2 SAMUEL 8 - BUKUIT NE TILIIL Sireet ne Dutero Kanon

Katerteerisosyegap Daudi eng' lugoosyek

¹ Kingo pata niito, kobar `Daudi Philistiik ak koterteer icheek, ak korep `Daudi Metegama eng' eunegap Philistiik.

² Ki iterteer ak kobar Moab. Ki ng'at icheek koruiyo eng' ng'wony yeityo kokwa icheek eng' porowet ak kokwa icheeget eng' porowet. Ki kibar kobek piik eng' uitugul ye ite kakwaindap poroonik aeng', ago ki chamji kosapcho che mi uitugul ole ite porowet ne po somok. Ara anyun ki ek Moabik otwogigap Daudi ak ki ip kagoochinoik.

³ Ki par kogeny `Daudi Hadadeser weeriitap Rehob, laitoryatap Soba, ye kiwendi koweechi pounatennyi kogeny eng' aineet.

⁴ Kiluule `Daudi ineendet murenikyik eliphuut agenge ak pogol tisap che ki laanyei paraisisyek ak eliphuusyek tiptem che kibunei keelyek. Ki ep Daudi kutung'oigap paraisisyek tugul che ki ichuuti kariisyek, ago ki ituuch eng' chooto che yamei kariisyek pogol.

⁵ Kingo pwa piigap Syria che menyei Damasko kotoret Hadadeser laitoryatap Soba, kobar Daudi piik eliphuusyek tiptem ak aeng' eng' piigap Syria.

⁶ Ki inde anyun Daudi irimosyek Syria ne po Damasko. Ki ek piigap Syria otwogigap Daudi ak ki ip kagoochinoik. Ki igoochi `Kamuktaindet ne Toroor Daudi katerteeret eng' komosta age tugul ne ki wo.

⁷ Ki ip `Daudi long'onigap thahabu che ki tinyei otwogigap Hadadeser ak ki ip kobwa Jerusalem.

⁸ Ki ip Laitoryat `Daudi sugunonik che chaang' miising' eng' Beta ak eng' Berotai, nganasoogap Hadadeser.

⁹ Kingo kas `Toi laitoryatap Hamath kole kogobar `Daudi lugeet tugul ne po Hadadeser,

¹⁰ koyookto anyun `Toi Joram weeriinnyi kwo kaplaitoryat Daudi, kwo kogat ineendet ak koberuur, amu kiga kobargei ak Hadadeser ak ki par ineendet, amu ki pargei Hadadeser ak Toi. Ki ip Joram tereenigap fedha, tereenigap thahabu ak tereenigap sugunonik.

¹¹ Ki itabaanji `Daudi Kamuktaindet ne Toroor tuguuchuuto ak icheek, kobooto fedha ak thahabu che kiga kotabaan eng' pororyosyek tugul che kiga koterteer,

¹² che po Syria, che po Moab, che po lagogap Ammon, che po Philistiik, che po Amelek ak che parunenigap Hadadeser weeriitap Rehob laitoryatap Soba.

¹³ Ki eet kainetap Daudi ye ki weeksei kobunu pareet ne ki parei piigap Syria eng' Atebweetap Munyuk, ole ki pare murenik eliphuusyek taman ak sisiit.

¹⁴ Ki inde irimosyek Edom komugul, ak ki ek Edomik tugul otwogigap Daudi. Ki igoochi `Kamuktaindet ne Toroor Daudi katerteeret eng' komosta age tugul ne ki wo.

¹⁵ Ak ki laitoran Daudi eng' Israel tugul; ak ki irwookyi Daudi piikyik tugul eng' lititindo ak iman.

¹⁶ Ki pou Joab weeriitap Zeruiah lugeet, ak ko ki siriindetap tuguuk che piitu, Jehoshaphat weeriitap Ahilud.

¹⁷ Ki tisiik Zadok weeriitap Ahitub ak Ahimelek weeriitap Abiathar, ko ki siriindet Seraiah.

¹⁸ Ki pou Benaiah weeriitap Jehoiada Keretik ak Peletik ak ki tisiik weeriigap Daudi.