AMDOINDET 11 - BUKUIT NE TILIIL Sireet ne Dutero Kanon

Atebeet ne koonu kaberuret

¹ Wiirchi amitwogiguk peek; amu tuun inyooru ko kagosiirto peetuusyek che chaang'.

² Pchechii kebeberta piik tisap, ee agot piik sisiit; amu mengen yaityet ne piitu eng' ng'wony.

³ Ngo nyi peek poolik, koroong'jigei ng'wony, ak ngo luulji keetit murot tai anan ko murot kaataam, ko komosta ne kaluulji, kotebee yooto.

⁴ Ma kolsei ineendet ne riibei usoonet; ama kesei ineendet ne keerei poolik.

⁵ Ko uu ye mengen ooreetap usoonet anan ole nertoi kawegap lakweet eng' moetap ineendet ne managaat; uu nooto mengen poisyetap Kamuktaindet ne yaei tuguuk tugul.

⁶ Koolse karon, amesiis koskoleny, amu mengen che rurtos, ngo ni anan ni anan ngo myagitu tuwai.

⁷ Anyiny iman lapkeiyet, ak kiit ne karaaran asiista kegeerei.

⁸ Ngo sap chiito kenyiisyek che chaang', ko ingobaibait eng' chooto tugul. Ago ingobwaat ineendet peetuusyegap mesundeito, amu chaang'. Puch tugul che pwoonei.

Katigonet koityi neranik

⁹ Paibaitu murenoni, eng' peetuusyegap ming'inateng'ung', ak ingobaibain muguleldang'ung' eng' peetuusyegap ming'inateng'ung' ak isup ortinwegap muguleldang'ung' ko uu ye igeere. Ago nai ile, imutyinin `Kamuktaindet kirwooget amu tuguuchuuto tugul.

¹⁰ Iste anyun arageneet eng' muguleldang'ung', ak iste yaityet eng' poortang'ung'. Amu puch peetuusyegap ming'inateng'ung' ak che po nerateeng'ung'.