2 THESSALONIKEK 2 - BUKUIT NE TILIIL Sireet ne Dutero Kanon

Chiito ne po tengekto

¹ Kisoomok anyun, che kitupche, agobo nyonunetap Kiptaiyandennyo Jeso Kristo, ak kayumennyo pogei ne kiyumjinigei ineendet;

² si motoptobense ochokyi eng' kabwaatutikwok anan oaragense, ngot ko eng' kabwaatut anan eng' ng'olyoo, anan eng' parweet ne oleen punwech, oleen kagoit peetuutap Kiptaiyat;

³ amat kong'alak chii eng' kiy age tugul; amu ma itu peetuunooto, kobatee indou katuituet ak keng'aany chiito ne po tengekto, weeriitap luseet,

⁴ ineendet ne kirindoi ak kotorooregei kogirindoi tugul che kiguure Kamuktaindet anan che kilasu; si kotep anyun eng' hekaluutap Kamuktaindet, koboorugei ineendet ko uu ne Kamuktaindet.

⁵ Tos mobwaati, yu ki ami kobootok, ole ki amwaiwok tuguuchu?

⁶ Ak nguno ongen nooto ne raanyei, si kobiit keng'aany eng' peetuusyekyik.

⁷ Amu poisyei nguno ung'ootyetap ngelelnateet; kobatee mi agenge ne raanyei nguno, agoi keisto.

⁸ Ak yeityo keng'aany ngelelyot, ne tuun parei Kiptaiyat Jeso eng' kabuusetap kutinnyi, ak kong'em koek puch eng' ng'ang'eetap nyonunennyi;

⁹ nyonunennyi konamegei ak poisyetap Setani kobooto kamuget tugul ak kaboorunoik ak kwang'utik che po lembech,

¹⁰ kobooto keniisyet tugul che ma po imanda agobo icheek che lustos; amu ma taach chamyetap imanit, si kobiit kesar.

¹¹ Amu niito anyun, iyookyin Kamuktaindet icheek kamaaset ne poisye si kobiit koyan lembeita:

¹² si kobiit kirwookyi icheek tugul che ma iyan imanit, ago che kiboiboitune che ma po imanda.

Ki lewenjook yetunet

¹³ Ago kanyool kemwachi Kamuktaindet kongoi kotugul agobo okweek, che kitupche che chamanigap Kiptaiyat, amu ki lewenjok Kamuktaindet yetunet kobooch taunet eng' katabaanetap Kabuuset ne Tiliil ak kayaneetap imanit:

¹⁴ kiguurok anyun eng' chooto eng' logoiywekyok che myach, si kobiit onyooru toroornatetap Kiptaiyandennyo Jeso Kristo.

¹⁵ Nooto anyun, che kitupche, olumdegei, ak onam pitonwek che ki kinetak, ngot ko eng' ng'olyoot, anan eng' parweennyo.

¹⁶ Nguno anyun, ingogaigai Kiptaiyandennyo Jeso Kristo, ak Kamuktaindet Kwandanyo ne ki chamech ak kogoonech kagaigaet ne po koigeny ak kamang'unet ne myee eng' myeeindo,

¹⁷ kogaigai mugulelwekwok ak kogimit icheek eng' poisyet age tugul ne myee ak ng'olyoot.