2 SAMUEL 18 - BUKUIT NE TILIIL Sireet ne Dutero Kanon

Kiterteeri Absalom

¹ Ki iit `Daudi piik che ki mi ak ineendet ak konde kiptainigap eliphuusyek ak kiptainigap pogolwogik koboi icheek.

² Ak kipchei Daudi lugeet kobee kweanaik somok: ki inde Joab kondochi kebeberta agenge eng' somok. Konde Abisai weeriitap Zeruiah, ng'eetap kametap Joab, kondochi kebeberta agenge eng' somok ak ki inde Itai Gitindet kondochi kebeberta agenge eng' somok. Yeityo koleenji `laitoryat piik, “Awendi agane iman kobootok.”

³ Ago ki le piik, “Mewendi, amu ngot kemwei, koma magenech kiy, anan ngot kobek kebeberta agenge eng' acheek, koma magenech kiy, ago oaechine ak piik eliphuusyek taman eng' acheek. Nooto anyun, myee ichoboge si itoretech eng' nganaseet.”

⁴ Koleenji `laitoryat icheek, “Kiit ne ogeere okweek ole nyolu, ayae nooto.” Ara anyun kitonone laitoryat ormariichet taban, ak kimanda piik kobee pogolwogik ak eliphuusyek.

⁵ Ki ng'at `laitoryat Joab ak Abisai ak Itai koleenji, “Oriree nerananooto Absalom agobo anee.” Ak ki kas piik tugul ye king'atei `laitoryat kiptainik tugul agobo Absalom.

⁶ Ki manda anyun piik koba kobargei ak Israel eng' keeweet, ak kimi pooryeet eng' timdap Ephraim.

⁷ Ki par otwogigap Daudi piigap Israel eng' yooto, ak ki piit parisyet ne oo eng' olooto eng' peetuunooto ne po piik eliphuusyek tiptem.

⁸ Kiyom emet tugul lugonooto, ak kibar timiin piik eng' peetuunooto che siirei che ki kibare rotwetap chok.

Meetap Absalom

⁹ Ki chunji `Absalom otwogigap Daudi. Kibunei Absalom nyumbunnyi, ak kingo chut nyumbut mooriik che kichang'a che po keetitap alayet ne oo, konam metitap Absalom keetoto ak kisonginin. Ki wo anyun nyumbut ne ki punoti kosiirto.

¹⁰ Kingo keer chiito age, komwachi Joab koleenji, “Kageer Absalom kosonginini eng' keetitap alayet.”

¹¹ Koleenji `Joab chiichooto kimwachin ineendet, “Nee ni, Keroo ineendet? Kalya si metoor ineendet eng' yooto kosore kokwer ng'wonyut? Ak ta kaagoonin fedhaisyek taman ak pireneet.”

¹² Ago ki leenji `chiichooto Joab, “Agot ndaname fedhaisyek eliphuut eng' eunnyu, ko matwae kora weeriitap laitoryat eng' eunnyu. Amu king'atin laitoryat ak Abisai ak Itai kegase kole, ‘Oriipkei, si ma twa chii nerananooto Absalom.’

¹³ Nda kagaayachi saboondanyi ko uu nooto, ang'aalse (ama mi ng'olyoo ne ung'aksei eng' laitoryat), ko kata iistoenage inyee.”

¹⁴ Kole anyun Joab, “Ma myee kigagei ne tee ni ak inyee.” Ki nam ng'otwek somok ak kotoor muguleldap Absalom, ye kita kosabei eng' keetoto.

¹⁵ Ak kiyiem ineendet murenik tamanu, che ki ipchin `Joab kariikyik ak kotoor Absalom, kobar.

¹⁶ Yeityo koguut `Joab iryageet ak ki week piik kobagaakta ooreet ne ki oone Israel, amu ki eetee Joab piik.

¹⁷ Kisut Absalom ak kowiirchi keriinget ne oo eng' timiin ak korurukyi ineendet karurugutyet ne oo ne po koik. Kimwei Israel tugul, kwo age tugul emainnyi.

