2 SAMUEL 23 - BUKUIT NE TILIIL Sireet ne Dutero Kanon

Kayomisutigap Daudi

¹ Chu anyun ko ng'aleek che po let che po Daudi. Ng'alaalutigap Daudi weeriitap Jesse, Chuuto ng'aleegap chiito ne ki itoroor Kamuktaindet, ne iilaat ne po Kamuktaindetap Jakobo, ne chamat ne po tyenwogigap Israel.

² Ki ng'alaalena Kabuusetap Kamuktaindet ne Toroor, ak ki mi ng'olyoondennyi ng'elyeptanyu.

³ Ki ng'alaal Kamuktaindetap Israel, ki ng'alaalwo Rwandetap Israel kole: “Ineendet ne pou piik eng' imanda, ko ingoboi eng' kaiyweisyetap Kamuktaindet,

⁴ ko kergeitu ak lapkeiyet ne po karon, ye charu asiista eng' karonet ne lapkei, ye piitos susweek che ng'orng'oren, eng' kaluunet ne lapkei ko kamoen ropta.”

⁵ Tos ma uu nooto iman koonnyu eng' Kamuktaindet? Tos ma ki koyomiswa kayomiset ne po koigeny, ne ki kichop eng' tuguuk tugul ak ko ne lumdaat? Amu nooto ko yetunennyu tugul ak ko magennyu tugul, Agot ngo ma yai kotesak.

⁶ Ago kergeitu tugul che ma iywei Kamuktaindet ne Toroor ak katook che ki wiirtoi, amu ma namaksei eng' euut.

⁷ Ago chiito ne namei ko kanyool kotinyei kariik ak irumetap ng'otit; kibeelei eng' maat kogeskei eng' komostanywa.

Murenik che nyigoonen che po Daudi

⁸ Chu ko kainaigap murenik che nyigoonen che ki tinyei Daudi: Joseb-basebet Takemonindet, ne oo eng' kiptainik somok. Ineendet ne kibar piik pogol sisiit eng' ng'otinnyi peetuunak.

⁹ Rubeiywnnyi eng' che kirubei ineendet ko ki Eleazar weeriitap Dodai weeriitap Ahoindet. Ineendet ko ki agenge eng' murenichooto somok nyigoonen che ki mi ak Daudi ye kichotei Philistiik che kiga iyumgei eng' yooto agobo lugeet ak kiga koba murenigap Israel.

¹⁰ Ki ng'eet kobar Philistiik kot kong'et eunnyi ak koyaam eunnyi koyaamji rotwetap chok. Ki iyai Kamuktaindet ne Toroor katerteeret ne oo peetuunooto. Ak ki week piik kityo koosup ineendet koba konyaban tuguuk.

¹¹ Ne rubei ineendet ko ki Shammah weeriitap Agee Hararindet. Kingo yumgei Philistiik koek lugeet, eng' ole ki mi mbareet ne mi sogorik che chaang', komwee piigap Israel icheek.

¹² Ago ki tonon Shammah eng' kwenutap mbaranooto, koeet mbareet ak ki par Philistiik ak ki yai Kamuktaindet ne Toroor katerteeret ne oo.

¹³ Ki choortagei somogu eng' pounik che eecheen sosom, ak koba ole mi Daudi eng' peetuusyegap kesisyet agoi kebeneetap Adulam ak kiga teech lugeetap Philistiik atebweetap Repaim.

¹⁴ Eng' kasarata, ko ki mi `Daudi irimeet ak kimi lugeetap Philistiik Bethlehem.

¹⁵ Ki am melelda `Daudi ak ki le, “Oiye, inaga ng'oo peegap keriingetap peek ne mi Bethlehem ne neegitee ormariichet, aee”

¹⁶ Kichut lugeetap Philistiik `murenjoto nyigoonen somogu, koba koram peek eng' keriingonooto po peek ne mi Bethlehem, ne ki mi ye neegitee ormariichet yeityo koipchi Daudi. Ago ma cham koe, kitumda eng' taitap Kamuktaindet ne Toroor.

¹⁷ Ki le, “Ingolooit eng' anee, ee Kamuktaindet ne Toroor, si ma yai kii. Tos ma korotiigap piik che kachut ng'oiyondit saboonwekwak?” Ma cham anyun koe amu nooto. Chuuto anyun tuguuk che ki yai pichooto somogu nyigoonen.

¹⁸ Ki ne oo eng' chooto somok Abisai ng'eetap kametap Joab weeriitap Zeruiah ak ki nam ng'otinnyi ak kobar piik pogol somok ak ki took kainennyi eng' murenjoto somok.

¹⁹ Tos ma ineendet ne ki tinyei teegisto miising' eng' chooto somok? Ki kiyai ineendet anyun koek kiptaiyannywa, ago ma ityi chugai somok po tai.

²⁰ Benaiah weeriitap Jehoiada, weeriit ne nyigan ne punu Kabseel, ineendet ne ki yai poisyonik che eecheen: ki par weeriik aeng' che po Ariel che po Moab; kichoortagei kogeny kwo kobar ng'etundo eng' kwenutap keriinget eng' peetuusyegap teluji;

²¹ ak ki par Misirindet murenet ne karaaran. Nga ki tinyei misirindonooto ng'otit eng' eunnyi, ko ki choortagei kwo ole mi ineendet ak kirokto yeityo kong'us ng'otit eng' eutap misirindonooto ak kobare ng'otinnyi.

²² Ki yai tuguuchuuto Benaiah weeriitap Jehoiada ak ki took kainennyi eng' murenjoto somok nyigoonen.

²³ Ki sich teegisto kosiir chooto somok, ago ma ityi chugai somok po tai. Ki inde `Daudi ineendet koboi riibiikyik.

²⁴ Alak eng' chooto sosom ko ki: Asahel ng'eetap kametap Joab, Elanan weeriitap Dodo ne po Bethlehem,

²⁵ Shammah Harodindet, Elika Harodindet,

²⁶ Heles Paltindet, Ira weeriitap Ikes Tekoindet,

²⁷ Abiezer Anatotindet, Mebunai Husatindet,

²⁸ Salmon Aoindet, Maarai Netopatindet,

²⁹ Heleb weeriitap Baanah Netopatindet, Itai weeriitap Ribai ne po Gibea ne po lagogap Benjamin,

³⁰ Benaiah Piratonindet, Idai ne po ainoosyegap Gaas,

³¹ Abi-albon Arbatindet, Asmabet Baharumindet,

³² Eliaba Saalbonindet, weeriigap Jasen, Jonathan;

³³ Shammah Hararindet, Aiam weeriitap Sarar Ararindet,

³⁴ Eliphelet weeriitap Aasbai, weeriitap Maakatindet, Eliam weeriitap Ahitopel Gilonindet,

³⁵ Hesro Karmelindet, Paarai Arbindet,

³⁶ Igal weeriitap Nathan ne po Soba, Bani Gadindet,

³⁷ Selek Amonindet, Naarai Beerotindet, ne ki ipchin kariik Joab weeriitap Zeruiah,

³⁸ Ira Itrindet, Gareb Itrindet ak

³⁹ Uriah Hitindet. Ki sosom ak tisap pichooto tugul.