereetap asiista. Puch niito agine.

²⁰ Ki awelelgei anyun ak agoochi muguleldanyu koaragen amu poisyet tugul ne ki abirtochigei eng' kurereetap asiista.

²¹ Amu mi chiito ne yaei poisyennyi eng' ng'omnateet, kobooto naet, ak utaatyet; ago pagaakyin koek kebebertap chiito ne ma pirtochigei poisyet. Puch niito agine ak ko yaityet ne oo.

²² Nee ne nyooru chiito eng' pirtoennyi pogei tugul, ak kaimetapkei ne po muguleldanyi, ne pirtochingei eng' kurereetap asiista?

²³ Amu po arageneet peetuusyekyik tugul, ak ko po ng'wanindo poisyennyi. Ee, ma imuunyi muguleldanyi kemoi. Puch niito agine.

²⁴ Ma mi kiit ne kaigai eng' chiito kosiir koamis ak koeeiso, ak kobaibae saboondanyi tuguuk che myach eng' pirtoennyi pogei. Ki ageer kogeny ale punu niito eutap Kamuktaindet.

²⁵ Amu ng'oo ne imuuchi koamis, ng'oo ne imuuchi konyoor poiboiyet, kosiiro?

²⁶ Amu igoochin Ineendet utaatyet ak naet, ak poiboiyet chiito ne iboiboi ineendet. Ago igoochin kiptengekyot poisyetap nyalilda asi kobiit koyum ak kotes, ak kogoochi ineendet ne iboiboi Kamuktaindet. Puch niito agine ak ko kaimetapkei ne po puch.