2 TIMOTEO 1 - BUKUIT NE TILIIL Sireet ne Dutero Kanon

Kagateet

¹ Paulo, kayooktoindet ne po Kristo Jeso eng' mageetap Kamuktaindet, ko uu arorutyet ne po saboondo ne miitei eng' Kristo Jeso,

² asirchini Timoteo, lakweennyu ne achame miising': Ingotep kobooten myeeindo, rireenetapkei, kaalyeet, che punu Kamuktaindet Kwanda ak Kristo Jeso Kiptaiyandennyo.

Kongoi ak kemwachi piik ko kiilgei

³ Amwachini Kamuktaindet kongoi, ne aoote ko uu ye kiyaei kwanisyekyuk che po tai eng' kabwaatet ne tiliil, ale masisei kabwaatet ne abwaatin eng' soomutikyuk, kemoi ak peet,

⁴ atinye emosto ageerin, abwaati peeguk po kong', si konyiia poiboiyet;

⁵ ye kingi pwatwa kayaneet ne ma tinyei keniisyet ne mi eng' inyee; ne ki menyei korook eng' ingogo Lois, ak kamenng'ung' Eunike; ak, ayani ale menyin aginye.

⁶ Abwaatun anyun amu niito ale iywokyi konunet ne po Kamuktaindet, ne mi eng' inyee amu kagonooretap eunekyuk.

⁷ Amu ki ma koonech Kamuktaindet muguleldap nyogoryet, ago ne po kamuget ak chamyet ak riibetapkei.

⁸ Amelilanji anyun paornateetap Kiptaiyandennyo, anan anee kimonjororyondennyi: ago nam yamdaetap nyalilwogik amu logoiywek che myach ko uu ye tee kamuktaetap Kamuktaindet;

⁹ ne kisarwech ak koguurech eng' kuurseet ne tiliil, ma ko uu poisyonikyok, ago ko uu magennyi ak myeeindonyi, ne ki kigoonech eng' Kristo Jeso kobooch kenyiisyegap koigeny,

¹⁰ ago kagotook nguno eng' tagunetap Yetindennyo Kristo Jeso, ne ki kobar meet, ak kong'aany saboondo ak ng'emisyet ne ma komi, eng' logoiywek che myach,

¹¹ ki kindea agobo nooto aek amdoindet, ak kayooktoindet, ak kaneetindet.

¹² Anyooru anyun nyalilwogichu ak icheek agobo nooto: ago ma lilani; amu angen ineendet ne ki ayan, ak ayani komyee ale imuuchi koriip nooto ne ki agoochi ineendet agoi peetuunooto.

¹³ Nam itoondap ng'aleek che po iman che ki igasena, eng' kayaneet ak chamyet ne miitei eng' Kristo Jeso.

¹⁴ Riip eng' Kabuuset ne Tiliil ne menyei eng' acheek, nooto myee ne ki kigoonin.

¹⁵ Ingen ni ile, kigoistoenagei tugul che mi Asia; eng' icheek ko Pugelo ak Hermogene.

¹⁶ Ingogoochi Kiptaiyat rireenet kootap Onesiporo: amu kitoreta konyil che chaang', ama ililan amu monjororitinnyu;

¹⁷ ago, ye kingo mi Rome, kocheeng'a eng' kagiiletapkei, ak kinyoorwo,

¹⁸ ingogoochi Kiptaiyat ineendet konyoor rireenet ne po Kiptaiyat eng' peetuunooto! Ak ingen komyee ole tee poisyet ne ki yai eng' Epheso.