2 SAMUEL 13 - BUKUIT NE TILIIL Sireet ne Dutero Kanon

Amnon ak Tamar

¹ Ki tinyei Absalom weeriitap Daudi chepkamet ne karaaran, ne ki kiguure Tamar. Ki cham `Amnon weeriitap Daudi Tamar.

² Ki iimgei Amnon kot komyan amu chepkametinnyi Tamar, amu ki pergeiyat, ak ki keer Amnon kouuit koyachi kiy age tugul ineendet.

³ Nguno anyun ko ki tinyei Amnon chorweet, ne kainennyi ko ki Jonadab, weeriitap Simea, ng'eetap kametap Daudi. Ki chii ne ng'aaliin miising' Jonadab.

⁴ ki teebee `Jonadab Amnon koleenji, “Kolya o, weeriitap laitoryat, si isagiti peetuut age tugul?” Kowolji `Amnon ineendet koleenji, “Koacham ak amache Tamar chepkametap tupchennyu Absalom.”

⁵ Koleenji `Jonadab ineendet, “Ui ru eng' itogung'ung' ak iigei chiito ne myani, si ye nyo kwandang'ung' kogeerin, ileenji, Asoomin ale konyo tupchennyu Tamar nyoo kogoono amitwogik aam ak kochobwa amitwogik eng' tainnyu, si kobiit ageer yeityo kogoono eng' eunnyi aam.”

⁶ Ara ki ru anyun Amnon, koigei chiito ne myani. Kingo nyo laitoryat kogeer ineendet, koleenji Amnon laitoryat, “Asoomin ale konyo tupchennyu Tamar ak kochobwa magatiinik aeng' ageere si kobiit kogoono eng' eunnyi aam.”

⁷ Koyookto anyun Daudi keguur Tamar eng' kaa ak koleenji, “Ui kootap ng'eetap kamenng'ung' Amnon si ichopchi amitwogik.”

⁸ Ko uu nooto anyun, kogiwo Tamar kootap ng'eetap kamet Amnon ne kiruei. Ki nam peek che kagitesyi peek ak kokwanykwany yeityo kochop magatiinik eng' tainnyi ak kobeel.

⁹ Yeityo konam taabeetap karnet ak koluluk eng' tainnyi kogoochi, ago ki eesyo koam. Ki le `Amnon, “Ingomanda piik tugul eng' yu ami.” Ak kimanda chii tugul eng' ye ki mi ineendet.

¹⁰ Ki leenji `Amnon Tamar, “Ibu amitwogik kobwa kooi arue si kobiit igoono eng' eung'ung' aam.” Ki ip Tamar magatiinik che kagochop, koip koba koyooto koipchi ng'eetap kamet Amnon.

¹¹ Ago ye kingo kagoip magatinichooto koba ye neegitee ineendet si koam, kosuup ineendet ak koleenji, “Nyoo keruiye tuwai, tupchennyu.”

¹² Ak ki wolji `Tamar koleenji, “Achicha, tupchennyu, amesuuba, amu ma mi kiy ne uu no ne nyolu keyai eng' Israel; ameyai yaityoni.

¹³ Si awo ano anyun anee eng' teweernatennyu? Ak iigei inyee age eng' che yaacheen che abusotiin eng' Israel. Ara anyun, asoomin ale ng'alaalji laitoryat; amu maetenen abunjin.”

¹⁴ Ago ma cham kogas ng'aleekyik, ago amu ki kiim kosiir chebooto, ko kisuup ak koruiyo ak ineendet.

¹⁵ Kingo pata kosas `Amnon ineendet eng' saset ne oo miising', amu kieet weget ne kiwech ineendet kosiir chamyet ne kiga chame ineendet. Ki leenji `Amnon ineendet, “Ng'eet, ui.”

¹⁶ Kowol Tamar koleenji ineendet, “Ma uu nooto, amu ya yaityoni oo keonena kosiir kiit ne kaiyaiywo.” Ago ma cham kogas ng'aleekyik.

¹⁷ Yeityo koguur otwogindet ne kiboisyechin konyo ole mi ak koleenji, “Imaande kwonyi kwo eng' yu ami, ak itemel kurgeet ko kagomanda.”

¹⁸ Ki ilaachi chebooto ngoryeet ne kooi, amu ki cham kolaachi tiibiigap laitoryat che pergeinik ngoroik che uu chooto. Ki imut anyun otwogindennyi ineendet konyo saang' ak kotemel kurgeet ko kagomong' konyo saang'.

¹⁹ Ki inde Tamar oreek metinnyi ak kogereer ngoryennyi ne kooi ne ki ilaachi. Kinamatkei met ak kwo koriiroti eng' kutit ne oo.

