AMDOINDET 10 - BUKUIT NE TILIIL Sireet ne Dutero Kanon

Kalewenaik alak agobo sabeet

¹ Ko uu ye puldos mwanik che anyiny che po ng'amotyot amu kalyang'ik che pekyin, ko ng'emei perberyo kitigin utaatyet ak teegisto.

² Mi muguleldap chiito ne utaat eunnyi ne po tai; ago mi muguleldap ne perber eunnyi ne po kaataam.

³ Ye wendoti ne perber eng' ooreet, kobetyi `ng'omnateet ineendet ak koboorchinoti chiito age tugul kole perber ineendet.

⁴ Ngot ityin nereegegap pounindet, ko metwagei eng' yetang'ung' ye kemi, amu tisei talasyet tengekwogik che eecheen.

⁵ Mi yaityet ne ki ageer eng' kurereetap asiista, ne uu lelutyet ne punu pounindet:

⁶ kindoi perberyo komoswek che torooreen, ak tebyei mogoreek eng' ole po ng'wony.

⁷ Ki ageer otwogik kolaanyei paraisisyek ak kobunei keelyek pounik ko uu otwogik eng' ng'wony.

⁸ Ineendet ne palei keriinget kobutyin yooto, ak age tugul ne putei ng'ootweet kosusei ereneet.

⁹ Iberchin koik chii age tugul ne waei, imuuchi kokwer kwendet ineendet ne petei.

¹⁰ Ngo ng'utum aiywet, ama lit chii, ko kanyool kobirtogei ne ebei, ago myee utaatyet eng' kandochinet.

¹¹ Ngot kosusiis ereneet kotom kigaigai, koma ko tilei kiy kagaigaet.

¹² Myachen ng'aleegap chiito ne utaat; ago luguegei kutitap chiito ne perber.

¹³ Perperyo taunetap ng'aleegap ne perber, ak kagesunetap ng'alaalennyi ko iywek che ng'emisyei.

¹⁴ Tesei kogeny ne perber ng'aleek. Ma naei chii kiit ne piitu; ak ng'oo ne mwachin ineendet tuguuk che piitu let eng' ineendet?

¹⁵ Poisyetap che perber kogoochin age tugul eng' icheeget kong'et, amu ma naei ineendet ole wetitoi nganaseet.

¹⁶ Pwo eng' inyee, ee emet, ye ta ko ming'in laitoryandeng'ung' ak ye amisyei pouniguk kota ko karon!

¹⁷ Ibaibai inyee, ee emet, ye laitoryandeng'ung' ko weeriigap piik che taagunotiin ye amisyei pouniguk eng' sait ne nyolu, si kogimegitu, ama eng' pogitet!

¹⁸ Kabuisei paragutap koot amu chorirnatetap chiito; robonu koot amu chorirnatet.

¹⁹ Kiyaei igoorto agobo roryot, iboiboi divaik saboondo, ak imuuchi robiinik koyai tuguuk tugul.

²⁰ Amesas laitoryat, agot eng' kabwaatutiguk; anan isas mogoryot eng' koong'ung' ne irue, amu imuuch koip toriit ng'olyoot, ak komuuch komwaita `che tinyei kebebaik ng'aleek.