2 THESSALONIKEK 1 - BUKUIT NE TILIIL Sireet ne Dutero Kanon

Kagateet

¹ Paulo, ak Silvano, ak Timoteo, kisirchini kanisetap Thessalonikek eng' Kamuktaindet Kwandanyo ak Kiptaiyat Jeso Kristo:

² Ingotep kobootok myeeindo ak kaalyeet che punu Kamuktaindet Kwanda ak Kiptaiyat Jeso Kristo.

Kongoi ak saaet

³ Kanyool kemwachi Kamuktaindet kongoi peetuusyek tugul agobo okweek, che kitupche, ko uu ye nyolu, amu nerei kayaneng'wong' miising', ak ko tesoksei chamyet ne oting'egei okweek tugul;

⁴ kot kichounenok kei okweek eng' kanisosyegap Kamuktaindet amu muitaeng'wong' ak kayaneet eng' usiisyosyekwok tugul ak nyalilwogik che omuitoi;

⁵ niito kaboorunet ne tagunoot ne po kirwoogetap imanda ne po Kamuktaindet; si kobiit kiitok keele onyolu eng' laitornatetap Kamuktaindet, ne onyoorunee agine nyalilda:

⁶ si ngo kiy ne po imanda eng' Kamuktaindet koyaakyi mugetuut ne po nyalilda icheeget che inyalilok,

⁷ ak kogoonok kamuung'et kobootech, okweek che kiusei, eng' ng'ang'eetap Kiptaiyat Jeso kobunu kipsengwet kobooto malaikaisyek che po kamuktaennyi

⁸ eng' maat ne lalei, koyaakyi mugetuut icheeget che ma nai Kamuktaindet, ak icheek che ma kase iit logoiywek che myach che po Kiptaiyandennyo Jeso:

⁹ che tuun nyooru pireet, nooto ng'emisyet ne po koigeny ko kageisto eng' taitap Kiptaiyat ak eng' toroornatetap kimnateennyi,

¹⁰ ye tuun nyo si kobiit kitoroor eng' chechiik che tiliileen; ak kekwong'ee icheek tugul che iyani (amu ki kiyan paornatennyo eng' okweek), eng' peetuunooto.

¹¹ Nooto anyun kisaiywok kotugul, si kobiit koiitok Kamuktaindet nenyo kole onyolu eng' kuurseng'wong', ak kosulda mageet age tugul ne po myeeindo ak poisyet age tugul ne po kayaneet, eng' kamuktaet;

¹² si kobiit kitoroor kainetap Kiptaiyandennyo Jeso eng' okweek, ak okweek eng' ineendet, ko uu myeeindap Kamuktaindet nenyo ak Kiptaiyat Jeso Kristo.