2 THESSALONIKEK 3 - BUKUIT NE TILIIL Sireet ne Dutero Kanon

Soomet ne po saaet

¹ Ne po let anyun, che kitupche, osaiywech si kobiit kochaakta ng'olyootap Kiptaiyat ak kitoroor, ko uu ole teptoi eng' okweek;

² ak si kobiit kesarwech eng' piik che ngelelik ak che yaacheen; amu ma tinyei tugul kayaneet.

³ Ago po iman Kiptaiyat, ak igimitok ak koriibok eng' nooto ya.

⁴ Ak ki tinyei kamang'unet eng' Kiptaiyat agobo okweek, keele oyae ak kota oyae tuguuk che king'ate.

⁵ Ingondochi Kiptaiyat mugulelwekwok agoi chamyetap Kamuktaindet ak muitaetap Kristo.

Kecheer piik koyai poisyet

⁶ King'atok anyun, che kitupche, eng' kainetap Kiptaiyandennyo Jeso Kristo, keele oistoegei tupchet age tugul ne wendoti eng' pistoet, ama ko uu pitonwek che ki onyoorunenech.

⁷ Amu ongen okweeget ko uu ye kanyool oyai ko uu ye kiyae: amu ki ma kitebi acheek eng' kwenung'wong' ko uu piik che ma riibegei;

⁸ ama ki am amitwogigap chii age tugul puch, ago eng' poisyet ne uui ak pichiindo, keboisyei kemoi ak peet, si ma kiim chii age tugul eng' okweek:

⁹ ma amu keele ma ki tinyei kimnateet, ago si kobiit keyaige keegu kaboorunet eng' okweek, si kobiit oyai osubenech.

¹⁰ Amu agot ye ki kimi kobootok, ko ki king'atak ko uu ni, keele ngo ma cham chii age tugul kobois, ko matongoamis.

¹¹ Amu kigase agobo alak eng' kwenung'wong' che pendoti eng' pistoet, che ma poisyei agot kitigin, ago kibieminik.

¹² Ago king'ate ak kiteechini che uu chooto eng' Kiptaiyat Jeso Kristo, keele kobois eng' mutyonet, ak koam amitwogikwak.

¹³ Ago okweek, che kitupche, among'etye eng' yaeet ne oyae ne myee.

¹⁴ Ak ngo ma kase iit chii age tugul ng'olyoondennyo eng' parwaani, obwaat chiichooto, amat oyomegei ak ineendet, si kobiit kolilaan.

¹⁵ Amoiit ineendet ole puunyoot, ago otigon ko uu tupchet.

Kagotyosyek

¹⁶ Nguno anyun ingogoonok kaalyeet Kiptaiyat ineendet, ne Kiptaiyat ne po kaalyeet, kotugul eng' ui tugul. Ingotep Kiptaiyat kobootok okweek tugul.

¹⁷ Kagatennyu anee Paulo eng' eunnyu, nooto kaboorunet eng' parweet age tugul: asire anyun ko uu nooto.

¹⁸ Ingotep myeeindap Kiptaiyandennyo Jeso Kristo kobootok okweek tugul.