2 SAMUEL 4 - BUKUIT NE TILIIL Sireet ne Dutero Kanon

Kebarei Ishbosheth

¹ Kingo kas Ishbosheth weeriitap Saulo kole kogome Abner eng' Hebron, konyalul ak ki aragenso Yahudik tugul.

² Nguno anyun ko ki tinyei weeriitap Saulo murenik aeng' che ki kiptainigap kweanaigap lugeet. Ki kiguure kainetap age Baanah, keguure ne po age Regap, weeriigap Rimon Berotindet, ne po lagogap Benjamin: (amu ki ityin Berot agine Benjamin:

³ ak kimwechi Berotik Gitaim ak ki pa koek punootik eng' olooto agoi ra.)

⁴ Ki tinyei Jonathan weeriitap Saulo weeriit ne kimeiyotiin keelyek. Ki po kenyiisyek muut ineendet ye ki itu ng'aleegap Saulo ak Jonathan eng' Jezreel ak kiganap cheplakwet ak komwei. Ye ki chooktoi komwei cheplakwanooto, kobut lakweet ak kiyaagitu keelyek. Ki kiguure kainennyi Mephibosheth.

⁵ Ki pa weeriigap Rimon Berotindet, Regap ak Baanah kot koit kootap Is-bonet ye ki imunyi peet kween ko kang'wanit asiista.

⁶ Ki pa kwenutap koot, ko uu piich che kimachei koip nganuuk ak kitoor moennyi. Kichililso Regap ak Baanah, ng'eetap kamet.

⁷ Kigaba icheek ak kingo it ko anyun, konyoor koruei eng' itogunnyi eng' koot ne kirue, kokwer ak kobar, yeityo kotil metit ak koip ak koba kobun ooreetap Arabah kemout komugul.

⁸ Ki ip metoto po Ishbosheth koipchi Daudi eng' Hebron ak koleenji laitoryat, “Metitap Ishbosheth weeriitap Saulo punyondeng'ung' ne ki cheeng'ei saboondang'ung'; ak kagoyaaktoochi Kamuktaindet ne Toroor mugetuut rani kiptaiyandennyu laitoryat eng' Saulo ak iyotennyi.”

⁹ Ki wolji `Daudi Regap ak Baanah ng'eetap kamet, weeriigap Rimon Berotindet koleenji, “Ko uu ye sabei Kamuktaindet ne Toroor ne ki kotyach saboondanyu eng' nyalilda tugul,

¹⁰ ye kingo mwaiwo chiito age kole, ‘kogome Saulo,’ koleen kaip logoiywek che myach, anam ineendet ak abar eng' Ziklag nooto ko melekto ne ki agoochi ineendet agobo logoiywekyik.

¹¹ Siirei ne tya ye kabar piik che yaacheen chiito ne po iman eng' koonnyi komi itogunnyi, ko tos ma mage korotiikyik eunekwok ak aistook eng' ng'wony?”

¹² Ara anyun ki ng'at `Daudi murenikyik ak ki par icheek. Kitil eunekwak ak keelyekwak ak kosonginin eng' ole neegitee tamboiyot ne mi Hebron. Ago ki ip metitap Ishbosheth ak kotupchi kereritap Abner eng' Hebron.