2 SAMUEL 9 - BUKUIT NE TILIIL Sireet ne Dutero Kanon

Kotoreti `Daudi Mephiboshet

¹ Eng' peetuut age, kotep Daudi kole, “Tos mi chii ne ki ng'et eng' kootap Saulo, si kobiit ayachi ne myee amu Jonathan?”

² Ki mi eng' kootap Saulo otwogindet ne ki kiguure kainennyi Siba ak ki kiguur kwo ole mi Daudi. ki teebee anyun `laitoryat ineendet koleenji, “Ii Siba?” Ak ki wol kole, “Aa ineendet, anee otwogindeng'ung'.”

³ Yeityo koteebe laitoryat koleenji, “Tos ta komi chii eng' kootap Saulo, si kobiit ayachi ineendet myeeindap Kamuktaindet?” Ak ki leenji Siba laitoryat, “Ta komi weeriitap Jonathan ne yaacheen keelyekyik.”

⁴ koteebee `laitoryat ineendet koleenji, “Mi ano?” Ak ki leenji `Siba laitoryat, “Keero, mi kootap Makir weeriitap Amiel, eng' Lo-debar.”

⁵ Ki iyookto anyun `Daudi kimut ineendet konyo eng' kootap Makir weeriitap Amiel eng' Lo-debar.

⁶ Ki nyo ole mi Daudi `Mephibosheth, weeriitap Jonathan weeriitap Saulo ak kobutyi ng'wony kogutung'ji. Ki kuur `Daudi koleenji, “Mephibosheth.” Ak ki wol kole, “Keer otwogindeng'ung'!”

⁷ Ki leenji anyun `Daudi ineendet, “Meiywei; amu ayaun ne myee iman agobo Jonathan kwandang'ung', ak iamisye mesennyu kotugul.”

⁸ Ki ing'uruuk Mephibosheth ak kole, “Nee otwogindeng'ung' kot igeer seset ne ki kome ko uu anee?”

⁹ Ki kuur anyun `laitoryat Siba otwogindetap Saulo, ak koleenji ineendet, “Kaagoochi weeriitap kiptaiyandeng'ung' tuguuk tugul che ki po Saulo ak koonnyi tugul.

¹⁰ Ibatyi emet inyee, weeriiguk ak otwogiguk, ak iibu peek kobwa ko, si kobiit konyoor weeriitap kiptaiyandeng'ung' amitwogik che amei. Ago amisye mesennyu kotugul Mephibosheth weeriitap kiptaiyandeng'ung'.” Ki tinyei `Siba weeriik taman ak muut ak otwogik tiptem.

¹¹ Ki wolji anyun `Siba laitoryat koleenji, “Ayae ko uu tugul che ng'ata kiptaiyandennyu laitoryat anee otwogindennyi.” Ago ki le laitoryat, “Amisye mesennyu Mephibosheth ko uu age eng' weeriigap laitoryat.”

¹² Ki tinyei `Mephibosheth weeriit ne ming'in, ne ki kiguure kainennyi Mikah. Ak piik tugul che ki menyei kootap Siba ko ki otwogigap Mephibosheth.

¹³ Ki meny anyun Mephibosheth Jerusalem; amu ki amisye kotugul meesetap laitoryat, ak ki ing'wali eng' keelyekyik tuwai.