2 SAMUEL 24 - BUKUIT NE TILIIL Sireet ne Dutero Kanon

Koitetap piik

¹ Ki nereech kot kogeny Kamuktaindet ne Toroor agobo Israel, ak king'eetyi `Kamuktaindet ne Toroor Daudi kosich kabwaatet ne ya agobo icheek. Ki leenji anyun “Ui, iit Israel ak Judah.”

² Ak ki leenji `laitoryat Joab kiptaiyatap lugeet ne ki mi ak ineendet, “Ui punoote pororyosyek tugul che po Israel, kobooch Dan agoi Beer-sheba ak oiit piik si kobiit anai ole tee koiitennywa.”

³ Ago ki leenji `Joab laitoryat, “Ingotes piik `Kamuktaindet ne Toroor Kamuktaindeng'ung', ingotenit kiit ne tee konyil pogol ak ingogeer kiptaiyandennyu laitoryat, ago amu nee si komachei koyai kiptaiyandennyu laitoryat kii?”

⁴ Ago ki iterteer ng'olyootap laitoryat Joab ak ki iterteer kiptainigap lugeet. Ki pa Joab ak kiptainigap lugeet eng' ole mi laitoryat, koba koiit piigap Israel.

⁵ Kilandae Jordan ak komung'yo eng' Aroer, komostap tai ne po nganaseet ne mi kwenutap atebweetap Gad kotokyigei Jaser,

⁶ yeityo kobwa Gilead ak emetap Tatim-hodsi. Ki pwa Dan-jan ak koyiemat agoi Sidon.

⁷ Yeityo kobwa irimeetap Tyro agoi nganasook tugul che po Hibik ak che po Kanaanik. Ki manda koba murot tai ne po Judah eng' Beer-sheba.

⁸ Kingo kagobunoot anyun emet tugul kobwa Jerusalem ko kaigeskei arawek sogoolu ak peetuusyek tiptem kobooch ngo pa.

⁹ Ki igoochi Joab laitoryat kiit ne tee koitetap piik. Ki mi Israel murenik eliphuusyek pogolwogik sisiitu che nyigoonen che po rotoogap chok ak ki ek che po Judah murenik eliphuusyek pogol muut.

Pireet agobo tengektap Daudi

¹⁰ Ki aragen miising' Daudi eng' muguleldanyi ye kingo kagoiit piik. Ki leenji anyun `Daudi Kamuktaindet ne Toroor, “Ki ayai tengekto ne oo eng' kioto koayai, ago asoomin ale iste anyun tengektap otwogindeng'ung', ee Kamuktaindet ne Toroor, amu ki ayai eng' perberyo ne oo.”

¹¹ Kingo ng'eet Daudi karon, koityi ng'olyootap Kamuktaindet ne Toroor maotyot Gad, keerindetap Daudi, koleenji,

¹² “Ui imwachi Daudi ileenji, kamwa Kamuktaindet ne Toroor kole, Kagoonin tuguuk somok ak lewen agenge eng' chooto, si kobiit ayaun.”

¹³ Ki nyo anyun Gad ole mi Daudi ak komwachi ineendet koleenji, “Myee koamin rubeet kenyiisyek tisap eng' emeng'ung'? Anan imweote eng' arawek somok eng' taitap puuniguk koonotin? Anan piit koroitap ng'wony eng' emeng'ung' peetuusyek somok? Lewen anyun nguno ak imwaa kiit ne awoljini ineendet ne kaiyokwo.”

¹⁴ Ki leenji `Daudi Gad, “Ami eng' pichiindo ne oo, ngabutyi eutap Kamuktaindet ne Toroor, amu chaang' rireenosyekyik, ago ameng' abutyi eutap chii.”

¹⁵ Ki iyookyi `Kamuktaindet ne Toroor anyun koroitap ng'wony Israel, kong'etee karon agoi sait ne ki king'at ak ki pek piik eliphuusyek tamanwogik tisabu kobooch Dan agoi Beer-sheba.

¹⁶ Ye kingo tokyi malaikaiyat eunnyi Jerusalem kole kobar, kowal Kamuktaindet ne Toroor kabwaatutikyik agobo yaityonooto ak koleenji malaikaiyandonooto kibarei piik, “Kagoyam, ingosiis eung'ung'.” Ki mi malaikaiyatap Kamuktaindet ne Toroor ole neegitee rwanyut ne kiboorsee ne po Arauna Jebusindet.

¹⁷ Ye kingo keer `Daudi malaikaiyat ne kibarei piik, kong'alaalji Kamuktaindet ne Toroor `ineendet koleenji, “Keero, ki ayai tengekto, ki amaste, ago ki yai nee keechiirechu? Asaain ale, ingobira eung'ung' ak ingobir kootap kwandanyu.”

¹⁸ Ki nyo `Gad peetuunooto ole mi Daudi koleenji ineendet, “Togoste, iteekyi Kamuktaindet ne Toroor kaptisisyet eng' rwanyut ne kiboorsee ne po Arauna Jebusindet.”

¹⁹ Ara ki togosta anyun `Daudi ko uu ye ki mwa Gad ko uu ye kiga ng'at Kamuktaindet ne Toroor.

²⁰ Kingo tabendo `Arauna, kogeer laitoryat ak otwogikyik kobwanei kotokyingei ineendet; kwo Arauna ak kong'uruuk eng' taitap laitoryat kot kotiiny togeet ng'wony.

²¹ Yeityo kole `Arauna, “Kalya si konyo kiptaiyandennyu laitoryat ole mi otwogindennyi?” Ak ki le Daudi, “Kanyo aa alenen rwanyut ne kiboorsee, si kobiit ateekyi Kamuktaindet ne Toroor kaptisisyet, si kobiit keraany koroitap ng'wony kosiis si ma kobarei piik.”

²² Koleenji `Arauna Daudi, “Ingoip kiptaiyandennyu laitoryat ak kogoita kiit ne keerei kole myee eng' ineendet. Keero mi yu eiik che po kagoochinet ne kibeelei ak tuguuk che kiboorsee ak chogisyegap tuuga che egu kweenik.

²³ Ee laitoryat, kaigoochi Arauna chuuto tugul laitoryat.” Koleenji kogeny `Arauna laitoryat, “Ingotaachin Kamuktaindet ne Toroor Kamuktaindeng'ung'.”

²⁴ Ago ki leenji `laitoryat Arauna, “Achicha, aalenen iman eng' alyet. Ma koochini Kamuktaindet ne Toroor Kamuktaindennyu kagoochinoik che kibeelei che ma agoite kiy.” Ki al anyun Daudi rwanyunooto kiboorsee kobooto tuuga eng' shekelisyek konom che po fedha.

²⁵ Ki teekyi `Daudi Kamuktaindet ne Toroor kaptisisyet eng' yooto ak kogoito kagoochinoik che kibeelei ak kagoochinoigap kaalyeet. Ki kasyi anyun `Kamuktaindet ne Toroor icheek riirek agobo emet ak ki kiraany koroitap ng'wony kosiis eng' Israel.