²⁰ Ki leenji `Absalom ng'eetap kametap Tamar ineendet, “Koomi ak Amnon ng'eetap kamenng'ung'? Siis nguno anyun, tupchennyu; ineendet ko ng'eetap kamenng'ung'. Mende kiito muguleldang'ung'.” Ki tebi Tamar anyun ineegei eng' kootap ng'eetap kamet Absalom.

²¹ Ago kingo kas Laitoryat `Daudi tuguuchuuto tugul, konereech miising'.

²² Ma mwachi `Absalom Amnon kiy ne myee anan ko ne ya. Ki sas `Absalom Amnon, amu kiga suup chepkamennyi Tamar.

Kobare `Absalom Amnon

²³ Ye kingo siirto kenyiisyek aeng'u, ko ki mi Absalom ak piik che kitilei koroorigap keechiirek eng' Baal-hasor ne mi ye neegitee Ephraim, ak kiguur Absalom weeriik tugul che po laitoryat.

²⁴ Ki wo Absalom ole mi laitoryat ak koleenji, “Keero, tinyei otwogindeng'ung' piik che tilei koroorigap keechiirek. Ara asoomin ale ingoba laitoryat ak otwogikyik kobooto otwogindeng'ung'.”

²⁵ Kowolji `laitoryat Absalom koleenji, “Achicha, weeriinnyu, ma myee keebe tugul, si ma kigoonin nyigiisindo. Ki igaigai ineendet,” ago nganda ma cham kwo, ko ki iberuur ineendet.

²⁶ Ki soom anyun Absalom kole, “Ngot ko mewendi, asoomin ale keebe kobooto Amnon tupchennyu.” Ki teebee `laitoryat ineendet koleenji, “Amu nee si imache obe tuwai?”

²⁷ Ago ki igaigai `Absalom ineendet, kochamji Amnon ak weeriik tugul che po laitoryat koba kobooto ineendet.

²⁸ Ki ng'at `Absalom otwogik koleenji, “Ye kagobaibait muguleldap Amnon eng' maiyek, ko ye aleenjok, ‘Okwer Amnon,’ obar anyun ineendet matoiywei. Ma anee ne kang'atak? Ogimegitu ak onyiganitu.”

²⁹ Ki yachi `otwogigap Absalom Amnon ko uu ye kiga ng'at Absalom. Ki ng'eetyo anyun weeriik tugul che po laitoryat kolaany chii tugul nyumbunnyi ak komwei.

³⁰ Ye kita kobendi eng' ooreet, koit ng'aleek ole kimi Daudi keele, kagobar `Absalom weeriik tugul che po laitoryat, ak ma ng'et agot agenge eng' icheek.

³¹ Ki ng'eet anyun laitoryat kogereer ngoroikyik ak koru eng' ng'wony. Ki tononso otwogikyik tugul eng' ole mi ineendet ko kagogereer ngoroikwak.

³² Ki wol Jonadab weeriitap Simea, ng'eetap kametap Daudi kole, “Mat kobwaat kiptaiyandennyu kole kagebar weeriigap laitoryat tugul, amu Amnon ineegei ne kame. Amu kiga kotil niito eng' ng'atuutyetap Absalom kobooch peetuut ne kigasuup Amnon chepkamennyi Tamar.

³³ Nooto anyun, amat konde kiptaiyandennyu laitoryat kii muguleldanyi, kobwaat kole kagobek weeriik tugul che po laitoryat. Amnon ineegei ne kame.”

³⁴ Kimwei Absalom. Ak kitabendo murenet age ne kiriipsei, ak kingo keer, kogeer kobwanei piik che chaang' kobunu ooreetap tegeiyat ne ki mi let eng' ineendet.

³⁵ Ki leenji `Jonadab laitoryat, “Keero, kagobwa weeriigap laitoryat, ko uu ye kamwa otwogindeng'ung' ko uu nooto.”

³⁶ Kingo kagogees ng'alaalet, koit weeriigap laitoryat ak kowaakyo ak kooteeiyo. Ki ite laitoryat agine ak otwogikyik tugul eng' kateet ne oo.

³⁷ Ago ki mwei Absalom kwo ole mi Talmai weeriitap Amiur laitoryatap Gesur. Ki riirchi `Daudi weeriinnyi peetuut age tugul.

³⁸ Kimwei anyun Absalom kwo Gesur ak ki tebee olooto kenyiisyek somok.

³⁹ Ak kimach miising' Laitoryat Daudi kwo ole mi Absalom, amu kiga konyoor kagaigaet agobo Amnon, amu kiga kome.