3 JOHANA 1 - BUKUIT NE TILIIL Sireet ne Dutero Kanon

Saaet agobo Gaio

¹ Anee poiyot ne asirchini Gaio chamaneet ne achame eng' imanit.

² Chamanani, asaae ale iberuuroge komyee eng' tuguuk tugul ak itepte chametapkei, ko uu ye iberuurot saboondang'ung'.

³ Amu ki abaibaitu miising' kingo pwa che ketupche kobaoryan agobo imaning'ung', ko uu ye iwendote imanit.

⁴ Ma tinyei poiboiyet age ne siirei ni, ye agase keele pendoti lagokyuk eng' imanit.

Yautik che myach

⁵ Chamanani, iyae poisyetap iman eng' kiit age tugul ne iyae agobo tupchosyek ak toek;

⁶ che paoryani agobo chamyeng'ung' eng' kaniset. Iyae ne myee ye iyomisi eng' pandanywa ko uu ye nyolu eng' Kamuktaindet;

⁷ amu ki pa icheek agobo Kristo, ama ip kiy eng' che ma kayanik.

⁸ Nooto anyun kanyoljech ketaach che uu icheek, si kobiit keegu che kiboisyei kobooto icheek eng' imanit.

Diotrophe ak Demetrios

⁹ Ki asirchi ng'olyoo kaniset; ago ma taachech Diotrophe, ne chamei koek ne oo eng' kwenunnywa.

¹⁰ Ara anyun, ngot anyoo, anyoone abwaati poisyonikyik che yaei; mwaei ng'aleek che yaacheen che po puch agobo acheek. Ama yamei chooto kityo, mataachei ineendet tupchosyek, ak koete icheek che machei kotaach ak koonei eng' kaniset.

¹¹ Chamanani, amesup yaityet ago isup ne myee. Ineendet ne yaei ne myee ko po Kamuktaindet; ineendet ne yaei yaityo ko tomo kogeer Kamuktaindet.

¹² Kigobaoryan piik tugul agobo Demetrios, ak kobaoryani imanit agine. Ee, kibaoryani agacheek; ak ingen ile po iman paornatennyo.

Kagatyosyek che po let

¹³ Katinye tuguuk che chaang' che katasirun, ago ma mache asirunenen wino ak kalamit:

¹⁴ ago amang'u ageerin ko neegit, ak keng'alaal togoch eng' togoch.

¹⁵ Ingotep kaalyeet kobooten. Igatin choronok. Igat choronok eng' kainaikwak.