¹⁸ Ye kita kosabei Absalom, ko kiga koteekyigei kiit ne uu toloita eng' atebweetap laitorya. Amu ki le, “Ma tinyei weeriit ne kibwaatee kainennyu.” Kimwaitae kioto kainennyi, ak ki kiguure toloitap Absalom agoi ra.

Kemwachin Daudi agobo meetap Absalom

¹⁹ Ki le anyun Ahimaaz weeriitap Zadok, “Ingalabat, aipchi laitoryat ng'aleek, aleenji kagoyaaktochigei Kamuktaindet ne Toroor mugetuut eng' puunikyik.”

²⁰ Ago ki leenji `Joab ineendet, “Meibe ng'aleek ra, ago iibe ng'aleek peetuut age. Meibe ng'olyoo age tugul peetuuni, amu kagome weeriitap laitoryat.”

²¹ Yeityo koleenji `Joab Kusindet, “Ui mwachi laitoryat tuguuk che kaigeer.” Ki ing'uruuk Kusindet eng' taitap Joab, ak kolabat.

²² Koleenji anyun Ahimaaz, weeriitap Zadok Joab kogeny, “Agot nda piitu kiy age tugul, asoomin ale, chamwo agane alabat asup Kusindet.” Ago kiteebe Joab koleenji, “Amu nee si imache ilabat o, weeriinnyu, ago mesiche melek agobo ng'aleechooto?”

²³ Ago ki le, “Agot nda piitu kiy age tugul, alabati.” Ak ki leenji ineendet, “Labat.” Ki labat anyun Ahimaaz kobun ooreetap Warenget ak ki wo kondoe Kusindet.

²⁴ Ki tebee Daudi kwenutap ormariichok aeng', ak kitogosta riibindet kwo ormariichet parak kot koit irimeet. Kingo tabendoi kogeer, chiito ne labatu ineegei.

²⁵ Ki kuurso riibindet ak komwachi laitoryat. Kole laitoryat, “Ngot ko ineegei, kotinyei ng'aleek che miyach.” Kingo teseitai kolabot koriik,

²⁶ kogeer riibindet chiito age kolabotu, ak kiguur riibindet, riibindetap ormariichet ak koleenji, “Labotu chiito age ineegei.” Kole laitoryat, “Agot agine koibu ng'aleek che myach.”

²⁷ Ki le riibindet, “Ageere ko kergei labatetap ne indou ak labatetap Ahimaaz weeriitap Zadok.” Ak ki le laitoryat, “Ineendet ko chii ne myee, ak ibu ng'aleek che myach.”

²⁸ Ki kuurso Ahimaaz ak koleenji laitoryat, “Chamegei kiy tugul.” Ki ing'uruuk eng' taitap laitoryat kot kotiiny togeennyi ng'wony ak kole, “Iberuurot Kamuktaindet ne Toroor Kamuktaindeng'ung' ne kaigoito piik che koleen kobargei ak kiptaiyandennyu laitoryat.”

²⁹ Ki teebee laitoryat kole, “Chamegei nerananooto Absalom?” Ak ki wol Ahimaaz kole, “Kangoyogu Joab otwogindetap laitoryat, anee otwogindeng'ung', ageer wasetapkei ne oo, ago manai kiit ne kabo.”

³⁰ Ki leenji laitoryat, “Ui taban ak itonon eng' yu.” Ak ki wo taban ak kotonon.

³¹ Ki it Kusindet ak kole, “Kas ng'aleek che po kiptaiyandennyu laitoryat, amu kayooktoun Kamuktaindet ne Toroor rani mugetuut eng' tugul che koga ng'eetyo kole obargei.”

³² Ki teebe `laitoryat Kusindet koleenji, “Chamegei nerananooto Absalom?” Ak ki wolji Kusindet kole, “Ingoigei puunigap kiptaiyandennyu laitoryat, ak piik tugul che ng'eetyinin kole kobarin, kiit ne kaigei nerananooto.”

³³ Ki aragen miising' laitoryat ak kitogosta kwo koot oriit ne mi ormariichet parak ak koriir. Kingo wendi koleenoti, “Ooi weeriinnyu Absalom, weeriinnyu, weeriinnyu Absalom! Kata kaigai ame ne kata inyee, Ooi Absalom, weeriinnyu, weeriinnyu!”