2 SAMUEL 20 - BUKUIT NE TILIIL Sireet ne Dutero Kanon

Kongeleljin `Sheba Daudi

¹ Ki piit eng' yooto chii ne ya ne kainennyi ko ki Sheba weeriitap Bikri, Benjaminindet. Ki kuut iryageet ak kole, “Ma ki tinyei kebeberta eng' Daudi, ama ki tinyei poroteet eng' weeriitap Jesse. Ingwo chii tugul emaisyekyik, ee Israel.”

² Kotogosta anyun piik tugul che po Israel, mata koosup Daudi, ki isup Sheba weeriitap Bikri. Ago ki namgei piigap Judah ak laitoryannywa kobooch Jordan agoi Jerusalem.

³ Ye kingo nyo `Daudi koonnyi eng' Jerusalem, konam kwonyichugiche taman, chebaigeinikyik chu kiga pagaakta koriip koot, ak konde riibiik koriip icheek kotebee koot oriit. Kibai, ago mata kwo ole mi icheek koipkei ak icheek. Ki kirat anyun agoi peetuutap meennywa, kotep koek mosoogik.

⁴ Ki leenji anyun laitoryat Amasa, “Kuurwa murenigap Judah koyumgei eng' peetuusyek somok ak inyoo aginye.”

⁵ Kingwo Amasa koguur piigap Judah kotuiyo kogagei kosiir ye kiga ng'at laitoryat ineendet.

⁶ Koleenji `Daudi Abisai, “Yaiywech yaityet Sheba weeriitap Bikri nguno kosiir ne ki yai Absalom. Imut anyun otwogigap kiptaiyandeng'ung' ak isup ineendet, si ma namjigei nganasook che ng'ootaatiin ak kochilil si mata kegeer.”

⁷ Ara anyun ki isup ineendet piigap Joab ak Keretik ak Peletik ak piik tugul che nyigoonen. Ki pa eng' Jerusalem koosup Sheba weeriitap Bikri.

⁸ Kingo riikyi koita ne oo ne mi Gibeon, konyo Amasa kotorook icheek. Kiga rat Joab kariikyik che po lugeet che kiga ilaach ak ki tinyei pireneet ak rotwetap chok ne kiga ratyi suennyi komi choget. Ye kiwendi, kochun rotweet.

⁹ Ki leenji `Joab Amasa, “Tos ichamegei, tupchennyu?” Ki nam Joab tamnetap Amasa eng' eunnyi ne po tai ko uu yo machei kong'utut ineendet.

¹⁰ Ago ma keer Amasa rotwetap chok ne ki tinyei Joab eng' eunnyi. Kitoor anyun Joab moetap Amasa eng' rotwonooto ak kitumdagei agutanikyik koba ng'wony. Nga ki mata kotoor ineendet kogeny, kogime Amasa. Yeityo koosup Joab ak Abisai ng'eetap kamet, Sheba weeriitap Bikri.

¹¹ Ki tonon eng' ye neegitee ineendet age eng' murenigap Joab ak kole, “Ineendet ne chamei Joab ak ineendet ne po Daudi, koosup Joab.”

¹² Kimildoegei Amasa korotiikyik eng' kwenutap ooreet ne oo. Ye kingo keer chiichooto kole ngo iit chii tugul yooto kotonon, kola Amasa koistogei eng' oranooto oo kwo keeweet ak kotuge ngoryeet.

¹³ Kingo kageisto eng' oranooto oo, koba piik tugul koosup Joab, koon Sheba weeriitap Bikri.

¹⁴ Ki pun Sheba pororyosyek tugul che po Israel agoi koit Abel Beth-maaka ak ole mi Berik tugul che kiga iyumgei ak koba ak icheek koosup ineendet.

¹⁵ Ki pwa lugeet tugul ne ki mi ak Joab ak koyiem Sheba eng' Abel ne po Beth-maaka. Ki iyum ng'ung'unyek koek tulwo konamgei ak nganaseet ak ki tonon konamgei ak irimeet. Ki ryep irimeet piik tugul che ki mi ak Joab koluul kwo ng'wony.

¹⁶ Ki kuurso eng' kutit ne oo anyun kwondo age ne utaat eng' nganasanooto kole, “Ogaso, ogaso, asoomok ale oleenji Joab konyo koriik yu, si kobiit ang'alaalji.”

¹⁷ Kingo nyo ye mi kwonyooto, ak koteebe kwonyooto koleenji, “Ii joab?” Kowolji koleenji, “Aa ineendet.” Koleenji anyun ineendet, “Kas ng'aleegap cheptong'ung' ne otwogindet.” Ak ki wol kole, “Agase.”

¹⁸ Yeityo komwa kwonyooto kole, “Ki cham kemwaei keny keele, ‘Ingoteeb icheek eng' Abel,’ ak kigees anyun ng'aleechooto.

¹⁹ Aa po icheek che po kaalyeet ak che po iman eng' Israel. Icheeng'e ibar nganaseet ne kamet eng' Israel. Amu nee si imache ilugui poroteetap Kamuktaindet ne Toroor?”

²⁰ Ki wol `Joab kole, “Ingolooit, ingolooit eng' anee, si ma lugui anan abar.

²¹ Ma uu nooto ng'olyoondonooto, kimach Sheba weeriitap Bikri, chiito ne po emetap tuloonoogap Ephraim, kobar laitoryat ineendet Daudi. Ara ogoonu ineendet ineegei, si awo eng' nganaseet.” Koleenji kwonyooto Joab, “Keero, ki wiirun metinnyi kosiir irimeet.”

²² Kwo anyun kwonyooto eng' utotyennyi ole mi piik tugul. Ak kitil icheek metitap Sheba weeriitap Bikri yeityo kowiir konyo saang' ole mi Joab. Ki kuut anyun Joab iryageet, ak koba eng' nganaseet, kwo chii tugul emainnyi. Ak ki week Joab kwo Jerusalem ole mi laitoryat.

Toretigap Daudi

²³ Kiboi Joab lugeet tugul ne po Israel, koboi Benaiah weeriitap Jehoiada Keretik ak Peletik.

²⁴ Kiboi Adoram aisuruut ak ki siriindetap tuguuk che piitu Jehoshaphat weeriitap Ahilud.

²⁵ Ki siriindet Seva ak ki tisiik Zadok ak Abiathar.

²⁶ Ko ki tisiindetap Daudi agine Ira Jairindet.