2 SAMUEL 12 - BUKUIT NE TILIIL Sireet ne Dutero Kanon

Kogerei kong' `Nathan Daudi

¹ Ki iyookto `Kamuktaindet ne Toroor Nathan kwo ole mi Daudi. Ak ye kingo nyo ole mi ineendet koleenji, “Kimi piik aeng'u nganaseet agenge. Ki mogoryot age, ko ki kibananiat age.

² Ki tinyei ne ki mogoryot akwotisyek che chaang' miising' che po keechiirek ak tuuga.

³ Ago ki ma kotinyei kiy ne ki kibananiat, kobatee subeendo agenge ne ming'in ne po keechiir ne kiga al ak kogu. Ki eegitu tuwai ak lagokyik. Ki amei amitwogikyik, kiee kigombennyi ak korue tegeennyi. Ki uu eng' ineendet cheptonyi.

⁴ Ki nyo anyun kiprutoiyo kap mogoryondonooto, ak ma cham konam ne po akweennyi ne po keechiirek ak ne po akweetap tuukyik koeng'ji chiichooto kisiirtoi ne kiga nyoonji ineendet, ago ki nam aarwetap kibananiandanooto, ak koeng'ji chiichooto kiga nyoonji ineendet.”

⁵ Ki nereekyi miising' `Daudi chiichooto ak ki leenji Nathan, “Ko uu ye sabei Kamuktaindet ne Toroor, konyaaljin chiichooto ki yai kioto kome,

⁶ ak koyook arwanooto konyil ang'wan amu ki yai kiito ak amu ki ma kotinyei rireenet.”

⁷ Koleenji `Nathan Daudi, “Ii chiichooto. Kamwa Kamuktaindet ne Toroor, Kamuktaindetap Israel kole, Ki aiiliin iegu laitoryat ibou Israel, ak ki asaruun eng' eutap Saulo.

⁸ Ki agoonin kootap kiptaiyandeng'ung' ak ki agoonin osotigap kiptaiyandeng'ung' kobwa tegeng'ung' ak agoonin kootap Israel ak ne po Judah. Nda kiga ng'ering'itu chooto, ta ki atesun tuguuk alak ak alak.

⁹ Amu nee anyun si isas ng'olyootap Kamuktaindet ne Toroor iyai kiit ne ya eng' tainnyi? Koibar Uriah Hitindet eng' rotwetap chok, ibare ineendet rotwetap chok ne po lagogap Ammon, yeityo imutu osotyonnyi koek osotyondeng'ung'.

¹⁰ Nguno anyun, komagoi istogei rotwetap chok eng' koong'ung' amu koisasa ak koimutu osotyotap Uriah Hitindet koek osotyondeng'ung'.

¹¹ Kamwa anyun Kamuktaindet ne Toroor kole, ‘Keero, ang'eetun yaityet eng' koong'ung' ak arebenen osotiguk igeeroti, ak agoochi icheek chiitap kokweng'ung' ak koruiyo ak osotiguk kooluu asiista.

¹² Koiyai eng' ung'oot, ago ayae kiito eng' taitap Israel tugul, ak kogeerei asiis.’ ”

¹³ Koleenji `Daudi Nathan, “Koayachi Kamuktaindet ne Toroor tengekto.” Kowolji `Nathan Daudi koleenji, “Kagoisto Kamuktaindet ne Toroor agine tengektong'ung'; memee.

¹⁴ Ago amu kaigoochi eng' yaityoni puunigap Kamuktaindet ne Toroor poroindo ne oo kochubis, komeei iman agine lakweet ne tuun kisigun.”

¹⁵ Kingo kakwo Nathan koonnyi, kobir `Kamuktaindet ne Toroor lakweet ne kiga sikyi Daudi osotyotap Uriah, ak kimyan kot.

¹⁶ Ki sa `Daudi Kamuktaindet agobo lakwanooto. Ki irugutkei Daudi ak ki wo ko, kwo koru ng'wony kemout komugul.

¹⁷ Ki ng'eetyo poisyegap koonnyi kotononio eng' ye mi ineendet koleen kong'eet ineendet, ago ma cham ak ma cham koamis ak icheeget.

¹⁸ Eng' peetuut ne po tisap, kome lakweet. Ki iywei otwogigap Daudi komwachi ineendet koleenji kagome lakweet, amu ki le, “Ogeero, ngot ko ye kota kosabei lakweet, ko koging'alaalji ineendet ama cham kogas ng'aleekyok, kobirtogei anyun ne tya ngot keleenji kagome lakweet?”

¹⁹ Ago kingo keer Daudi kochaamjingei otwogikyik, konai Daudi kole kagome. Ki teebee `Daudi otwogikyik, koleenji, “Kagome lakweet i?” Ak ki wol kole, “Kagome.”

²⁰ Ki ng'eet anyun Daudi eng' ng'wony kwo koun kei, koiilgei ak kolaach ngoroik alak, yeityo konyo kootap Kamuktaindet ne Toroor kosa. Kingo tar kosaaei, kwo koonnyi ak king'yemach amitwogik, kindochi tainnyi ak ki am.

²¹ Ki leenji anyun `otwogikyik, “Nee kii koiyai? Koirugutigei ak iriire agobo lakweet yu kota kosabei, ago ko ngo me, ing'eet ak iamisye.”

²² Ki wol kole, “Ko ngo ta kosabei lakweet, ko koarugutigei ak ariire amu koaleen tamangap koriirena Kamuktaindet ne Toroor, si kosap lakweet?

²³ Ago nguno ko kagome, kota arugutyigei nee? Ta amuuchi aweech kosap kogeny? Ta awendi ole mi ineendet, ago ma weeksei ineendet konyonei oli ami.”

Sigeetap Solomon

²⁴ Ki igaigai `Daudi Bathsheba osotyonnyi yeityo kwo ole mi ineendet kotuiyogei. Ki sich weeriit ak koguuree kainennyi Solomon. Amu ki cham `Kamuktaindet ne Toroor ineendet,

²⁵ ko ki iyooktoe ng'aleek Nathan maotyot, keguure kainennyi Jedidia.

Keluulei Rabbah

²⁶ Kibargei `Joab ak Rabbah ne po lagogap Ammon, ak kiluul nganaseetap kaplaitoryat.

²⁷ Ki iyookto `Joab piik koba ole mi Daudi komwachi koleenji, “Kogebargei ak Rabbah, ak koaluul nganaseetap peek.

²⁸ Ara anyun, iyum piik che ng'etunotiin, teech ye tokyingei nganaseet ak inam si ma anam anee nganaseet ak kemwaitae kainennyu.”

²⁹ Ki iyum `Daudi piik tugul yeityo koba Rabbah kobargei ak nganasanooto ak koluul.

³⁰ Ki inemune laitoryannywa naaryeetap laitornatet, ne kinyigiisindanyi ko ki talendait agenge ne po thahabu, ne ki kinde koik che po kamanuutyet ne oo ak ki kigerchine `Daudi metit. Ki ip komong' parunenik che chaang' miising' che po nganaseet.

³¹ Ak ki imut piik che ki mi oriit komong', ak konde icheek koboisyee musumenosyek, kariik che kiburburenisye ak aonogap kariik, ak kobirchi kobois eng' ole kibeelee matubaruuk. Ki yachi ko uu nooto nganasook tugul che po lagogap Ammon. Yeityo koweek Daudi ak piik tugul koba Jerusalem.